E $1.3 Miliona se Tino i Tupe Faaopopo ua Tuuaia ai se Tamaitai sa Galue i le ANZ

0
75

O le vaiaso nei na tulai ai i luma o le Faamasinoga Maualuga le tamaitai o Seira Malifa, e tali ona moliaga o le gaoi ao avea ma tagata faigaluega (theft as servant).

Ina ua mua’i valaau lenei mataupu ia Ianuari 2023, sa ioeina ai e Seira Malifa lona moliaga o le gaoi ao avea ma tagata faigaluega (theft as a servant) ina ua ia talaina i tua ni nonoga tupe faafoliga (fake loan) e tusa ma le $80,000 afe tala lona faitau aofai.

Peitai o le vaiaso nei sa toe tuuina mai ai nisi moliaga faaopopo ma le aofai o le seleni e $1.3 miliona tala.

I taualumaga o le faamasinoga na talosaga ai le itu a leoleo e faataatia ese le lauina o le faasalaga i moliaga muamua e pei ona tuuaia ai Seira i le $80,000 tala.

Na talosaga le itu a leoleo, e iai moliaga faaopopo ae moomia se taimi mo le faama’ea mai o tapenaga ma faamautu moliaga.

Na talia e lana afioga i le Faamasino ia Fepuleai Ameperosa Roma le talosaga ma tolopo ai mo le isi lua vaiaso o lumanai.

O le mataupu lenei o loo tuuaia ai lē sa avea ma tagata faigaluega o le ANZ Bank i lona faia lea o ni talosaga nonōgatupe faafoliga (fake loans application) ae mulimuli ane ona ia toe tala lea i tua.

I le tulai mai o le faafitauli, na logoina ai loa e le faletupe le ofisa o leoleo ma faailoa iai mo a latou suesuega.

O le Alii loia ia Fetu Laga’aia o loo tulai mo Seira Malifa.