20 April 2023 Apia Samoa. O ananafi na atoa iai le lima o aso o tausailia pea se tamā 77 tausaga sa alu ese mai i lona aiga i Asau i le taeao o le Aso Faraile 14 Aperila, ma agai atu i lona maumaga.
Na faamaonia e le Komesina o le Matagaluega o Leoleo, Falepuipui ma le Ola Toefuataina, Auapaau Logoitino Filipo, o loo faaauau pea le galuega a le Matagaluega i le tau sailia pea o le tamā ia Tautaifau Kipaoa Faavesi.
Saunoa Auapaau, o le ripoti mai a lo latou aiga, o lenei tamā e masani lava ia i le agai atu i lana maumaga.
“O le faaiuga o le vaiaso na mavae atu nei, na agai ai foi i le taeao o le Aso Faraile Tautai i lana maumaga, ae peitai, e po lava lena aso e le’i toe foi ane lava.”
Tā’ua e Auapaau, o loo faaauau pea le galuega a le Ofisa o Leoleo i Salafai, ma o loo agai i le togavao le sailiga.
“O taulelea ma matai o le afioaga o loo galulue faatasi ma le Matagaluega mo le sailiga.”
Ua tatalo mai foi le Komesina i soo se tasi o ia silafia se faamatalaga ia Tautai Fau ina ia logo vave se ofisa leoleo o lata ane.
(1240)
