Tusia: Pesetā Tusiga Taofiga Gvt Press. Aua ia ne’i iā te i matou Le Ali’i e, ‘aua ia ne’i iā te i matou, a ia tu’uina atu le vi’iga i lou suafa, ona o lou alofa ma lou fa’amaoni. Se ā le mea ua faimai ai nu’u ‘ese, o i fea lo outou Atua, a’o lo matou Atua o lo’o i le lagi lava ia, ua ia faia mea uma ua iai, i lona finagalo.
O le saunoaga manino lea a le afioga i le Palemia, Susuga i le La’aulialemalietoa Leuatea Polāta’ivao Fosi Schmidt ina ua mae’a manuia le talanoaina o le Tala o le Tupe 2026|27.
E le’i ‘alofia le toe momoli o le tu’uālalo tu’usa’o a le afioga i le Ta’ita’i o le Mālō aga’i i le mamalu o le Fono Usu a Samoa, e le gata o le Mālō ae fa’apea fo’i i le Itu Agai ma Faipule Tuto’atasi, ina ia galulue fa’atasi, ma ia maua le nonofo fealofani, ina ia fai ma fa’ata’ita’iga moni auā se Samoa nonofo fīlēmū ma soifua fetausia’i.
Saunoa La’aulialemalietoa, o le fatu e totō nei e le Palemene, e fua taeao, ma e selesele ai fanau o le lumana’i. O lona uiga, a moni le alofa ma le manatu mauāluga ia sa’oloto ma ola fiafia fanau lalovaoa o Samoa mo ā taeao, o nei e tapena ai lenā ‘anofale ina ia mautū.
O le agaga moni o le Mālō, ia fa’amuta ia leaga ua sola, ia fa’atuatuana’i le fetuia’i, fevaevaea’i ma le fe’aina’i, a ia fusi fa’atasi fau o Mālō auā se Samoa ola sa’oloto.
O le isi tu’uālalo a le Palemia i Faipule uma o le Palemene, ina taofia ia, le so’ona faia pea o fa’asalalauga i luga o ‘upega tafa’ilagi, e ta’umāmāina ai le mamalu o le Palemene fa’apea le Mālō Filifilia, a ia tapena finagalo ma laolao lelei manatu, e fa’asoa ai i le tulaga aloā’ia ma le amanaia, e ala i totonu o le Palemene, e soa ai le pule, ma fetu’utu’una’i ai le tōfā mo se Samoa ola fiafia.
Na talia fiafia e le afioga i le Ta’ita’i o le Itu Agai, Susuga iā Tuila’epa Lupesoliai Dr. Sa’ilele Malielegaoi le tu’uālalo alofa a le Palemia.
O lona fo’i lea finagalo, ina ia galulue fa’atasi, peita’i na ia talatala manino, o le Itu Agai, e tatau lava ona avatu so latou manatu pe sala ‘ese pe talafeagai fo’i, a’o se manatu e momoli fa’afautuaga, ina ia fetu’utu’una’i i ai le tōfā ma fa’ai’uga fai a le Mālō mai lea taimi i lea taimi.
Peita’i, na saunoa manino Tuila’epa, o le lagolago i le Faigāmālō Filifilia, e lē mafai ona ‘ave’esea, e tumau pea, ma e lagolagosua lava i le fe’oe’oea’i ma le galulue fetausia’i.
- 194,267 Tagatanuu o Samoa sa maua le ta’i $150 tala - June 28, 2026
- A Fealofani tatou o Ta’ita’i – e Toafilemu foi le Atunu’u - June 27, 2026
- Pāsia Aloaia le Tala Faatatau Autu o le Tupe 2026/2027 - June 27, 2026
