Falepuipui i le Ulufale Faasolitulafono ma Faaoolima i se Tinā ao Tagi si ana Tama 8 Tausaga

0
2991

Ua tuuina mai e le Faamasinoga Faaitumalo se faasalaga falepuipui e 2 tausaga ma le 3 masina mo se alii sa ia osofa’ia se fale ma le moega o se tinā ma faaoolima iai ao tagi si ana tama  8 tausaga.

O Michael Faalialia, 28 tausaga mai Saleaumua, e fai lona toalua ma le fanau.

Sa faamaonia i luma o le Faamasinoga Faaitumalo moliaga o le faaoolima tugā ma le ulufale faasolitulafono (unlawful entry).

I faamaumauga a le itu a leoleo na fofogaina e Tuiloma Tu Muliava Ieni (Police Prosecutor) e faapea, “O le Aso 2 o Setema 2022, na ulufale faamalosi ai Michael Faalialia i totonu o le fale o se tinā 32 tausaga, ao fai malologa lea tinā ma lana tama tama e valu tausaga.

Michael Faalialia and Police Prosecutor, Tuiloma Tu Muliava Ieni.

I le suesuega o lenei mataupu sa fofola ai i luma o le Faamasinoga e faapea, sa oo atu Michael Faalialia ma agai sa’o i le moega o le tinā.

Sa faateia ma ala le tina ma faia loa se tauiviga.

E le’i mafai e le malosi o le tinā ona tetee atu ia Michael Faalialia ae o le taimi lea ua ta tu’i e Faalialia foliga o le tinā.

Sa faamanualia foliga o le tina ma ua tafe mai ai le palapala (toto). Ae o le taimi lea na o le tagi o le tamaitiiti valu tausaga.

O le pa’ū ese o le ofu sa fusi ai le ulu o Faalialia na tamo’e ese mai ai loa i fafo ma le fale.

Na finau le itu a leoleo e amata mai le fua a le Faamasinoga i le lima tausaga mo le moliaga o le faaoo manu’a tugā, ae lua tausaga mo le moliaga o le ulufale faasolitulafono.

E faavae lea i le tulaga ogaoga o manua ma aafiaga i le tina, ae maise sa faatino nei sauaga ao pupula iai mata o le atalii.

O le isi itu sa faaalia, o le Aso 4 Fepuari 2024 na tausaili ai e leoleo le ua molia, ina ua lē tulai i le aso sa faatulagaina.

I le fofogaina o le faaiuga a le afioga i le Faamasino Sinia o le Faamasinoga Faaitumalo iā Talasa Atoa-Saaga na ia faamamafaina ai le aafia o le tina i sauaga sa faatinoina aemaise o le vaai tino lea iai o le atalii.

“O se manu’a e lē mafai ona aveese pe faagalo i lona mafaufau.”

I le faaiuga a le Faamasino, mo le moliaga o le faaooman’ua tuga, na amata mai lea i le 18 masina, toesea le tolu masina mo le faatoesega, totoe ai masina e 15 e nofo sala ai i le falepuipui, ae mo le moliaga o le ulufale faasolitulafono, e 12 masina e nofo sala ai i le falepuipui.

O le umi e nofo sala ai i le falepuipui e 2 tausaga ma le 3 masina.