Ua toe maua le faamoemoe o se teine talavou mai Lalomanu, Aleipata e toe foi i le a‘oga, ina ua mae‘a se taotoga o lona fatu i Fiti, sa faatupe atoa e le PSH Pacific Specialist Healthcare.
Ua 15 nei tausaga o Malama Iefata, ae o le 11 o ona tausaga na taofia ai lana a‘oga ona ua faateteleina lona gasegase ma ua faigata ai ona savali i le a‘oga i aso taitasi.
Na maua le avanoa mo se fesoasoani ina ua galue lona tamā e ave le taavale mo le malaga ai o le PSH i Samoa i le masina na te‘a nei, mo le suatiaina o le eleele o le falemai o le PSH Samoa.
O iina na ia faamatala ai le gasegase o lona afafine i lē sa faavaeina falemai o le PSH, le susuga ia Tagaloafaaofonuu Parvish Kumar, fapea le fomai tipitipi o le fatu, Dr Sanjeev Khulbey.
Na amata ona tigaina Malama ina ua 11 ona tausaga. Sa faateteleina le tale ma faigata ona mānava. Ina ua faamatala atu e le tamā o Malama le tulaga o loo iai si ona afafine, sa le toe faatali le ofo atu o Tagaloafaaofonuu Pavisi e fesoasoani.
A o lei tuua Samoa e le team a le PSH, na siaki ai e Dr Sanjeev i le VIP a le malae vaalele i Faleolo.
Na faamaonia i lea siaki ua aafia lona fatu i le rheumatic heart disease, ma ua matuā faaleagaina ai alatoto e tolu mai le fa o lona fatu.
Na saunoa Dr Sanjeev, sa faigata ia Malama ona savali, faatino galuega masani o le aso, ma maua se moe lelei ona o lenei gasegase.
O le Aso Tofi sa siaki ai Malama, ae o le Aso Sa lava lena, Aso 20 o Setema sa malaga ai ma lona tinā ia Lavei Aitogi Iafeta, I Nadi Fiti mo togafitiga i le falemai o le PSH i Nadi.
Na la tuua Samoa i le aso 20 o Setema ma toe foi mai i le aso 1 o Oketopa. Sa atoa foi le 15 tausaga o Malama a o iai i le falemai i Nadi.
Saunoa Dr Sanjeev, “Sa fai le matou keke ma faamanuia ai lona 15 tausaga, ma o le aso tonu lava lena o le World Heart Day, Aso 29 o Setema.
Na faatupe e Tagaloafaaofonuu Parvish Kumar le taotoga e ala i le PSH Foundation. Sa totogi ai foi pasese ma le nofoaga e nonofo ai Malama ma lona tinā i Fiti.
Saunoa Tagaloafaaofonuu, “Ia e sa’o lelei, sa matou faatupeina uma le faamoemoe mo togafitiga a Malama..
“O se vaega lea o le vaai mamao a le PSH, ia maua e tagata uma togafitiga faaonaponei e faasaoina ai le soifua, aemaise lava a tatou fanau, o le lumanai manuia lea o Samoa ma atunuu o le Pasefika.”
O lenei fesoasoani o se vaega e faatupe e le PSH Foundation. E fesoasoani i tagata o le Pasefika o loo manaomia togafitiga faapitoa, ae ua lē gafatia e o latou aiga le tau.
E lagolagoina galuega a le PSH Foundation i foai mai paaga a le PSH ma nisi sa latou maua togafitiga mai fomai faapitoa a le PSH.
O loo faamoemoe le PSH e avea le Foundation ma vaega tāua o ana galuega i Samoa, ina ia maua ai se isi auala e fesoasoani ai i gasegase o loo manaomia togafitiga faapitoa.
Mo lenei talavou mai Lalomanu, o le taotoga ua toe maua ai le faamoemoe e foi atu ai i le potu a‘oga ma faaauau lana a‘oga, auā ua fa tausaga e le o toe aoga ona o lona gasegase.
Saunoa Dr Sanjeev Khulbey, o le a ia malaga mai lava i Samoa ma faatino siaki faaauau pea mo Malama.
- 16 locals and 14 overseas-based applicants Pass the Malua Entrance Exam - October 13, 2026
- Fuafua le Malo e Toe Faatū Nofoa e Lua mo le Au Palota Tu Taulaga - October 11, 2026
- Tumau Tuia Pu’a Fuatogi Letoa i le Nofoa o Safata 2: Teena le Talosaga a Leleua - October 9, 2026
