E 15 pine na faamanuiaina ai le au taaalo Taekwondo a Samoa, lea sa taliu atu i le taamilosaga ua faaigoaina o le 2023 Kukkiwon Cup, sa faia lea i Aukilani Niu Sila.
O le Kukkiwon Cup, o le taamilosaga faalemalo lea a Niu Sila e filiflili ai nisi e agai atu mo nisi taamilosaga e agavaa ai mo le Olimipeka (Olympic qualifiers)
E 4 pine auro na maua mai lea ia Corinthian Fritz Kasimani i le vaega i lalo o le 8 tausaga. O tamaitai o Gianna Simanu ma Tevani Laumea sa tofu ma le pine auro le Vaega 9-11 tausaga, ma Luisa Fulivai Vaega o le Junior Category.
E iva (9) pine siliva mai ia Auliimoana Laumea, Jeannette Fritz-Kasimani, Keana Tuaoi, Otele Toleafoa, Hele Stowers, Sabastian Eteuati, Niko Vaitupu, Dante Senio, ma Ryan Eteuati.
E lua pine apa memea sa manumalo ai Tovale Filipo ma Taaloga Faasalaina.
O le susuga i le faiaoga ia Leuluaitumua Tapunuu Kaino Thomsen Fuataga, na taitaia le aumalaga. O ia foi o se tasi aa avea ma sui tauva mo Samoa i le Olimipeka.
Saunoa Leuluai, “O se amataga lelei lea mo le taaloga Taekwondo i Samoa, ma e tatau ona sili atu se isi tulaga o le a oo iai i isi taamilosaga o loo lumanai..”
“E momoli le faamalo ma le faafetai i le tapuaiga a le atunuu ua a’e ai ma le manuia le faatamasoaalii.”
O le au taalo na masii sa aofia ai ma nisi o fanau aoga. O le au taaalo a Samoa sa filifilia mai le kalapu ua faaigoaina, Tuiaopo Investment Apia Taekwondo, i Matautu i Apia.
