Pepesi le Faamai o le Dengue Fever i Samoa

O le 5 i le 9 tausaga faapea latou ua 60 tausaga le soifua, o loo pito aafia i le faama'i e pei ona feavea'i e namu.

0
138

Ua faatuputupula’ia le fuainumera o le atunuu e aafia i le faama’i o le dengue fever.

Sa faamaonia mai e le Pule Sili o le Matagaluega o Soifua Maloloina, le afioga ia Aiono Dr Ekeroma i se faatalanoaga ma le vasega o tusitala i le Aso Faraile 19 Aperila 2024.

E lua vaiaso o le a agai ai le Matagaluega o Soifua Maloloina e faatino se taumafaiga ua faaigoa o le Clean Up Campaign i nisi o taumafaiga e fōia ai le pepesi o le faamai e auala atu i namu.

“O le agai i tua le aufaigaluega ua aoaoina faapitoa e fana i vailaau nofoaga e pei o aoga ma pisinisi poo kamupani, faapea soo se ofisa a le Malo..”

O nei taumafaiga e pei ona faailoa e Aiono Dr Ekeroma, ina ia tineia ai le iniseti o le namu lea e feavea’ia ma mafua ai le faama’i o le dengue fever.”

Saunoa le ofisa sili, a ma’ea le lua vaiaso ua atofa, ona toe tilotilo lea o le pulega i le isi laasaga pe afai e faaititia le fuainumera o le atunuu e aafia, ae po o faateleina foi i latou e aafia.

O nei taumafaiga a le Matagaluega ua tatalo mai ai le pulega i ofisa fono faavae o itumalo faapea ma mafutaga a tina poo le matagaluega o Tina ma Tamaitai, Nuu ma Agafesootai, ina ia galulue faatasi i le faia lea o faalauiloa poo asiasiga i auala e faamana ai autafa o maota ma laoa.

“O vaega ia o loo manatu le pulega o loo tautuufua ai le namu.”

O le Aso 14 Aperila 2024 sa faamauina ai e le Matagaluega o Soifua Maloloina o loo 80 o i latou ua faamaonia le aafia i le dengue fever.

Ae o le aofai o e ua faamaonia sa maua i le dengue fever mai ia Novema 2023 e oo mai i le Aso 14 Aperila 2024 e oo atu i le 216 gasegase.

O nuu tu taulagai i Apia agai atu i Vaivase, Apia i Leulumoega, o loo faamauina ai le toatele o i latou o loo aafia.

O le 5 i le 9 tausaga faapea latou ua 60 tausaga le soifua, o loo pito aafia i le faama’i e pei ona feavea’i e namu.

O le tausaga 2017 o loo faamauina e le pulega na sasao ai foi le faama’i o le dengue fever i Samoa. Sa silia i le 1000 tagatanuu na aafia ae toa 5 sa maliliu.

O le tatalo a le Matagaluega, ina ia maua le galulue faatasi o le atunuu e tineia le namu ma ia faaitiitia latou e aafia ma ia aua nei iai se soifua e maimau ai.

An Opportunity NOT to be Missed