Faa-Samoa

Tumau pea Toelupe i le Tofi Sui Faipule o Falealili 1 a’o Toe Iloilo le Faaiuga o le Faamasinoga

April 5, 2026

810

Sa tuuina mai se faaiuga a le Faamasinoga Maualuga a Samoa i le Aso Tofi, 2 Aperila, ina ia taatia ese le faatinoina o le faaiuga a le Faamasinoga o Faigapalota, lea sa faaleaogaina ai le filifilia o le afioga ia Toelupe Poumulinuku Onesemo, e fai ma Sui Faipule o Falealili 1.

“The Court grants an interim stay of execution of the judgement of the Court under challenge pending further order of the Court.”

O lenei faaiuga ua tula’i mai ona o se toe talosaga atu o le Sui Faipule a Falealili 1 i le Aso 30 Mati 2026, ina ia toe iloilo le faaiuga.

O pei ona tusia i le faaiuga a le Faamasinoga Maualuga (Minute 1), sa faaulu atu ma ua i luma nei o le faamasinoga ni talosaga a Toelupe e ui atu i ana loia, ina ia toe iloilo le faaiuga na tuuina mai, i ona aafiaga tau aiā tatau o loo tuuina mai e le faavae (constitutional rights).

O loo talosagaina foi e Toelupe se toe iloiloga o gaioiga a le Faamasinoga Maualuga i le faatinoina o taualumaga o le faamasinoga ma le suesueina o le mataupu tau faiga-palota (review of the Court’s decision).

O le itu mulimuli o le talosaga, o le taofia lea o le faatinoina o le faaiuga o le Faamasinoga o Faigapalota, se’ia ma’ea lelei le mataupu (notice of stay of judgement).

I lea lava faaiuga e pei ona lomiaina atu i luga, o loo tōfiaina ai e le Faamasinoga Maualuga se alii Faamasino mai Niu Sila e na te taitaia taualumaga o le talosaga toe iloilo.

O le afioga ia Justice Rhys Harrison, lea ua tuuina mai e na te iloiloina talosaga a Toelupe ua i luma nei o le Faamasinoga Maualuga.

Afioga i le Faamasino Sili ma Justice Rhys Harrison o Niu Sila.

Peitai, o le filifilia ai o Justice Rhys Harrison, o loo faatinoina lava e le afioga i le Faamasino Sili o ia o le faauluuluga o le Faamasinoga o Samoa.

Ae ona o le faaiuga o loo fia toe iloiloina, o se faaiuga a le afioga i le Faamasino Sili, lea ua toe talosagaina ai e Toelupe e ala atu i ana loia, ina ia fili faatasi ni afioga i Faamasino, e taitaia le mataupu.

Ona o le tāua o le aloese mai i le toe upuia o le Faamasinoga ae maise o se tulaga e tau femātea’i ai le amiotonu o faaiuga, lea ua toe talosagaina ai le Faamasinoga, ina ia fofogaina lenei mataupu i luma o se saofaiga to’atolu a le Faamasinoga.

I se faamatalaga mai le Itumalo o Falealili 1, o loo latou tapuaia isi laasaga o le Faamasinoga o loo agai atu iai lo latou Sui Faipule, ma e le o toe fia agai le Itumalo i se palota laititi, ae maise o lea ua uumia e lō latou tofi, le Sui Palemia o le atunuu.

I le faaiuga o le faigapalota tele a Samoa ia Aukuso 2025, e 324 palota i le vā o Toelupe ma Tuiloma Lance Lameko.