Tofia Tumanuvao Evile Falefatu ma Faatonu Sili o le Pulega o Malae Vaalele a Samoa

O Tumanuvao sa a’oa’oina mai le Ā’oga Tulagalua a Ga’utavai, Savai’i, ona soso’o ai lea ma le Kolisi o Samoa se’ia o’o atu i le tausaga e 1998.

0
1678

(OFISA O LE SO’O’UPU): Ua fa’amaonia e le Kapeneta i lana Fonotaga i lenei vaiaso, Aso Lulu, 13 Tesema 2023, le tofia o le afioga iā Tumanuvao Evile Falefatu e avea ma Fa’atonu Sili Aoao o le Pulega o Va’alele a Samoa (Samoa Airport Authority) mo le tolu tausaga.

O lea tofiga sa tau’ave e le afioga iā Silimana’i Ueta Solomona, peita’i ua fa’amavae ona o nisi o ona tofiga fou.

O Tumanuvao sa a’oa’oina mai le Ā’oga Tulagalua a Ga’utavai, Savai’i, ona soso’o ai lea ma le Kolisi o Samoa se’ia o’o atu i le tausaga e 1998.

Na ulufale o ia i le Tausaga Fa’avae i le Iunivesite Aoao o Samoa (N.U.S. Foundation), i le mae’a o ana a’oa’oga ma auauna ai i le galuega fa’amisionare / tala’i mo lana Ekalesia a Iesu Keriso o le Au Pa’ia o Aso o Gata Ai mo le 2 tausaga.

Na fa’aauau lona soifua a’oa’oina i le Ā’oga Fa’afoma’i i Fiti mo le 4 tausaga se’ia fa’au’uina mai le tausaga e 2009 i lona Fa’ailoga Tauāloa o le Tikerī Fa’atalavai (Bachelor of Pharmacy).

Na tautua ai mo le Matāgaluega o le Soifua Mālōlōina, mulimuli ane galue ai mo le Pulega o Va’alele a Samoa (S.A.A.) mai le 2013 se’ia o’o mai le taimi nei i lona tofiga o le Ta’ita’i i le Auaunaga Tau i le Puipuiga (Manager for Security Services).

E to’alima i latou sa talosaga, ma ua talia ai e le Kapeneta e tusa o le fautuaga a le Komiti Fa’atonu na Iloiloina ma Fa’atalanoaina lea avanoa, ma fa’amaonia ai le tau’aveina e le afioga iā Tumanuvao o lea tofiga mauāluga a le Mālō.