E toasefulu ma le lua ē ua molia e leoleo i le taimi nei i se faalavelave matuia sa tula’i mai i Lefagaoalii Savaii, lea sa vaaia ai o loo pu’e mai i se ata se tamā matua ua saisai ma tautau i se amo, se’i tulou.
I se tali mai a le Sui Komesina o Leoleo, le afioga ia Papalii Monalisa Tiai-Keti i fesili a le Samoa Global News, sa ia faamaonia ai e 12 ē ua molia mo le taimi nei, e aofia ai ni matai se toaono ma taulelea e toaono foi.
Ua molia uma i latou ma tatalaina i tua e tālia ai le aso e tula’i ai i luma o le Faamasinoga.
Sei vagana ai se toatasi o loo molia ma taofia i Tanumalala, i lona taumafai e faaoo le oti (attempted murder) i lē ua aafia.
“O se sui o le nuu sa ia faaaogaina se mea maai (sharp object) e faaoo ai man’uaga tuga i lē o loo aafia, o loo taofia nei i Tanumalala..”
O le tamā matua sa aafia i lea faalavelave, e 73 tausaga o lona soifua. E le’i faataunuuina le gaioiga a Alii ma Faipule i lea tamā, ina ua toatuli le faifeau EFKS a le afioga o Lefagaoalii ma talosaga e laveai lenei tamā
I se ata video ua salalau nei i luga o upega tafailagi, o loo molimauina ai le taimi na oo atu ai sui o Alii ma Faipule o Lefagaoalii, e saisai mai lē ua oo iai le latou faaiuga, e ave e tao i le umu, sei tulou.
O loo manino i luga o le video ma lagona atu lava se leo o se tasi tamā o loo avaavau ma faapea mai, “kui, kui i le amo.”
Ona vaaia loa lea o loo ua sii mai se tamā e saisai ona lima ma ona vae, ae tautau mai i se amo o loo sii mai e ni taulelea.
“Ua e faamaualuga i le faifeau..”
“Ua e faamaualuga e fai le faifeau o le nuu..”
“O ai oe, lou k*”
“Ave i gakai e pusa le umu e kao ai”
E manino mai i saunoaga o loo lagona atu i le video sa pueina i lea taimi, o loo faatino se faaiuga a Alii ma Faipule a le afioaga e faasaga i lea tamā.
Sa faamaonia mai e le Sui Komesina, o lenei tamā sa aafia, na taofia i le falemai i Tuasivi mo togafitiga, ma faaoo mai ai o ia i le falemai tele i Upolu.
Saunoa Papalii, “E tigaiga man’uaga o le tamā ma o loo taumafai e aumai o ia i le falemai i Motootua nei.”
O loo faagasolo pea suesuega a leoleo i lenei mataupu ae saunoa le Sui Komesina, e ono iai nisi matai o le saofaiga a Alii ma Faipule e molia i lenei mataupu.
O le molimau a nisi o le afioaga sa tuuina mai i le Samoa Global News, o se feeseeseaiga na tula’i mai i le vā o lē ua aafia, ma le faifeau Katoliko a le nuu (Deacon Reverand).
O se tasi molimau, e faapea o le tamā ua aafia, e fai ma malaga o ia i atunuu i fafo. Ae o lona toe foi mai i fanua, sa maua ai ua fai atu le pa meatuāolō a le faifeau i luga o le fanua a lea tamā.
Ina ua vevesi i laua i luga o le mataupu tau fanua, sa felafoa’i ai upu ma faamatalaga, ma palauvale ai lea tamā, agai i le faifeau.”
E le o mautinoa mai i molimau, poo lea fo’i ni upu poo ni gaioiga a le faifeau sa fai ina ua tulai mai le feeseeseaiga.
Sa fono le saofaiga a Alii ma Faipule i lenei mataupu ma tuuina atu ai loa se faaiuga, e faatulai ese ai le tamā lea mai le afioaga.
Ina ua le usitaia e lea tamā le faaiuga a Alii ma Faipule, sa siitia loa i le isi laasaga le faasalaga ua tuuina atu e le afioaga.
O gaioiga sa vaaia o loo faatino i lenei video sa faasalalau, e faapea na tula’i mai ina ua lē usitaia e lea tamā le mua’i faaiuga a le nuu.
Saunoa le molimau, “Sa tuu atu iai le faaiuga, e tula’i ese ae le’i taina le 4 i lena lava afiafi.”
“O le faamaualuga ma le tetee i le faaiuga a le nuu, lea ua mafua ai ona oo atu i lea tulaga le mataupu.”
O lenei video ua soo iai le maimoa a Samoa, o loo iai ni komeni (comments) e lata i le 2,500, ae ua silia foi ma le 5,300 taimi ua share atu ai ma atili ai ona faalauaitele ona faasalalauina i luga o upega tafa’ilagi.
O le nuu o Lefagaoalii e lima faalapotopotoga lotu poo ekalesia o loo faamautuina ai.
O le Ekalesia Faalapotopotoga Kerisiano Samoa (EFKS), o le Ekalesia a Iesu Keriso i Aso na Gata ai (LDS), o le Ekalesia o le Assemblies of God (AOG), le Ekalesia Metotisi, ma le Ekalesia Katoliko lea o loo tā’ua e molimau sa aafia ai le latou faifeau i feeseeseaiga na tula’i mai.
Public Notices
