O lē sa galue o le Pule Sili o le Matagaluega o le Vaa (Samoa Shipping Services) ua fai nei ma sui tauva o le Faatuatua i Le Atua Samoa ua Tasi mo le faigapalota laititi o loo loma nei mo Vaimauga 3, lea ua avanoa ina ua maliu le afioga ia Tapunuu Papaliitele Niko Lee Hang.
O le taeao nei na momoli aloaia ai e nisi o sui o le itumalo o Vaimauga 3 lo latou sui tauva, i le vaega faaupufai o le Faatuatua le Atua i Samoa ua Tasi (Fast).
O le fetalaiga ia Mataiopule Faaniniva, o se matai o le afioaga o Magiagi na fai ma fofoga o le itumalo.
Saunoa Mataiopule, “O le afifio ma tala mai aao o le au fue loloa ma le au tulatoa, o lau sinasina ma le au fai tofa o le itumalo, matou te omai e momoli atu le matou sui i le faigamalo o loo tulai mai i le foe, sei saili se ai o le itumalo, ma lagolago sua i lo outou pito laau aua Samoa.”
Na talifaitau le taitaifono, le afioga ia Laaulialemalietoa Leuatea Polataivao Fosi Schmidt, e fai ma sui o le aiga o le Faatuatua i le Atua Samoa ua Tasi, e faaleo le agaga faafetai i le paia o le itumalo.
“Faafetai pule, o lea lava ua outou faalele la outou lagolago ao faafofoga Samoa, faafetai i la outou tofa faatupu, tofa faatamalii, faafaleupolu, ua outou filifilia ai le faigamalo e momoli mai ai la outou sui faaolioli.”
Na saunoa foi le taitaifono, “Amuia oe Lautimuia, e le tau saili sou ala i Malo, e le tau fofola sou fala, aua na oo lava ou tua’a i le Taitai o le Malo, aea le Sui o le Fono Sui Tofia, le afioga i le Aloalii, Vaai Kolone.”
O le maea ai o saunoaga autu, na maua ai le avanoa e fesiligia ai le tofi faaolioli mo sona finagalo i se vaega e ave iai lana faamuamua.
Na saunoa Lautimuia, pe afai ae manuia, o le a ave lana faamuamua i le unaia lea o avanoa mo pisinisi o lona itumalo.
“E tele auala e mafai ai ona faalautele ma atiinae ai nisi o pisinisi i totonu o le itumalo, aemaise o le sailia lea o nisi avanoa faigaluega mo le fanau.”
Saunoa foi Lautimuia, o le a ave lana faamuamua i alo ma fanau a le itumalo, e fesoasoani atu ai i le itu tau aoaoga.
O le afioga Lautimuia Uelese Vaai, sa tauva muamua i le faigapalota o le 2016 i lalo o le fua o le tutoatasi (independent), ae lei manuia le taumafaiga, ona toe foi lea i le galuega ua loa tausaga o loo tautua ai i le Matagaluega o Auaunaga o Vaa.
I le 2016, e lei tuufaatasia le nuu o Magiagi ma nisi o afioaga e pei ona iai nei le vaevaega fou mo le Vaimauga 3 ina ua oo mai i le faigapalota tele o le 2021.
Ina ua tapenaina le faigapalota o le 2021, sa fesiligia ai Lautimuia i le tausaga 2020 pe le o toe sauni atu i le faamoemoe, ae peitai, na ia tali, o loo tele galuega a le SSS o loo fia faamaea lelei.
O lea la ua oo mai i le 2023, ua talafeagai foi ma le faigapalota laititi, le tulai mai o Lautimuia e fai ma sui tauva.
(3)
