O le vaiaso na te’a nei na saunoa ai le afioga i le Palemia, Susuga Laaulialemalietoa Leuatea Polataivao Fosi Schmidt, i le tatalaina aloaia ai fuafuaga tetele a le Matagaluega o Faamasinoga ma Mataupu tau Faamasinoga.
1. Fuafuaga a le Vaega Mā’oti a le Tulafono ma le Amiotonu 2026 – 2031
O le Fuafuaga a le Vaega Mā’oti a le Tulafono ma le Amiotonu 2026 – 2031, ua tu’ufa’atasia ai le va’aiga autasi a lenei vaega mā’oti a le tatou Mālō, ua folasia mai ai sini ma taunu’uga o lo’o tatou galulue fa’atasi e ausia.
O le ā avea lea ma fa’afanua mo galuega ma auaunaga e fa’amalosia ai le puipuiga o le saogālēmū, le fa’atinoga o le amiotonu, ina ia tatou maua se Samoa ola fiafia ma saogālēmū.
2. Fuafuaga Autasi a le Matāgaluega o Fa’amasinoga ma le Fa’afoeina o Tulaga Tau Fa’amasinoga 2026 – 2031
O le Fuafuaga Autasi a le Matāgaluega o Fa’amasinoga ma le Fa’afoeina o Tulaga Tau Fa’amasinoga 2026 – 2031, o le ā fesoasoani e fa’aleleia atili ai auaunaga a le Matāgaluega o Fa’amasinoga, ina ia lelei le fa’atinoga o galuega, malosi le pulega, ma mauāluga le tulaga o auaunaga mo tagata lautele.
3. Faiga Fa’avae mo Fesoasoani Fa’ale-Tulafono 2026 – 2031
Saunoa le Palemia, o se ulua’i taimi lenei ua fa’ata’oto ai e le tatou Mālō se Faiga Fa’avae mo Fesoasoani Fa’ale-Tulafono 2026 – 2031, auā o lo’o fa’amamafaina ai le aiātatau a tagata uma e maua ai fesoasoani fa’aletulafono talafeagai, aemaise lava i latou o lo’o feagai ma lu’itau tau tupe po’o isi tulaga e faigatā ai ona maua fautuaga ma fesoasoani fa’aletulafono.
“O lea ua fa’ata’oto mai i lenei Faiga Fa’avae le alafua e fa’atonutonu folau ai le fa’aāogaina ma le tatau o le fesoasoani lenei a le Mālō i matā’upu fa’aletulafono, aemaise matā’upu e a’afia ai le atunu’u i ni soligātulafono i luma o le Fa’amasinoga..
“O le ‘upu moni o le agaga tonu o lenei Faiga Fa’avae ma lenei fesoasoani a le Mālō, o le fesoasoani ofoina atu mo le mamalu o le atunu’u ua a’afia i ni soligātulafono, ae ua lē gafatia le totogiina o loia. Ma ua fuafua lenei Faiga Fa’avae mo i latou tonu o lo’o mo’omia le fesoasoani.”
E le Aofia ai Moliaga mai Fualaau Faasaina
E le’o aofia i lenei Faiga Fa’avae le tu’uina atu o ni fesoasoani mo i latou o lo’o molia mai fuālā’au ma lā’au fa’asāina.
Saunoa le Palemia, o le silasila a le Mālō, ina ia ‘aua ne’i fa’aāogaina sesē [abuse] lenei fesoasoani a le Mālō, e fa’atuputupula’ia ai pea le au solitulafono i fuālā’au ma lā’au fa’asāina.
“O lea e taumafai atu le Mālō e tineia lenei fa’afitauli ua sasao fa’aafi i totonu o le atunu’u.”
Sauaga i Totonu o Aiga
O lea fo’i ua fa’alautele atu lenei fesoasoani a le Mālō, i le mamalu o le atunu’u o lo’o a’afia i sauaga i totonu o ‘āiga.
“O le tulaga sa i ai, sa le’i mafai ona aofia i latou nei i lenei fesoasoani. Ae o se tasi lea fa’amuamua a le Mālō, o le tu’uina atu o fesoasoani talafeagai i ai latou o lo’o pito sili ona a’afia [victims] ona o sauaga e tula’i mai i totonu o ‘āiga..”
Saunoa Laaulialemalietoa, e le gata i a’i latou o a’afia, ae o le ā aofia ai fo’i i lenei Faiga Fa’avae polokalame talafeagai e mafai ai ona toe fuata’i i latou ua a’afia mai i moliaga ona o sauaga i totonu o ‘āiga.
“O le tiute faifa’atasi lea a le tatou Mālō, o le Fa’amasinoga, o i latou o lo’o ofoina mai le fesoasoani i le fa’atinoina o nei polokalame, ma le mamalu lautele o le atunu’u i Ali’i ma Faipule, Ekalesia ma so’o se tagatānu’u o Samoa.”
“O le galulue so’oso’otau’au lea i tineia nei fa’afitauli o lo’o tutupu mai pea i totonu o si o tatou atunu’u, e le gata i fuālā’au ma lā’au fa’asāina, ae o sauga i totonu o ‘āiga, nu’u ma ekalesia..”
Saunoa le Palemia, e iai fo’i le fa’amoemoe i le lumana’i mo lenei fesoasoani, e fa’alautele atu i le mamalu o le atunu’u ua sa’ili fesoasoani i matā’upu tau i le Fa’amasinoga o Fanua ma Suafa i le Fa’amasinoga Sili a le atunu’u.
“E lē na ma le lāina, so’o se Samoa e aga’i i le Fa’amasinoga o Fanua ma Suafa, ona o fa’asinomaga ma measina a si o tatou atunu’u..
“Ma ua le gata nei finauga i le Fa’amasinoga o Fanua ma Suafa, ae ua o’o atu lava i le Fa’amasinoga Sili a le atunu’u. Ma e tatau ai i le Mālō ona silasila ia mafai ona ofoina atu se fesoasoani mo nai o tatou tagata e le gafatiaina le totogiina o ni loia e tau’ave a latou matā’upu tau fanua ma suafa i le Fa’amasinoga Sili a le atunu’u.”
“O le saogālēmū ma le maua’a o tagata lautele, maua avanoa o tagata uma i le amiotonu, malupuipuia le atunu’u ma le pule a le Tulafono, o taunu’uga fuafuaina ‘autū ia a le Vaega Mā’oti fa’apea fo’i le Matāgaluega o Fa’amasinoga ma le Fa’afoeina o Tulaga Tau Fa’amasinoga.”
“O ā tatou atina’e mo le manuia lautele ma le tamāo’āiga e fa’amoemoe i ala o le Tulafono ma le amiotonu e lelei fa’atino ma āoga. Na te fa’atumauina le pule a le Tulafono, tatala avanoa mo le amiotonu, ma mautinoa ai le malupuipuia o le atunu’u, fa’apea le malupuipuia ma le saogālēmū o le atunu’u lautele.”
“O le tāua lea o nei galuega ua tino mai, ina ia mautinoa ua fa’ata’oto ālafua e ao ona mulimulita’ia lona fa’atinoina. O le galulue so’oso’o tau’au o pa’aga uma o le ki lea i le manuia o nei taumafaiga.”
“Ia avea nei Fuafuaga ma fa’avae malosi mo se Samoa e sili atu ona saogālēmū, maua fa’amasino tonu ma le amiotonu, ia mautinoa e maua e tagata uma avanoa tutusa i le puipuiga ma le fa’atinoga o le Tulafono, ma ia tatou tau fai maua se Samoa e ola fiafia ona tagata.”
Ata Pu’eina: Mālō o Samoa [Leota Marc Membrere].
