E $17 miliona le tauaofa’i o le galuega e fausia ai le maota o le Faamasinoga ma le Matagaluega o Faamasinoga ma Mataupu Taufaamasinoga i Salelologa Savaii.
Saunoa le Ofisa Sili o le Matagaluega, le afioga ia Papalii John Taimalemalelagi, e tolu vaega tetele ua vaevaeina iai le galuega.
“O le vaega muamua o le fausia o fale faamasino mo le Faamasinoga Maualuga, Faamasinoga Faaitumalo ma le Faamasinoga o Fanua ma Suafa faapea ai ma le auaunaga a le faamasinoga i ona vaega eseese..
“O le fausia o lea vaega o loo nafa ma le Kamupani a le Ah Liki Construction ma e $12 miliona tala lona faatupega atoa.”
O le vaega lona lua, e pei ona auiliili mai e Papalii, o le fausia lea o le apitaga e faamautu iai afioga i Faamasino pe a malaga atu e faatino mataupu i Salafai.
“O le fausia o lea apitaga o le a nafa ma le kamupani a le New Era Construction Ltd lea e $2 miliona tala lona faatupega.”
O le New Era Construction o se kamupani ei Falelauniu lo latou Ofisa, ma o le Susuga ia Li Shaodong le Faatonu o lea auaunaga.
O le vaega mulimuli o le faalaugatasia atoa o le fanua ma le fausia o le pa e si’o atoa ai le lotoa e aofia ai ma togalaau e faamatagofie ai lea nofoaga.
O lea galuega o le a nafa ma le kamupani a le Apia Lua Ltd ma e $3 miliona lona faatupega.
O le Apia Lua Ltd o se kamupani e faavaeina i Salafai, e taitaia e le afioga ia Lealaitafea Leatigaga Peni.
Saunoa Papalii, “O le tauaofai o lea galuega e $17 miliona tala ma o loo faatupe lava e le Malo o Samoa.”
Na saunoa le taitai o le malo le Susuga ia Laaulialemalietoa Leuatea Polataivao Fosi Schmidt ua o gatasi le fuafuaga a le Malo ma le finagalo o le afioga i le Faamasino Sili.
“O a uma mataupu tau i le faamasinoga e fitoitonu i Savaii, o le a faatino uma i Savaii e aunoa ma le toe tau malaga mai i Mulinui o le mamalu o le atuuu o loo aumau i Savaii..”
Faaalia e le Afioga i le Palemia o le a faatotoga lelei lea galuega pe a mae’a i lona tulaga maualuga ina ia lelei atoatoa maota ma meafaigaluega e faatino ai auaunaga uma.
O lea galuega ua fuafua e mae’a uma vaega tetele e tolu i le masina o Ianuari o le tausaga 2028.
- Government to Reinstate Samoa’s Two Urban Seats in Parliament - October 11, 2026
- $17 Miliona le Tauaofai o le Galuega e Fausia ai le Fale Faamasino i Salelologa Savaii - October 5, 2026
- Falepuipui mo le 6 Tausaga ma le 6 Masina i le Faiaiga Faamalosi - October 3, 2026
