TEUTEUGA O POLOAIGA MO FAALAVELAVE TUTUPU FAAFUASEI MO LE FAAMA’I O LE COVID19 (30 Iulai 2021).
Fa’aauauina o le Poloaiga mo Faalavelave Tutupu Faafuasei mo le Faama’i o le COVID19 (Extension of State of Emergency Order for COVID19)
I lana Fonotaga FK(21)Faapitoa 23 o le Aso Faraile, 30 Iulai 2021 na talanoaina ai e le Kapeneta le Pepa PK(21)544 ma faamaonia ai e faapea:
- Le Fa’aauauina o le Piliota mo Fa’aaliga Faasalalau o Faalavelave Tutupu Faafuasei mo le Covid19 (Extension of Proclamation for Covid19) mai le Aso 2 Aokuso 2021 seia aulia le Aso 29 Aokuso 2021;
- Le Fa’aauauina o le Poloaiga mo Faalavelave Tutupu Faafuasei ma ona teuteuga mo le Covid19 (Extension of State of Emergency Order for Covid19) mai le Aso 2 Aokuso 2021 seia aulia le Aso 29 Aokuso 2021.
Le amata faamamaluina o le fa’aauauina o le Piliota mo Fa’aaliga Faasalalau o Faalavelave Tutupu Faafuasei (Extension of Proclamation for State of Emergency) faapea le Poloaiga mo Faalavelave Tutupu Faafuasei ma ona teuteuga mo le Covid19 mai le Aso 2 Aokuso 2021 seia aulia le Aso 29 Aokuso 2021 ma toe iloilo ai e le Kapeneta.
O lenei faaiuga na faia i lona tulaga faanatinati e tusa ai ma le Vaega 38(1)© o le Faavae o le Malo Tutoatasi o Samoa.
TEUTEUGA O POLOAIGA MO FAALAVELAVE TUTUPU FAAFUASEI MO LE FAAMA’I O LE COVID19
I lana Fonotaga FK(21)Faapitoa 23 o le Aso Faraile 30 Iulai 2021, na talanoaina ai e le Kapeneta le Pepa PK(21)549 ma faamaonia ai Teuteuga o le Poloaiga mo Faalavelave Tutupu Faafuasei mo le faama’i o le Covid19 e pei ona taua i lalo:
1. FEMALAGAIGA FAAVAOMALO A VAALELE MA VAA A LALO
Le feutaga’i ma Amerika Samoa e faatulaga ni malaga fa’aauau i le va o Apia ma Pagopago i Amerika Samoa i Aso talafeagai i vaiaso taitasi e fa’aaogaina ai vaalele a le Samoa Airways ma le Talofa Airways mo tagata femalaga’i;
Ia mata’itu pea aiaiga faasoifua maloloina o tagata malaga uma a’o le’i tuua le atunuu mo le puipuiga lautele;
Le aofia ai i faatalanoaga tulaga o pemita mo le femalaga’i atu mai Samoa nei i Amerika Samoa ma le fa’aaogaina o vaa-a-lalo e femalaga’i atu ai mai Apia i Pagopago.
2. TAPENAGA MO SE FAIGA PAAGA O FAIGAMALAGA MA NIU SILA (TRAVEL BUBBLE)
Le feutaga’i ma le Malo o Niu Sila mo le faamautuina o aiaiga talafeagai uma e ao ona malilie iai atunuu e lua mo le toe tatalaina o faigamalaga (travel bubble) i le va o Samoa ma Niu Sila. E taoto atu i le Matagaluega o le Va-i-Fafo ma Fefaatauaiga e amata nei feutaga’iga.
3. TAELEGA I MATAFAGA MA VAITAFE I ASO SA
Le tatalaina o taelega ma malologa i matafaga ma vaitafe i Aso Sa mai le 12:00 i le aoauli.
4. PASI MA TAAVALE LA’UPASESE
Le tatalaina o le feoa’i o pasi o vaa i le Aso Sa i taimi masani.
5. FEMALAGAIGA A VAA I LE VA O UPOLU MA SAVAII I LE ASO SA
Le tatalaina o malaga masani i le va o Upolu ma Savaii i Aso Sa i taimi e masani ona faatulaga ai.
6. MAKETI, FALEOLOA, SUPAMAKETI MA PISINISI
Le tatalaina o maketi i Savalalo, Fugalei, Salelologa, Vaitele, Taufusi ma Afega, maketi o i’a ma isi ituaiga maketi i le Aso Sa mai le 4:00 i le vaveao i le 9:00 i le taeao;
Le tatalaina o supamaketi i le Aso Sa mai le 12:00 i le aoauli i le 10:00 i le po;
Le tatalaina o pamu penisini i le Aso Sa mai le 12:00 i le aoauli i le 10:00 i le po;
Le tatalaina o fale talavai i le Aso Sa mai le 12:00 i le aoauli i le 10:00 i le po;
Le tatalaina o sailigatupe (fundraising) i falekalapu ae ia tausisia pea itula e tapunia aloaia ai i le 11:00 i le po.
7. FAATAU OLOA I MAGĀALA MA TAFĀALA
Le faatagaina o le faatau savali o oloa i le taulaga i Apia ae lē faatagaina tamaiti e i lalo ifo o le 16 tausaga le matutua ona faatinoina lea tulaga.
Le amata faamamaluina o nei suiga i le Aso Gafua, 2 Aokuso 2021 seia toe iai se isi fa’aaliga.
E faatumauina pea isi aiaiga o Poloaiga o Faalavelave Tutupu Faafuase’i na mua’i tuuina atu.
O lenei faaiuga na faia i lona tulaga faanatinati e tusa ai ma le Vaega 38(1)© o le Faavae o le Malo Tutoatasi o Samoa.
