Tatala le Faleeletise e Alu i le Suavai, Palauli

O le fa’aitiiti o le suau’u kiso e fa’aaogaina i le tausaga o le a fa’aititia ai i le 450 tone le aofa’i o le kasa oona o le kapone poo le carbon dioxide e fa’aaluina atu i le siosiomaga mai i le Faleeletise kiso i Salelologa.

0
83

Susu lau susuga i le Taitai o le Sauniga lau Susuga Siaosi Leleimalefaga
Lau Afioga i le Sui Palemia,
Lau Afioga i le Minisita o Galuega, Felauaiga ma Atinae Tetele,
Minisita o le Kapeneta.
Minisita Lagolago
Sui o Malo mai fafo, Faapotopotoga Faava o Malo,
Faauluuluga o Matagaluega ma Faalapotopotoga a le Malo
Alii ma Faipule o Vailoa
Le Paia aua le Afio o le Faasisina
Aloalii ma le Fofoga o Sa Lilomaiava
Le Mamalu i le Faleao, Saoletaulua ma upu ia te oe Palauli

Ua tatou potopoto i le asō e molimauina le tatala aloaiaina o le Faleeletise fou lenei e alu i le suavai ua fausia i VAILOA nei ina ua tuanai le tele o tausaga o taumafai lo tatou Malo ina ia atina’e malosiaga faafouina i le motu o Savaii. O le Faleeletise muamua la lenei e alu i le suavai ua mafai ona fausia i le motu o Savaii. O se fiafiaga tele lea i le tatou Malo aemaise o lo tatou motu o Savaii. Aua ua taunuu i le asō se tasi o anavatau o lo o faavae ai le Faigamalo lenei “o le mea e lelei mo Upolu, e lelei foi mo Savaii”. Auā ua fitu (7) Faleeletise e alu i le suavai ua maea ona fausiaina i Upolu. A o lea faatoa mafai ona fai se Faleeletise e alu i le suavai i Savaii mei, e ui ina laititi. Ae itiiti a le alamea..

O lenei Poloketi o se tasi lea o Fuafuaga a le tatou Malo mo le 100% o Malosiaga faafouina e gaosi ai le eletise ina ia matua’i ave esea lo tatou faalagolago i le suauu mai fafo ma faaitiitia ai le kasa oona o le kapone.

O lenei Polokalame mo le Atinaeina o Malosiaga Faafouina e aofia ai Faleeletise e alu i le suavai fou e tolu ma le toe faaleleia o Faleeletise e alu i le suavai na faaleagaina i lologa i Vaisigano i le Afa o Eveni i le 2012 i Upolu.

O lenei Poloketi o se tasi o Poloketi e tele o lo o faatupeina e tupe faameaalofa mai le Faletupe o Atinae o Asia (ADB) i lalo o le Clean Energy Fund, Iuni o Europa, Malo o Niu Sila, Malo o Samoa ma le Faalapotopotoga o Malosiaga Faaeletise.

Sa manumalo le kamupani o le PERNIX GROUP and MAP PROJECT Joint Venture atoa ai ma kamupani feasoasoani po’o subcontractors, e i ai le Bluebird Construction Ltd, Vortex Hydro Group, MTL Design Ltd, Maskell Production Ltd mai Niu Sila ma Gabot Holding Communications mai Samoa.

O le tau atoa o lenei galuega e tusa ma le $1,736,919.68 Tala Amerika ma le $873,149.56 Tala Samoa.

E tusa ma le 200 kilouati i le fua faaeletise le malosi o lenei Faleeletise. E tusa lea ma le 500,000 iunite o le eletise o le a gaosia mai ai i le tausaga tusa lea ma le 4% pasene o le aofai o le eletise atoa e mana’omia e Savaii i le tausaga.

E 167,000 lita le aofa’i o le suau’u kiso o le a fa’aititia i le tausaga e gaosia ai le eletise i Savaii, tusa lea ma le $526,000 Tala Samoa i le tausaga o le ā fa’asaoina ma o se sao taua tele lea i le tu’uitiitia o le tau mo le gaosiga o le eletise.

O le fa’aitiiti o le suau’u kiso e fa’aaogaina i le tausaga o le a fa’aititia ai i le 450 tone le aofa’i o le kasa oona o le kapone poo le carbon dioxide e fa’aaluina atu i le siosiomaga mai i le Faleeletise kiso i Salelologa. Ma o le sao lea o tatou iinei i Savaii i le fa’aitiitia o le kasa oona o lo o mafua ai le vevela ma mafua ai suiga tetele o le tau o le lalolagi ua tatou pagatia ai nei fa’apea atunuu uma o le lalolagi. E ao ina ia tatou mulimulita’i ma tausisia tuutuuga o feagaiga fa’ava o malo o le lalolagi o lo o avea ai Samoa ma sui auai, ma o le tatou sao taua foi lea mo se lumanai manuia mo augatupulaga e fai mai, i tausaga oi luma.

O le Faleeletise fou lenei e fa’aaogina ai le suavai e ta’i mai i paipa tetele e tanumia i le palapala mai le vaitafe o Faleata i totonu o Vailoa. O le vaitafe fo’i lea o lo’o fa’aogaina e le Fa’alapotopotoga o le Suavai, Samoa Water Authority, e ta’i mai ai le suavai i le nofoaga po’o le Water Treatment Plant e fa’amama ma fa’availauina ai ae lei faaaluina atu i paipa mo le vaitaumafa i Vailoa nei ma nu’u tuaoi fa’apea Fa’asaleleaga atoa e o’o atu i Tuasivi. O le fauina la o le Faleeletise fou lenei, ua faaaogaina ai le suavai lava lea e tasi e gaosi muamua ai le eletise ona tuuina atu lea i faatanoa a le Pulega o le Suavai (SWA) mo le vai taumafa. Aepeitai o lo o faatumauina pea le paipa tuai a le Pulega o le Suavai o lo o i ai i le taimi nei mo le faaleoleo, pe a fai e moomia i se taimi e faaletonu ai le EPC. E moomia ai le galulue soosootauau o Faalapotopotoga nei e lua a le Malo ina ia faaaoga tatau le suavai ina ia mafai ona faamalieina uma auaunaga nei e lua o le eletise ma le fofoga taumafa i taimi uma.

O totonu foi o le Faleeletise lenei o lo o faapipii ai masini ma ki e fa’afesootai atu ai le eletise i laina eletise malolosi ma tata’i atu ai le eletise i le mamalu o le atunu’u amata mai lava i Vailoa ma fa’asoasoa i le itu o Salega e oo atu i Salelologa ma Asau. O le a mafai ona ola ai pe tusa ma le 800 le aofai o aiga i Savaii nei i le eletise o le a maua mai i lenei Faleeletise fou.

O le nofoaga fa’atonutonu po’o le Mini National Control Centre i Salelologa faapea foi le nofoaga autu o le National Control Center i Fulusou o loo faatonutonu mai ai lenei Faleeletise e aunoa ma se tagata faigaluega e moomia e nofo ai faasoloatoa.

E fia faailoa ma amanaia ma le agaga fa’afetai galuega lelei a le konekarate autu o lenei Poloketi; o Pernix Group MAP Projects Joint Venture atoa ma kamupani na feasoasoani iai o le Bluebird Construction, Vortex Hydro, MTL Design Ltd, Maskell Production ma Gabot Holding Communication.

E silisili lava le faafetai a le Malo i Alii ma Faipule o le afioaga o Vailoa, ona o lo outou lagolago sua i lenei Poloketi taua tele a lo tatou Malo aua se manuia o lo tatou motu i Savaii. Na amata mai lava i le 2010 e oo mai i le taimi nei o outou galulue pea ma le EPC aemaise foi le Pulega o le Suavai. Ua tigi pao le uto e pei o le faiva o Tapalega. Ua taunuu le faamoemoe sa faupo fauao. E le gata i lea ae fia faafetaia foi aiga e 15 o le tatou nuu nei ona o lo outou malilie atoatoa e toina ni nai vaega o outou fanua faaleaganuu i le Malo aua lenei atinae taua mo le manuia o isi aiga o le motu i Savaii nei.

O le feau faamanatu foi lea mo isi afioaga ma alalafaga o lo o tetee pea i taumafaiga a lo tatou Malo. E ui o loo i le tatou Malo le malosiaga i lalo o le Tulafono e ave ai fanua faaleaganuu mo atinae mo le manuia lautele o tagata uma. Ae o lo o tatalo atu pea le Malo ina ia tatou galulue faatasi aua se manuia o Samoa. O le atunuu na saili e o outou tuaau ma matua. E faalagolago ia i tatou lava.

O lo o faagasolo mai le toe faataina o le auala galue atoa ai ma le faaleleia o moli auala i totonu o le tatou nuu o Vailoa.

E momoli le faafetai tele i a tatou paaga tau atinae, le Faletupe o Atinae o Asia, le Iuni o Europa, ma le Malo o Niu Sila mo le faatupeina o nei poloketi ma le lagolagosua faifaipea mo le atinaeina o Samoa. Ia faamanuia tele le Atua i la outou lagolago, ina ia mafai ona fa’aauau pea le faigapaaga ma Samoa i a tatou atina’e o malosiaga fa’afouina, a’o fa’aauauina pea le luitauina o le tatou Pasefika, i suiga o le tau.

E fia faafetaia foi le afioga ile Minisita o Galuega, Fela’ua’iga ma Atinae tetele, le Taitaifono ma le Komiti Faatonu, Pulega ma le aufaigaluega a le Faalapotopotoga Malosi Faaeletise, mo le atinaeina ma le siitia o le auaunaga o le eletise i si o tatou atunuu.

Ou te faasilasila atu, ua aloaia nei le faaolaina o a tatou fale afi vai fou i Vailoa..

SOIFUA MA IA MANUIA!