O le vaiaso nei sa iloilo ai e le Faamasinoga Maualuga o Fanua ma Suafa se talosaga a le afioaga o Leauvaa, ina toe iloilo le faaiuga o le 2024, lea sa poloaia ai le tula’i ese o aiga e toa 18 o loo nofoia eleele o Afega, lea e i tua atu o le 723 eka o le faatafāfā sa foa’i mo Leauvaa.
O le folasaga a le afioaga o Leauvaa sa finauina e le tamaitai loia ia Sala Josephine Stowers ma le afioga ia Tuala Teleá.
Mau a le Afioaga o Leauvaa
E tolu vaega o loo fua iai le mau a Leauvaa, e ao ona silasila iai le faamasinoga ma talia ai le latou talosaga e toe iloilo le poloaiga a le Sui Peresetene o le Faamasinoga o Fanua ma Suafa ia Afamasaga Michael Soonalole.
O Tesema 2024 sa tuuina mai ai se poloaiga e faatulai ese ai aiga e 18 o loo nonofo i eleele i tua atu o le 723 eka ua maea faia iai faaiuga a le Faamasinoga o Fanua ma Suafa talu mai le tausaga e 1952 ma faamaonia ai o fanua o Afega.
“Lau afioga o ia vaega e tolu e aofia ai aafiaga lautele o tagata ma aiga o loo nofoia eleele, faapea ma aafiaga o le aganuu..
E le gata i lea ae na saunoa foi Salā, o loo iai se faaiuga talosaga toe iloilo i le masina o Tesema i le tausaga e 2017 na manino ai e lē tula’i ese aiga Leauvaa o loo nonofo i eleele i tua atu o le 723 eka.
Ae saunoa Tuala Tele’a o lea mataupu ua aafia ai le nofo filemu o afioaga e lua.
“Lau afioga, o lea ua vevesi nei i fanua ae o le fesili e tatau ona fesili ai, o ai e pule i fanua o loo vevesi ai nei?..
“O lo’u talitonuga ma lo’u iloa, o le pule o fanua o Malietoa, ae o Alii ma Faipule o Afega ua na o le pule faamalumalu..”
O le talitonuga o Tuala Tele’a, e ese le fa’avae, ese le pule faamalumalu.
“O Alii ma Faipule o Afega ua na o se pule faamalumalu, ae o Malietoa o ia o le pule faavae.”
O le talosaga a le itu tagi poo le afioaga o Leauvaa e tatau e le Faamasinoga ona talia le latou talosaga e toe iloilo ai le faaiuga a le Sui Peresitene o Fanua ma Suafa ia Afamasaga Michael Soonalole i le tausaga e 2024 lea na poloaia ai le faatulai ese o aiga e 18, ona o lena gaoioga o le a aafia ai tagata lautele.
Mau a le afioaga o Afega
Ae i le tali ane a le itu tetee sa tula’i ai le tamaitai loia ia Maposua Tanya Toailoa, faapea le Susuga ia Maulolo Tavita Amosa ma le Afioga ia Ututaaloga Charlie Ulia.
Saunoa Maposua “sa tatau i Alii ma Faipule o Leauvaa na o latou finauina le mataupu lea poo ai e pule i eleele i le faamasinoga i le tausaga 1952, ma o lena faamasinoga na aumai ai le faaiuga, o Alii ma Faipule o Afega e pule i fanua.”
Tā’ua foi e le tamaitai loia, e leai ni tagata lautele o aafia, e pau lava tagata o loo aafia e na o tagata o Afega ma Leauva.
Na tula’i foi Maulolo Tavita Amosa ma faamanino i le faamasinoga le mafuaaga ua ala ai ona finau Alii ma Faipule o Afega e faatulai ese aiga Leauvaa.
“Lau afioga e le’i iai se finagalo o Afega e faatulai ese aiga o loo nonofo i tua atu o le 723 eka, peitai, o upu na lalafo e nisi o matai o Leauvaa i le faamasinoga o le 2013 lea na o latou faapea ai, e leai se pule a Fata ma Maulolo i eleele..
“Sa latou faapea mai, e pau le pule a Fata ma Maulolo o loo iai na o le pule fia faimea, pule faomea ma le pule fia’ai..”
“O lea la lau afioga, o le mafuaaga tonu lava lea na afua ai loa ona matou finau e faatula’i ese aiga nei..
“E e logomalie ia lafoga, ao se isi foi se’i fai ane i matai na lafo ia upu, ae leai ua lafo lava faamatalaga, lea la na faimai ai loa Alii ma Faipule o Afega, e aveese loa.”
Sa fesiligia e le tamaitai loia Maulolo pe le iai se naunautaiga e faia se feiloaiga ma faalelei le mataupu, peitai ma saunoa Maulolo..
“Lau afioga e fā (4) avanoa na tuu iai e feiloai, ma o ia foi avanoa na aumai e le Faamasinoga. Peitai e lei talia e Leauvaa, o lea lā lau afioga ia seiloga e toe fesili i toeaiina.”
O le finauga a Afega, ia teena ma faaleaogaina le talosaga toe iloilo a Leauvaa ona ua maea ona faia faaiuga a le Faamasinoga o Fanua ma Suafa mai lava i le tausaga e 1952 seia oo mai i le tausaga e 2023.
O le mau a Maulolo, o loo manino faaiuga a le Faamasinoga, o eleele i tua atu o le 723 eka, e pulea e Alii ma Faipule o Afega.
O le Aso 26 o le masina lenei o le a tuu mai ai le faaiuga a le tamaitai faamasino ia Alalatoa Rosella Papalii, pe talia le talosaga toe iloilo a Allii ma Faipule o Leauvaa.
Vacancy Notice at nbs
- Tālia se Ta’otoga Fa’apitoa i le Tino Maliu o Maddy, e Faamautinoa ai le Mafuaaga o lona Maliu - September 9, 2026
- Fa‘amalolo Tumau Leoleo Falepuipui e To‘alua ma le Tagata Faigaluega Savili e Toatasi ua Faamaonia le Fa‘aaogāina o Fualaau Fa‘asāina - September 8, 2026
- Two Prison Officers and Civilian Employee Fired Over Positive Drug Tests - September 8, 2026
