Faa-Samoa

Taliaina e le Kapeneta le Faamavaega a le Pule Sili o le Matāgaluega o Tinā ma Tamaitai

"E iai taiala e process ai le faatinoina ma mulimulita'ia ona faatoa mafai lea ona saini le Ofisa Sili, peitai, e le’i ūia ia auala."

Ganasavea Manuia Tafeaga

September 28, 2023

12125

Aso Tofi 28 Setema 2023, Apia Samoa. Ua talia e le Kapeneta le faamavaega a le Ofisa Sili o Tina ma Tamaitai, Alafesootaiga Atinae o Afioaga ma Agafesootai.

O le fonotaga o le aso ananafi sa taliaina ai e le Kapeneta le faamavaega a le Susuga ia Dr Mema Motusaga, lea sa filifilia ma tofia ia Mati 2022 e na te taitaia le Matagaluega.

Na faamaonia mai e le Taitaifono a le Komisi e Pulea Tagata Faigaluega a le Malo, le afioga ia Nonu Saleimoa Vaai, le faatautaia ai lea o se suesuega a le Matagaluega i nisi o gaioiga a lē sa avea ma Pule Sili.

I se molimau faamoemoeina, na ia faailoa ai, o le mafuaaga o le suesuega, ona ua le mulimulita’ia e le Ofisa Sili ni taiala a le Matagaluega faapea le Malō, e faatino ai fefaatauaiga (procurement) ae maise o le totogiina atu o tupe e faatino ai polokalame a le Matagaluega.

“O se seleni tupe na sainia e le Ofisa Sili sa faamatuu atu ai peimeni (payment) i se faletalimalo sa launch ai se tasi o polokalame a le Matagaluega o Tina ma Tamaitai Nuu ma Agafesootai..”

“E iai taiala e process ai le faatinoina ma mulimulita’ia ona faatoa mafai lea ona saini le Ofisa Sili, peitai, e le’i ūia ia auala.”

E le’i manuia le taumafai atu mo se finagalo mai ia Dr Mema Motusaga.

E lē o maua mai fo’i se tali i le Komesina o le Komisi o Galuega, poo lea le faaiuga o le suesuega sa faatino.

Ua 18 masina o galue Dr Mema e taitaia le Matagaluega, mai ia Mati 2022, ae o tausaga ua tuanai sa galue ai o sē e iai tomai faapitoa – Samoa Gender Programme Specialist i totonu lava o le Matāgaluega.

I le filifilia ai o Mema e na te tauaveina le Ofisa Sili, sa faasalalauina ai le tele o vaega sa ia agavaa ai, e aofia ai tupulaga talavou, atiinae o taaloga, gagana ma le atiinae o le aganuu, avanoa tutusa o alii ma tamaitai, sauaga i totonu o aiga, aia tatau, pulega o faiganuu lelei, faapea poloketi faatino.

Ua faamavae le Ofisa Sili ao lumanai ai le ulufale mai o le Minisita fou a le Matagaluega, le afioga ia Mulipola Anarosa Molioo, ae faasee atu le afioga ia Leota Laki Sio Lamositele i le Matagaluega o Pisinisi, Alamanuia ma le Leipa MCIL.