Tali le Peresitene o le Asosi Foma’i i le Minisita o Soifua Maloloina

0
1092

Ua faitau vaiaso nei o faatalanoa le mataupu i le va o le vasega o foma’i o loo galulue i le Matagaluega o le Soifua Maloloina ma le Komisi o Galuega a le Malo (PSC), ma e tele ni itu lelei ua mafai ona soalaupuleina i ni feutanaiga ua maea ona faatino, ae o loo iai foi ma nisi o mataupu e moomia le fia faamalamalama atili, e pei o le mau a nisi o Sui o le Asosi o Fomai (Samoa Medical Association) i se faatalanoaga ma le vasega o tusitala i le Aso Faraile 29 Iuni 2023.

E oo mai i le afiafi o le Aso Farailse o loo tālia e le mamalu o le atunuu, pe taunuu se strike poo se fuafuaga a le vasega o fomai, o le a le toe galulue ovataimi, pe a te’a itula faatulugaina o le 8am – 4pm. Sa faamanino e le Peresitene o le Asosi Fomai, le afioaga Taulealeausumai Dr Titi Lamese, o le a le motusia le auaunaga a fomai, ma ua le taunuu mo le taimi nei lena faamoemoe, ona o le latou silasila alofa i le mamalu o le atunuu.

Peitai ane, sa faaalia se lagona faanoanoa o le Peresitene a le Asosi i ni tuuaiga sa saunoa iai le Afioga i le Minisita o le Soifua Maloloina, Hon. Valasi To’ogamaga Tafito Selesele i le Maota o le Palemene i le afiafi o le Aso Tofi 28 Iuni 2023.

“Ua matou lagona ua matou le malu i matou taitai. Oa galuega lelei a fomai sa fai, ua faaleaga uma lava e Valasi.”

Afioga Valasi To’ogamaga Tafito Selesele Minisita o Soifua Maloloina. Aso 29 June 2023.

Saunoaga a le Minisita i le Maota o le Palemene

I le lauga tali a le afioga i le Minisita i le faasologa o le pasiaina o le Tala Faatatau o le Tupe 2023/24, sa ia afea ai le mataupu o totogi o foma’i ae maise o ovataimi (overtime pay) lea sa fitoi tonu iai faatalanoaga i le va o le PSC ma le aufaigaluega a le Matagaluega o Soifua Maloloina.

I le saunoaga a le Minisita, sa ia ta’ua ai, o le taimi ao tulai mai le National Health Services, sa totogi ovataimi i lalo o aiaiga o le Tulafono – Labour & Employment Relations Act ma le taiala o le NHS Working Conditions e totogi ai ovataimi a le aufaigaluega. Ae peitai o le toe aumaia o tausi soifua ma fomai i lalo o le Matagaluega o Soifua Maloloina, e ese foi le faavaa e faaogaina.

“O lena taimi, e leai se tapulaa e totogi ai le ovataimi a le aufaigaluega, ma o le totogi o ovataimi a le aufaigaluega, sa fua lava i le maualuga o le totogi o le fomai, tausi soifua poo tomai lagolago o le soifua maloloina.”

Saunoa le Minisita, e oo foi i le au faigaluega faakonakarate e sili atu i le 70 afe tala le totogi, e agavaa uma i le ovataimi.

O le mau a le Minisita, e oo atu lava i le $10k sefulu afe i le lua vaiaso le maualuga o le ovataimi e totogi atu i le tagata faigaluega. “O lona uiga e $260,000 faaopoopo iai ma le totogi masani. Afai o se fomai faatoa amata – e $40k afe lona totogi masani, o lona uiga, e uma ane le tausaga, e $300k afe e totogi ai lena fomai Junior.”

Sa tula’i le afioga i le Palemia Hon Fiame Naomi Mataafa e fesoasoani i le mataupu a le Minisita, ma ia taúa ai i le Maota, e oo atu lava i le $400 afe ma le $600 afe le totogi o le tagata e toatasi.

Saunoa le Minisita o Soifua Maloloina, “A vaai faalemafaufau iai, ua matua le talafeagai lava. Ua sili atu ma le totogi o le Ao o le Malo, o le Palemia, o le Kapeneta.. Ao le fesili, o fetaui taimi o talosaga mai ai le aufaigaluega e totogi ovataimi, ma faitioaga a le mamalu o le atunuu?”

Saunoa le Minisita e ona le Matagaluega, “E fiu e faatali, e leai se fomai, e fanau ane lava le tina sei tulou, e lei vaaia e se fomai, ae maise, le tele o gasegase e tuuina atu i fafo… O isi fomai e on-call ae telefoni mai le fale ae le sau e vaai le ma’i.”

I se fuafuaga a fomai e le toe galulue ovataimi ai, ae manava sao loa latou pe a maea sifi masani o le 8am-4pm, sa saunoa ai le Minisita, “O lea ua ou talanoa atu o le Minisita o le Matagaluega, e le faafefea mai le Minisita i na tala ma na upu… afai o faafofoga mai, o lea ua tautala faa sa’o atu Valasi i lana Matagaluega, tuu le mea valea lena aua le faia. Tuu!”

Sa tuuina mai foi e Valasi, o le vasega o fomai, ua latou faapolokiki le mataupu. “Afai foi o iai nisi o sauni, o le polokiki lea e molo mai, talai ou ofu, ae alu e taumafai e run mai e faafaipule..”

I le faatupulaia pea o gasegase ma le faaletonu o le soifua maloloina o le atunuu, sa sunoa ai foi le Minisita e faasaga i le vasega o fomai. “O le fesili, afai e la’u ma’i e tele i fafo, afai e alu i luga le fuainumera o e faamama toto? O lea la le mea e fai?”

Tali le Peresitene o le Asosi o Fomai 

O lenei saunoaga ma nisi o tuuaiga a le Minisita, sa tetee malosi iai le vasega o fomai ma faapea mai ai le Peresitene o le Asosi o Fomai, Taulealeausumai Dr Titi Lamese, e faanoanoa tele ona e le’i iai lava se latou feiloaiga ma le Minisita talu ona tulai mai lenei mataupu.

Peresitene o le Asosi Fomai, Taulealeausumai Dr Titi Lamese, Fri 30 June 2023.

“O le mea muamua lava ou te fia faailoa atu, o le mataupu lenei, e le o se mataupu faapolokiki, ona ua agiga foi i luga o le ea ma nisi o faamatalaga, o se finauga i le va o vaega faaupufai e lua, ae maise foi o le matau mai o si o tatou atunuu i nisi o i matou.. Leai, o le finauga lava o le aiga fomai mo le lelei agai i luma o le aufaigaluega, ae maise lava, i latou totogi ma ovataimi.”

Lona lua i se faamatalaga a le Peresitene, sa ia faapea mai ai, e le’i tagisa fomai i se siitaga o totogi. “Leai. O le tulaga o le toe fetuunaiga o le ovataimi, o le afuaga lena o le mataupu lenei.”

O le mau a le Asosi, o loo taumafai atu e soalaupule i se tulaga e nofo lelei ai le mataupu, ma e moomia se taimi e faamaea lelei ai le nofo malamalama e le gata o le aiga fomai, faapea foi le Pulega o Galuega, ina ia maua se taunuuga lelei.

“Peitai, o le tulaga e faanoanoa ai le Asosi, ua aumai lava i se auala malosi, ma se leo malosi, ina ia vave saini fomai, ma faataunuuina loa i le Aso 1 Iulai, le aso a taeao.”

Saunoa Taulealeausumai, “Matou te talitonu ua fai si vavevave tele o le PSC, ma ua iai foi ma le agaga e taufaafefe mai i le Asosi. Ua iai le gagana ua sau ai ma le leo o le faafefe.”

Sa tali le Peresitene e faaali le lagona faanoanoa o le vasega o fomai i le saunoaga a le Minisita, ma faapea mai ai, ua toe faitio lava ia ia te ia.

“O le ma’ema’ea o le Minisita sa tou faafofoga iai, ma tatou faalogologo iai i le fono usu a Samoa i le aso ananafi, ae maise foi o le silasila i le TV i le po anapo, ia ma se faaopoopo ane foi o le tamaitai Palemia.”

“Ua matua’i lagona lava e le aiga fomai le faanoanoa. Ua tuia o matou loto. Ua le taugamalie le saunoaga a le afioga i le Minisita.”

Saunoa le Peresitene, ua lē malu le aufaigaluega i e ua tofia e taitaia i latou, ma ua manu’a lagona o fomai ma leai foi se aoga o galuega lelei a fomai sa fai i tausaga e fia o le tautua.

“O la’u faalogo, e foliga mai o se Minisita o se isi Matagaluega o loo faitio mai i le galuega a le Matagaluega [Soifua Maloloina]”.

O le mau a le Peresitene, ua taitaiseseina le atunuu i le saunoaga a le Minisita i totogi o fomai. “Lau mai le $200k afe, $300k afe. Mo le silafia, afai e tele faapena le totogi o le fomai, e mafua mai i ovataimi.”

Fesili le Peresitene, “E mafua aisea ona tetele ovataimi?”

“Leaga foi o la e faigaluega i le ao ma le po e faatino le galuega. O loo faigaluega i le ao ma le po e faatino galuega, faafomai. Amuia lava isi Matagaluega, 8 i le 4, manava, malolo. Ae ua tou silafia lava le galuega faafomai, e alu ma le po atoa. Afai la e tetele faapena seleni, sala ina tele. O le taui lena o le tagata o loo galue..”

Le Lava le Aufaigaluega

Saunoa Taulealeausumai, o se feau taua o loo tuuina mai i le tulai mai o lenei faafitauli, o le le lava lea o lea aufaigaluega.

“Aisea ua tetele ai faapea ovataimi?”

“O le tali, e le lava le aufaigaluega, ua faigaluega faasoloatoa ai nisi. Po, ao, po, ao.”

Saunoa le Peresitene i le natura o le galuega faafomai. “Ua tou silafia, a faatiga le tina i le po, sei tulou, o ai e galulue? A iai ni faalavelave tutupu faafuasei, e fai taotoga i le po, ma e ao lava o fai isi taotoga.”

“O le vala lena e ao ona faamalamalama atu, ona ua ta’iga sese le finagalo o le atunuu, ma ua pei ua lafo mai le faasea i fomai, ua na o le tupe tupe tupe lava le naunautaiga.”

Sa tuusa’o mai le finagalo o le Asosi o Fomai, o le matafaioi o le Malo le saili mai o nisi fomai e fesoasoani i alo ma fanau a Samoa o loo galuelue nei.

“Saili mai la nisi fomai poo fea e aumai ai, ina ia faatele fomai, ma mafai ai, ona faataunuu la le fuafuaga lea ua aumai e le PSC..”

Saunoa Taulealeausumai, o lafoga e faanoanoa ai, o le fai mai e tetele totogi, ae leaga galuega o loo faatino. “E tatou te lagona lava le tiga i ia faaupuga. O lou galue galue ae faaleaga mai, e maimau le taimi i na mea tou te faia.”

I le mataupu o le alualu i luga o le numera o gasegase, o ma’i e ave i fafo, ma le faateteleina o mai faamamatoto, sa saunoa iai le Peresitene, o le lelei o le auaunaga a fomai, lea ua maua ai faamaumauga o gasegase eseese i totonu o Samoa, ae le o se leaga o le auaunaga a fomai.

“O le agaga lena ua lagona ai le faanoanoa.”

O le tali a le Peresitene, afai ua tele naua le tupe e alu i ovataimi a fomai. Ona tuu ese loa la o ovataimi, ae manava loa le vasega o fomai ma isi aufaigaluega a le Malo, lea e galulue mai le 8 i le 4 poo le 5.

“Matou te le toe mananao la i le ovataimi. Ae o le a o atu loa la le vasega o fomai, e faigaluega i le 8 e tau i le 4 poo le 8 i le 5, ona o loa lea e malolo ma momoe lelei, pe afai ua tele tele le tupe a Samoa ua alu, ia matou ovataimi. Ia ona tutusa loa lea ma isi tagata faigaluega o le atunuu.”

Sa faaiu le saunoaga a le Peresitene e faapea mai ai, e tele itu lelei o le fetuunaiga ua oo iai faatalanoaga ma le PSC, ma ua maua ai foi nisi o penefiti lelei ua leva ona tatau ona iai. Ae sa tatalo le Peresitene mo le faaauau pea o le faatalatalanoaga.

“O loo iai lava nisi o vaega e moomia ai le faamalamalama atili, ma soalaupule atili, ina ia tulaga lelei ma faamalieina uma itu e lua.. ae tele ia o vaega lelei o loo tulai mai.”

O nisi o itu e le’i mae’a ona faatino, o le faatulagaga o fomai taitasi i o latou totogi e tatau ona iai, pe a fua i le tomai faapitoa, ma le umi o le soifua galue.

“E na o le faaupu mai i luga o pepa, ae le o le totogi lena o loo iai.”

“O nisi fomai o loo i totonu o le service, ua 6 i le 10 tausaga o loo tumau lava i le totogi e tasi, ae ua iu mai ma tikeri ma Masters. O le tatalo a le aiga fomai, faatulaga loa fomai taitasi, i le totogi e tatau ona iai lea fomai ma lea fomai.”

Sa toe saunoa le Peresitene i se faaiuga a le vasega o fomai, ina ua maea se latou fonotaga, o le a faaauau pea le latou auaunaga i itula o le afiafi ma le po, ona e laualuga ia i latou le alolofa i le atunuu.

“Le Paia e o si o tatou atunuu, e lei faigofie ona taunuu le faaiuga a fomai i le tulaga o le a oo iai. Sa fefulifulisa’i ni laau mamafa, sa fetuutuunai ma ni ao, poo fea e mafuli iai finagalo o alii ma tamaitai fomai..leaga o lea ua agiga i luma o Samoa, o le a le toe faigaluega fomai i le po..”

Sa faailoa mai e le Peresitene o le Asosi o Fomai, “e laualuga ia i matou le matou tautoga ma le matou manulauti, e matou te anaana e tautua.”

Sa momoli le faafetai a le Peresitene i le Komisi o Galuega a le Malo, le Faatonu Sili ma le Pulega a le Matagaluega. Sa faamalulu foi le Peresitene i le faafofogaaga a Samoa.

“O le naunautaiga, ia tulaga lelei le galuega mo le lumanai. O le tupulaga lalovaoa o Samoa o loo naunau o fia fomai, e mo i latou.”

“O le matou talitonuga, a lelei faamanuiaga a le galuega, soo se galuega, lelei le siosiomaga e te faigalueaga ai, o le lelei foi lena o lau faigaluega. Ae o le naunautaiga silisili mo i matou, ia manuia gasegase o si o tatou atunuu.”

E tusa ma le 90 ni fomai o loo galulue i le Matagaluega o Soifua Maloloina, ae o le fautuaga a le WHO i se numera pito i lalo, e moomia le 1:1000 – tasi le fomai i le tasi le afe o tagatanuu. O lona uiga, e moomia e le 200,000 o tagatanuu o Samoa, ni fomai se 200.


[starbox]