Faa-Samoa

Tali Atu le Ofisa o le Pulega o Tinei Mu i Afioaga o Savaii, faapea Upolu ma Manono sa Aafia i Galu

January 18, 2022

O se tulaga matautia so oo atu i le atunuu o Toga, ina ua pa se maugamu i lalo o le sami, e tusa ma le 65 kilomita mai Tongatapu, i le afa o le itula e lima (5.30pm) i le Aso Toanai na mavae atu nei.

I se feiloaiga ma le Komiti Faapitoa mo Faalavelave Faafuasei (National Emergency Operations Centre) sa faamatala ai e le Komesina o le Pulega o le Ofisa Tinei Mu, le Afioga ia Tanuvasa Petone Mauga, e uiga i afioaga na aafia i ni lologa e pei o Satupaitea, Vaito’omuli ma Vailoa i Savaii.

“O le tulaga lelei lava sa iai le mamalu o le atunuu o le vave o le fesootaiga, o lea sa oo atu ai lava le Ofisa ma le Pulega i nofoaga uma sa vili mai ma faailoa mai. Sa fesoasoani atu lava le pulega e tau foia tulaga sa faafaigata i luga o auala aua o isi nuu sa maua atu ua oo mai le sua o le tai i luga o auala ma totonu o falesamoa a isi aiga, faapea foi ma totonu o umukuka…

“O isi nuu sa vaaia ai le aumai o le sua sami o otaota ma le lapisi i luga o auala, ma poloka ai auala.. Ia o vaega uma nei sa oo atu iai le fesoasoani a le FESA i le mamalu o si o tatou atunuu sa valaau mai..

“O lea e fautuaina pea tatou ia vave ona fesootai mai i le tatou numera 911 mo ni faalavelave ua e iloa ua tupu ona vave atu ai foi lea o le matou oo atu mo se fesoasoani.”

Saunoa Tanuvasa sa iai foi nisi sa lipotia atu ni aafiaga i le motu o Manono, i le tulaga lava lea o le siitia o galu ma avatu ai otaota i tototnu o afioaga e tu lata i le sami. Ae sa faapea foi ona oo atu iai le Pulega o le Tinei Mu iai, aua foi se fesoasoani.

O nisi o afioaga i Upolu sa aafia ma oo atu iai le auaunaga a le tinei mu, o le atu Safata ma Falealili, faapea foi ma Aleipata.

Sa momoli mai le lapatiaga a le afioga i le Taitaifono ia Agafili Tomaimamao Shem Leo, ina ia mataala le mamalu o le atunuu, ma vave o ese mai le matafaga, pe a ona tulai mai ni aafiaga o le tau, e pei o afa, ae maise galulolo poo sunami.

Saunoa le Taitaifono o le NEOC ia Agafili, o ia foi o le Pule Sili o le Matagalueaga a le Palemia ma le Kapeneta, o loo iai lava le faanoanoaga i le Komiti, ona o nisi e faaoga sese le telefoni feaveai, e tapu’e ai ata o faalavelave e tulai mai, ae le vave o ese mai itu a ono aafia ai lo latou soifua.