‘Tali a le Palemia ia Olo’

0
414

Ofisa Sooupu – Ua agina i luga o faasalalauga se finagalo faaalia o le Sui Faipule mai Salega i Sasae, Afioga Olo Fiti Vaai e faatatau i ripoti a le Ofisa o Su’etusi i nisi o tausaga ua tuana’i lea e faapea mai o loo faaalia ai faiga faaalatua o loo faatino e nisi o Matagaluega a le Malo.

Peitai na tali fuaitau le Palemia, Afioga Tuilaepa Dr. Sailele Malielegaoi e faamanino lea tulaga na ia saunoa ai e faapea; “o le tulaga i le alii lea, sa ou fesiligia, masalo e talanoa i le upu e le malamalama ai, o le upu lea corrupt lea pei se mea fiafia a le vaega foi le SSIG, pei se mea fiafia e lafo, ae le’o malamalama i le upu”

“O le mea lea o le corrupt o lona uiga o le matuã leaga, leaga, leaga; ae ou fesili atu se’i ta’u mai poo le a le uiga o le mea lea? ae fai mai, mo le mea ua tou ave le miliona tala lea e faaagaga mo tagata faigaluega, ae oo atu i le faaiuga e le’o faaogaaga uma ae ua ave e faatau mai ai computer a le Matagaluega.”

“Ia se’i vaai i ai i lenei upu faavalevalea tele, ae aumai le faamatalaga o mea ia, ae le’o fesili la poo le a le tulaga, auã o mea ia e fai e Matagaluega, soo se Matagaluega e ala le CEO, talosaga mo tagata faigaluega, ia iai ni matou tagata faigaluega, ia o se mea lelei.”

“Ia ae manatua mea na o lea e agaga i ai le toatele o mãtua ia maua galuega, ae a leai foi ni galuega matuã kaea tele lenei Malo e leai ni galuega o sailia mo fanau.”

“A’o lea la e faataoto atu fuafuaga mo galuega, ia e lua a mea e tupu, faasalalau e leai nisi e talosaga, ona ua tilotilo ane tagata e fai a si maoa’e o le tomai lea e moomia, e le mafai ona talosaga se inisinia i se avanoa faafoma’i na’o foma’i lava, ia pe faasalalau ia se inisinia e le mafai ona talosaga mai ai le totõ tiapula i tuã, e sau ma lana oso o le a le mea na te inisia i lana oso, e fua le galuega i le tomai o le tagata, lea la e mana’o i le tomai lea ae le ai nisi.”

Ae i le tulaga i le Komiti Faapalemene e ala mai ai nei manatu saunoa Tuilaepa; “sa ou fesili i ai, auã e manatua foi pei a e to’a fitu ea le aofa’i o sui o le vaega lenei ia ma Olo la e saofa’i ai”

“O le latou Komiti o Tupe o le latou galuega, o le samania o faauluuluga uma a o Matagaluega ona o atu loa lea e avatu a latou ripoti i le faatinoga o lea vaega ma lea galuega ma lea galuega ma lea galuega; ia a i ai la ni faafitauli, o i la i le Komiti e maua ai poo a ni faafitauli a’o le a foi la le fofo e fai.”

“O lona uiga o se Komiti lea i la’u matau o se Komiti pito taua tele lea o le Palemene, ma o le Faipule a ia e fia malamalama i le loloto o upu fai o Malo ma le faatinoga o tiute a le Malo, Komiti ia e maua ai le malamalama.”

“O lona uiga la o la e te aoga i taimi uma, auã foi o lea e samania uma atu ia faauluuluga o Matagaluega ia ma isi foi o i le Pulega, ia ona fiseli lea o le a lea mea, o le a lea mea; ona faamatala uma atu a le faamatala atu, faamatala atu.”

“O aga na a Malo o loo faafoe i le malamalama, e leai a ma se mea o taofia, ma e moomia foi e a’u ma le Kapeneta ia galuega a Komiti, ia latou vailiili faaletonu ia ma maua mai ai foi fautuaga i le Malo.”

“Auã e manatua lelei e le faapea e iloa uma e le Minisita isi mea o loo fai ai i totonu, e mafai a ona le ripotia mai e le faauluuluga ni mataupu i lana Minisita; e faigofie a ona tupu mea faapena, o lea la e tãua tele ai ia Komiti nei a le Palemene.”

“E i ai taimi e faitio ai a nai Faipule, e fiu e samania mai ia isi faauluuluga, e tuli atu ia le numera tolu i lalo; ia o se le mafaufau le mea lena, aemaise e leai nisi o toe silĩ, o ta’ita’i ia o le atunuu, e tatau la ona o atu ia faauluuluga i tai e faamalamalama mea o le Malo.”

“E lima ea tausaga talu ai, ua ou te’i ua taunuu mai le faitio a le ta’ita’i o tupe, fai mai faamolemole Tuilaepa se’i saunoa ane a i le Minisita lea ma lana CEO, ona na vaalaau atu le CEO e sau i le fono ae fai mai e le’o avanoa, a’o la ma te omai ma tai o la e inu ti i le faleaiga lale e i le isi itu o le auala, a ua le alu i tai, o la e pepelo i tai.”

“Ia ona ou tusi loa lea i ai i le Minisita ma lana CEO, vaai o lea ua ou iloa le mea lea e tupu fai i lau CEO, kiagi i tai o la e vaalaau mai, tuu nisi ana pa’upa’u ae kiagi i tai e alu e fesoasoani i mea o loo fia malamalama ai Faipule.”

“A faapea la o a’u ma a’u Minisita o tagata kuluku, matou te le faia se mea faapena. E faapea mo le mea o le galuega a le Palemene, e galulue faatasi ia le Malo ma faipule.”

“Ae ua ala la ona ou laga le mea lea, ua faaoga e le ula lea, o Olo; ua faaoga e le alii na mo mea o faamatalaga ia e avatu ona sau loa la ia faasalalau, e pei o ia o le tama poto a foi lele, o a’u nei matuã ou poto tele, a’o faamatalaga o lea e avatu e le au faigaluega a le Malo.

“Lea la na fai ai la’u faamatalaga i totonu, vaai o mataupu ia e te le polokiki ai, e ala ona o atu CEO’a e o atu e avatu mataupu ia mo lou silafia, ae toe te faaogaaga loa mea na e toe sasa ai ia le au CEO’s faalaua’itele, tou te fiu e fai atu i le au CEO’s e le ai se isi e toe fia alu atu.”

“Mea la lena e taua tele ai i le Malo, le una’i o galuega ia mafai ona faatino, mea la ia e le’o malamalama i ai ia Olo, ona auã foi e le’o i totonu i i, e le’i saofai i totonu e malamalama ai, a’o le alu ia o le fana taavili i le fetalai, oka! Oka! Oka! Oka! Oka!.

“A o le mea a lena o la foi e faaoga e le nusipepa latou, la e faaoga e le nusipepa e su’e ai a latou tupe, ae leiloa a e lea Faipule, pei o ia le isi vale lea e su’etupe ai ia le nusipepa, ia ma mataga atu ai a i le au fai mafaufau.”