O le a siitia le penisione mo tagata matutua e 70 tausaga agai i luga, mai le $300 i le $500 tala i le masina, e pei ona folafolaina e le afioga i le Minisita o Tupe, Hon Mulipola Anarosa Ale-Molioo ina ua tuuina mai le Tala Faatatau i le Tupe mo le tausaga 2026-2027.
O le penisione mo tagata matutua i Samoa e $300 i le masina mo i latou ua ausia le 65 tausaga.
Sa fa’asalalauina e le vaega faaupufai e le Faatuatua i Le Atua Samoa ua Tasi se siitaga mo le penisione mo le 70 tausaga agai i luga, i le taimi o le faigapalota tele i le tausaga ua te’a. O lea la ua faʻamautuina mai ai i le aso le $500 i le masina le penisione mo le 70 tausaga i luga.
Sa saunoa le Minisita o Tupe, e 7,285 le aofai o tagatanuu Samoa e mafai ona agavaa mo lea faamanuiaga, o le a amata mai i le Aso 01 o Iulai 2027 pe a pasia le tala o le tupe. O lona uiga, e $1,457,000 i le masina le tupe faaopoopo, poo le $17,484,000 i le tausaga se vaega tupe mo lenei faamoemoe.
Sa faasalalauina foi e le afioga ia Mulipola, se vaega tupe o le a maua e matua o pepe fou, e $200 tala pe a fanau se pepe sei tulou. Ae $100 tala i le masina le tupe e maua e le tina o le pepe fou, mai le taimi e fanau ai, mo le 35 masina.
O lona uiga, mo le tolu tausaga muamua o le soifua o pepe fou uma i Samoa, o le a maua e matua le seleni e faamautinoa ai le tausiga lelei o legal fanau iti.
O le aso sa tuuina mai ai le Tala Faatatau i le Tupe mo le tausaga 2026-2027, ma saunoa ai le Minisita, o le aga tausili a le tala o le tupe, o le puipuia lea o Samoa i soo se lamataiga e ono tulai mai. Ma le sini autu o le tala i le tupe o lenei tausaga, o Aiga. O le galulue feoeoeai, mo le manuia o Aiga, e aofia ai le atunuu, afioaga ma nuu, faapea aiga taitasi o Samoa.
- Faagasolo Suesuega a Leoleo i le Maliu o se Alii i le Vili Ma’a i Alafua - August 31, 2026
- Siliga Diana Roma Sworn-In as Acting Judge of Samoa’s Supreme Court - August 12, 2026
- “Ou te lē Mana’o e Toe Aafia ai se Isi” – Lapata’iga a se Tinā na Se’etia - August 7, 2026
