O se aso na sāo ai le Maota o le Palemene o Samoa, ina ua saunoa le Afioga Hon AEAU PENIAMINA LEAVAISEETA, le Sui Faipule mai Falealupo; i lana saunoaga faamavae ina ua maea ai le 26 tausaga o tautuaina lona itumalo, i upu fai a le Malo o Samoa.
Sa muai ulufale le Afioga ia Aeau i le Palemene o Samoa i le tausaga 1985, ma o le lona lua o ana paeaiga i lona toe taliu mai i le 1988, sa tofia ai e fai ma Fofoga Fetalai o le Maota.
Sa muai tulai mai i le 1985 Aeau Peniamina ma le Afioga ia Fiame Naomi Mataafa
O le palota o le 1991 sa le manuia ai, ae tulai mai Mafasolia Papu Vaai. Sa faaauau ai pea le malologa a Aeau mai le Palemene seia oo atu i le faigapalota o le 2001, sa toe tulai mai ai, ma faaauau mai ai pea lana tautua, mo lenei 20 tausaga ua mavae atu nei.
O le Afioga ia Aeau o ia foi o se Fomai Oloa (Dentist), ma o se matafaioi ma se auaunaga mo Samoa o loo faaauauina pea e ni ona alo se toalua.
O lenei ua malolo manumalo le Afioga ia Aeau Peniamina Leavai, ae ua sauni mai lona alo, le tamaitai loia, le Afioga ia Aeau Leota Tima Leavaai, e tauva mo le faigapalota ia Aperila.
Na matuai sāo le Maota Fono o le Palemene o Samoa ina ua saunoa faamavae le Afioga ia Aeau i le Aso Faraile ua tea atu nei.
O le lauga lenei a le Afioga ia Aeau, o lana saunoaga mulimuli ae lei faataapeina le Palemene o Samoa mo lenei paeaiga.
Faafetai i lau Afioga i le Fofoga Fetalai, paū o le Fonousu a le atunuu, e ia te au le ava tele e tatau ai ma le faaaloalo, ou te tulai ai i le pau o lenei taeao.
O le agaga faafetai i lo tatou Matai i le Lagi, ona o lona alofa lea ua o tatou ofaga potopoto ai Samoa, ma lana Palemene i le manuia.
O Lona lea Viiga e tumau pea.
Faafetai tele i lau Afioga i le Fofoga Fetalai, mo le avanoa ua tuuina mai ia te au nei, aemaise foi le faafofogaaga a lou itumalo, ua malie pule.
O le a taumafai ai se leo lau Afioga leaga e faigata. E ia te au le ava tele e tatau ai, e faatalofa atu ai i le pau o le Maota Fono nei.
Lau Afioga i le Fofoga Fetalai, lau Afioga i le Palemia ma lau Kapeneta, ma le mamalu o sui usufono, aemaise le faafofogaaga mai i le Ao o Le Malo, lau Afioga Tuimalealiifano ma lau masiofo, ae tainane le faafofoga mai a Samoa i ona tulaga faalupeina.
Faafetai ua maea ona faaee le vaatele i lona tulaga fita. Ae o le vaatiu ma le ofaga o Malo, le tofa tatala ma le faautaga tausi vaatele, ua seuga le lupe a vaosa, ae ua mapu ia le tulatoa, ona o le alofa lautele o le Atua ua tatou fesilafai ai magafetauola e pei o le upu i le tamaitai o Leutogi Tupaitea.
Ua auau lalafo se leo i lenei taeao matagofie, se i momoli le agaga faagaeetia ma le faafetai ia Samoa lou atunuu pele, i lau tapuaiga ao alofaiva lau Palemene i ona faiva malo i lenei Paeaiga o le a faaiuiuina.
Ao le i oo se tala i le paia o le Faigamalo, e fia asiasi muamua se leo i si ou itumalo pele i lou loto.
Afio o lau Afioga Auvaa, o oe o le Tupu Faanofonofo ma ou Aiga. Aiga Sa Seumanutafa ma la outou tama o Gisa ma le Matua ia Seve. O le Aiga Sa Amituanai Aeau, Ugapo ma Faletagoai aemaise le Afifio o Maopu o le Nafanua Solia ma Foaimea, Peseta ma Tuimaoe. Faapea le Afio o le Matua ia Lamositele, ao le mamalu i la outou Toafa ma le Fetalaiga ia Silialaei, ma le Mamalu o le tapuaiga. E le faagaloina le sao o tina ma tamaitai, la outou tuualalo ma la outou tautua tausaafia, faafetai, faafetai tele.
Faafetai i la outou pule ma le faaaloalo na outou tofia ai au, o se auauna e molimoliina se tatou sao i upufai o le Malo i tausaga e tele; ua 26 tausaga nei.
E le faagaloina foi i le agaga le tapuaiga a Faafeagaiga tau i le lagi, o latou faiva taulima le amia o manuia mai i le Atua i si o tatou itumalo faapea Samoa atoa, aemaise o lau faifeau o lau Ekalesia EFKS i Vaotupua, lau Susuga ia Namaia Kofe Tuiletufuga ma le Faletua. Malo faafetai le tapuai, aua o la outou tapuaiga sa maua ai lou malosi.
O le a sa outou faafogafoga mai ma sa outou silasila i ni lape o la outou auauna i le molimoliina o le tofa ma le moe aua upufai o le Maota Fono, ia alofa, faamagalo, lafo i nuu le aina.
Ae o la outou faaaloalo ma la outou faaeaea ia te au e le mafai, e le mafai ona faagaloina.
Ou te le pale ai, nei suia e le lā, ou te le ula ai foi, ina nei ou saasaa ona motusia lea. Ae ou te laei ai e pei ona tala measina a Samoa, o le lagi malofie. Ou te alu ifo ma au, i le eleele.
Ia faamanuia mai Le Atua i le amataga o galuega i lenei Tausaga Fou. Nei ou laa loa, ou te faafetai tele i lau Faafeagaiga Taulagi i le Ekalesia i Vini Fou, lau Susuga Tasele ma le Faletua. Faafetai mo talosaga, faafetai mo le tapuaiga, i lou nuu pele o Falealupo.
Lau Afioga i le Fofoga Fetalai, aemaise lau Afioga i le Palemia, ma sui usufono mamalu o le Maota Fono o Samoa, se ua malo le faatoatoa, malo le onosai.
Faafetai i lau Afioga i le Palemia mo atinae lelei ua faasafua i totonu o le atunuu ua oo atu lava i si o matou itumalo. Lau Afioga i le Palemia, ua se togi le seu na lagatila ae faapulou i le tualima, faamalo le fai o le faiva.
Faafetai i lau Afioga i le Fofoga Fetalai mo le taitaiga o le Fonousu a Samoa. O taua lea o le a malolo manumalo, ia viia le Atua.
Faafetai i lau Afioga i le Faamasino Sili ma Ofisa Sili o Pulega o Matagaluega uma ma Faalapotopotoga Tumaoti a le Malo ona o la outou fitaituga, aao masui i le galuega o atinae eseese e manuia ai Samoa.
Faafetai ia Pule ma Tumua, Ituau ma Alataua, Fofogailefua ma Aiga i le Tai ma le Vaa o Nafanua. O le a sa outou faafogafoga i se faaletonu o le sui usufono o Falealupo i totonu o upufai o Malo, ia alofa ma faamagalo.
O le mavaega i Tulafasa i le faga i Falealupo a Toiva ma lona tuafafine o Sinatapuitea, “O le a ou alu. A e vaaia au o ou tu mai i Sasae i le taeao, ia o au lena, e te alaseu ai, ae a ou tu mai i Sisifo i le afiafi, o au lena e te talisua ai”.
E manatua outou uma e le galo. Ia auomanu la outou faatamasoaliiga.
Le mamalu o le Palemene, ia faamanuia le Atua i le taape o le Palemene mo sailiga tofi o le Paeaiga fou a o le a seu tapuai le tamaloa mai Falealupo.
