Saunoa Matai o Faleata 4 “E leai se palota e faia”

"A iai se isi o Faleata 4 e toe sau, o le tagata lena ua le fia ola, o le tagata lena ua maimau lona ola.."

0
5222

“O le sui lenei o Faleata 4, ma o le matou itumalo, e leai se palota e faia..”

O le saunoaga lea a le tootoo sa momolia le finagalo o le Itumalo, le tofa ia Faletaogo Faletaogo.

“O lea ua matou omai e momoli mai le matou sui, le tofa i le igoa matua ia Ale Vena Ale. O le sui o Faleata 4..”

Saunoa Faletaogo, e maimau le taimi o se tasi e ono fia tamoe i le palota laitititi o loo loma nei, ona ua tasi moemoe le finagalo o le Itumalo, e lagolago le latou sui, lea ua momoli aloaia i le FAST.

“A iai se isi o Faleata 4 e toe sau, o le tagata ua le fia ola, o le tagata ua maimau lona ola, aua o le sui lenei, e leai se palota. E le ni upu e avane ai.”

“E ui lava na alu Ale i le HRPP, ao lona loto lava o i. Lea ua masii mai ai le itumalo, e leai se isi e suia Ale.”

O le faaiuga o le vaiaso na sei mavae atu nei, na masii mai ai itumalo e tolu e momoli a latou sui faipule sa tulai mai o ni sui o le HRPP i le faigapalota tele o Aperial 2021. Ae o lea ua tuuina mai e tauva mo a latou itumalo, i lalo o le Faatuatua i Le Atua Samoa ua Tasi.

O le taitaifono a le FAST, le afioga ia Laaulialemalietoa Leauatea Polataivao Fosi Schmidt, na saunoa e talia le afifio atu o le paia o le itumalo.

O le ma’ea ai ona talia aloaia o le tofa ia Ale i le taeao o le Aso Toanai, na taunuu ai foi le itumalo o Siumu e momoli aloaia atu foi le latou sui, le tofa ia Tuuu  Anasii Leota.

Na saunoa manino foi le Taitaifono a le FAST, le afioga ia Laauli, ua tapunia ai foi ma avanoa mo sui tauva o le FAST, ae ua no o i latou nei e toatolu o le a tuu atu iai le faamoemoe atoa o le vaega faaiupufai mo palota laititi.