“Ou te le talia, ou te le talia le faaiuga le faamasinoga”. O le saunoaga lea a le Taitaifono o le Vaega Faaupufai Faatuatua i Le Atua Samoa ua Tasi ina ua tuuina mai le faaiuga a le Faamasinoga Maualuga e faaleaogaina ai le faasalaga a le Maota e faamalolo Tuilaepa Sailele Malielegaoi ma Lealailepule Rimoni Aiafi mo le lua tausaga e aunoa ma se totogi.
Saunoa le Taitaifono a le FAST, o ia foi o le Minisita o Faatoaga ma Faigafaiva, le afioga Laaulilemalietoa Leauatea Polataivao Fosi Schmidt, “o lea e faimai le faamasinoga e fai le aso e muta ai le faasalaga, ao lea ua toe aumai le faaiuga e toe faafoi i totonu tagata ua faamaonia soligatulafono.”
Sa faasalalau le saunoaga a Laauli, i le polokalame a le Soalepule i luga o le ala ata le EFKS TV i le Aso 5 Iulai.
“O le manatu o le Faamasinoga e aumai tagata solitulafono e faia upu a le Palemene, ma saofafai i totonu o le Maota Fono?..
“O le ā le silasila a le Malo, le lalolagi i le saofaiga a le Palemene o Samoa, le saofafai o tagata solitulafono i totonu o le Maota fono a Samoa?”
I le fofogaina o lenei mataupu e le afioga i le Faamasino Sili ia Satiu Simativa Perese, na ave ai le faataua a le Faamasinoga i le Vaega (44) 1 o le Faavae o Samoa, lea e faamautu mai ai, le tatau lea ona tofu Itumalo e 51 o Samoa, ma sona sao i totonu o le Palemene o Samoa, e ala atu lea i Sui Faipule filifilia.
O le faaiuga a le Faamasinoga, e lē faitioina le tuuina atu o faasalaga pe faatulai ese foi Sui Faipule a le Palemene i lea taimi ma lea taimi.
Ae o le mau a le Faamasinoga, e lē tatau ona tuuina atu ni faasalaga e aafia ai faiga faavae faatemokarasi ma faigamalo lelei, ae maise o le taofia ai o leo o Itumalo e lua, e pei ona aafia ai Lepa ma Faleata 3.
“However, suspensions must not deny Parliament of effective representation from electoral constituencies, and or the voice of the people of those electoral constituencies. Such denial is also a denial of the democratic system of representative and responsible government established in the Constitution.”
Ae ua tetee le Taitaifono a le FAST, ma faapea mai, “o le Faamasinoga, e afio ai le Faamasino Sili ma le mamalu o le Faamasinoga ma i latou e faamaoniaina soligatulafono, ao lea ua faimai le faaiuga e toe aumai i totonu tagata solitulafono.”
O le solitulafono o loo tā’ua e Laauli, o le Comtempt of Court sa faamaonia e le Faamasinoga Maualuga i le Aso 23 o Mati 2023. I lea faaiuga sa leai se faasalaga na tuuina mai e le Faamasinoga, ona o le manumanu e toe faafoi Samoa i le filemu ina ua maea vesiga paapolokiki (political crisis) sa feagai ma Samoa mo le tolu masina (Aperila – Iulai 2021).
Peitai sa saunoa Laauli, na te lē fia auai i se Palemene e saofafai ai ni tagata solitulafono. “Ou te lē talia le faaiuga, ou te manumanu i le saofaiga a le Palemene, ou te lē fia nuti mea faatasi ma i latou ua faamaonia latou solitulafono.”
Saunoa Laauli e lē māmā ia te ia le Palemene. “O le Palemene o loo iai le faigamalo a Samoa, o loo iai itumalo uma, mai lava i ona ao e oo ona iu, e afio ai le Fofoga Fetalai ma itumalo e 51 o Samoa, e afio ai le Taitai o le Malo, Sui Taitai ma le Kapeneta, le faamalumaluga a le Ao o le Malo, aea Sui o le fono Sui Tofia.”
Ua tuuina mai foi se Pepa o Faamatalaga a le afioga i le Fofoga Fetalai ia Papalii Taeu Masipau, o le ā ia failaina se talosaga apili e toe iloilo ai nisi vaega o le faaiuga e pei ona tuuina mai i le vaiaso nei e le Faamasino Sili ia Satiu Simativa Perese ma le Alii Faamasino ia Leiataualesa Daryl Clarke.
Sa poloaia foi e le Faamasinoga le toe totogi uma ane o faamanuiaga tau totogi o Sui Faipule mai Lepa ma Faleata 3, e amata mai le aso na faamalolo ai ia Oketopa 2022 se ia oo mai i le taimi nei.
Public Notices
