O le a Siitia le Auaunaga a le Matagaluega a Leoleo ao Agai atu i Aso Fiafia

0
808

O le a siitia le auaunaga a le Matagaluega a Leoleo ao agai atu le atunuu mo le faamanatuina o aso fiafia.

O le saunoaga lea a le Sui Komesina a le Matagaluega Leoleo ma Falepuipui, Papalii Monalisa Tiai-Keti, i se feiloaiga ma tusitala.

Saunoa Papalii, o poloka masani a le Matagaluega i luga o auala tetele, o le a siitia i luga mo taimi ma nofoaga o le a faatinoina ai.

O le a siitia foi le aofai o Malu o le Malo i nofoaga pei o malae vaalele, uafu, ma nofoaga e tumutumu ai le atunuu e pei o le taulaga.

O le a siitia foi le fuainumera o Malu o le Malo e galulue i auaunaga lautele (general policing) e tali atu i taimi e oo mai ai valaau mo se fesoasoani.

Faamanino Papalii, “O le auga ma le faamoemoe autu, ia maua e le atunuu le fiafia ma le saogalemu, ao alo atu Samoa mo le faamanatuina o aso fiafia ma le taualugaina o galuega faaiu o lenei tausaga.”

Ua aumai ai foi ma se tuualalo a le Matagaluega, ao alo atu le atunuu mo aso fiafia, ia tautuana lou saogalemu.

“E lelei le ma’ea o aso faamanatuina o le faaiuga ma le amataga o le tausaga, a’o feiloai fiafia uo ma aiga ma fanau aemaise foi i latou o loo malaga asiasi ma tafafao mai.”

Faaiu le saunoaga a le Sui Komesina, o le a faatāua lava tiute a le Matagaluega, auā lava le puipuiga o le saogalemu o le atunuu, ae maise o le a lē ‘alofia lava le tiute a le Matagaluega e ala i le faamalosia o le tulafono.