Momoli e le Aiga i le Ofisa o Leoleo se tasi o Alii na Faaoolima i se Faatauoloa

0
1975

Ua taofia nei e leoleo ni alii se toalua na lā fasia se tamaitai faigaluega kēsia (cashier) a se tasi o faleoloa i Lotopa.

O le taeao o le Aso Lulu o le vaiaso nei na faasalalau ai i luga o le Facebook se ata mai masini pue ata a le faleoloa o Ah Yen Store i Lotopa.

Sa vaaia ni gaioiga a ni alii talavou se toalua sa la faaoolima ai ma titina ai e le isi alii se tamaitai Samoa o loo galue faakēsia (cashier). Sa taumafai lea alii e tatala le masini tupe ae lei mafai. Ae o le isi alii o loo momoe mai i fafo ma ni oloa o faguinu ma pepa sikareti.

I se faamaoniaga mai le Komesina o Leoleo ma Falepuipui, le susuga Auapaau Logoitino Filipo, sa ia tā’ua ai, o le isi alii na momoli mai lava e lona aiga, ae o le isi alii na maua mai i sailiiliga a leoleo i le po o le Aso Lulu, i se tasi lava o nofoaga e masani ona agai iai i Lotopa.

O ni mea pue ata a le faleoloa (security camera) sa iloa atu ai e leoleo nei alii e toalua, ma faamaonia ai, o ni alii sa aafia muamua foi i soligatulafono.

Saunoa Auapaau, ua taofia nei i la’ua i lalo o le vaavaiga a leoleo (in custody) e tālia ai le Aso 7 Aokuso e tulai ai i luma o le Faamasinoga Maualuga e tali laua moliaga.

Taua foi e le Komesina, “O le a molia i laua i le gaoi ma le faaoo lima, ae o le a iai moliaga faaopopo pe’a ma’ea suesuega a leoleo o loo faasolo nei.”