6 Iulai 2026, Apia Samoa. O lo’o fa’aauau su’esu’ega a le Matagaluega o Leoleo i le maliu o se tamā, 53 tausaga le matua, i se faalavelave na tula’i mai i le nofoaga o le Taumeasina Hideaway i le vaveao o le Aso Sa.
I se faamatalaga a se tasi o le aiga sa faapea ai, o le fale o lē ua maliu, e savalivali atu lava i le Taumeasina Hideaway.
“E le o lou taimi lea uncle Logi.. ae paga ua manumalo lava le fili ma le tiapolo i lena taeao.”
O le mea e ofo ai le niece o si nei tamā ua maliu, ona o le latou fale e pe tusa ma se 10 mita mai le Taumeasina Hideaway, ae o lea ua latou fasi lava i si ona uncle.
O moomooga alofa a si ona niece, pe aisea lava sā lē sau ai se isi e logo mai si ona tamā ma lo latou aiga, ona alu atu lea o se isi e aumai o ia.. ae ua latou fasi lava ma soona fai.
Na fa’amaonia mai e Leoleo o loo taofia nei nisi o loo masalomia i lenei faalavelave matautia.
O lē ua maliu o se tamā sa asiasi mai i Kalefonia, Amerika mo nisi o faamoemoe faaleaiga ma o ia foi o se alii e tupuga mai i le afio’aga o Moata’a.
E tusa ai ma fa’amatalaga a Leoleo, o lo’o faagasolo le suesueina o molimau, ae o ē o loo masalomia, e taofia pea se’ia uluai valaau le mataupu i luma o le Faamasinoga.
O nisi o molimau lata ane, sa latou faalogoina le pisapisaō ma se leo o se tamaitai, o loo valaau; “ua lava”.
Peitai ua faamaonia mai e le falemai i Motootua, e le’i oo lenei tamā i le falemai, ae ua maliu o ia.
I se isi foi faalavelave matautia, sa maliu ai se alii talavou 22 tausaga le matua, ina ia fasi mai i se nofoaga pisinisi i Togafuafua.
Sa avatu lenei alii talavou i le po o le Aso Tofi i le falemai i Motootua ma taofia ai i le ICU Intensive Care Unit.
Peitai sa maliu o ia i le tuga tele o ona manuaga, i le Aso Faraile 3 Iulai 2026.
Ua tuuina mai se fautuaga a le Matagaluega o Leoleo i le mamalu o le atunuu e uiga i le faasalalauina o tala sesē.
E faaeteete le tuuina atu i luga o upega tafailagi o faamatalaga e lē moni, ma faaseseina ai le atunuu ae maise o le aafia ai o suesuega a leoleo ma faamasinoga o loo faagasolo.
Sa faafetaia e le Matagaluega nisi o le atunuu sa mafai ona latou fesoasoani i suesuega o loo faagasolo nei.
Ua tuuina mai fo’i faamaisega a le Matagaluega mo matua, fanau ma aiga o ē ua maliliu i nei faalavelave matautia.
- Vaimauga 4 Tops Arrests as Drugs Recorded in all Eight Urban Districts of Upolu - September 10, 2026
- Poumau Tiufea Vaa, Miss Sili Ecofarm is your Miss Samoa 2026 - September 6, 2026
- Little Rina Wins Inaugural Measina Festival Fautasi Race - September 3, 2026
