O Maria Faalelei, o se tina 45 tausaga mai le afioaga o Faala Palauli, na maliu i se faalavelave tau taavale afi na tula’i mai i Salelologa, Savaii i le taeao o le Aso Faraile na sei mavae atu nei.
Na faamaonia mai e le Sui Komesina o le Matagaluega o Leoleo le susuga ia Papalii Monalisa Tiai-Keti, o le tina ua maliu sa ia faafoeina le taavale, ae o se itu faatauvaa tele na mafua ai lea faalavelave tugā.
“I suesuega a le Matagaluega e faapea o le taimi na a’apa atu ai lea tinā i luma o le dashboard o lona sa e taofi nisi o meatotino mai i le to’ulu i lalo, lea na sē ai loa lana taavale i le isi itu auala, ma feto’ai ai loa ma se isi taavale.
O lenei faalavelave sa tulai mai i le magatolu tonu o loo iai moli faasino ala i Salelologa.
Sa faasaoina le soifua o le isi faiaoga na toalua mai i le taavale ma lenei tinā.
Ae o le isi taavale sa malaga mai ai se ulugalii. E ui ina afaina lo la’ua sā, ae sa faasaoina fo’i le soifua o lea ulugalii na malaga mai i le isi taavale.
O lenei tinā o se tamaitai faiaoga i le A’oga Tulaga Lua a le Ekalesia a Iesu Keriso o le Au Paia o Aso e Gata ai i Vaiola.
Ua tele ni feau faanoanoa a sui o lenei aiga ae maise o le fanau aoga e ofo alofa ai i le maliu fa’afuase’i o le latou faiaoga sa pele ia i latou.
O le tulai mai ai o lea faalavelave ua toe tuualalo mai ai le Matagaluega o Leoleo e tauala mai le Sui Komesina ina ia tautuana le saogalemu i luga o auala ao femalagai le mamalu o le atunuu.
“E tatau ona saogalemu le mea e tuu ai mea totino i totonu o taavale, ma ia fai lenei faalavelave ma se lesona tāua mo i tatou uma i lea tulaga.”
O loo faa’auau pea sailiiliga leoleo lenei mataupu ma e leai se isi o molia ai.
