Malelega Faamanuia a le Afioga i le Ao Mamalu o le Malo

0
206

Malelega Faamanuia a le Afioga i le Ao Mamalu o le Malo –  Tuimalealiifano Vaaleto’a Sualauvi II,  Kerisimasi 2020

Lau Afioga i le Sui o le Fono a Sui Tofia ma le Masiofo

Lau Afioga i le Alii Palemia ma le Kapeneta

Lau Afioga i le Fofoga Fetalai ma Sui Mamalu o le Palemene

Lau Afioga i le Faamasino Sili ma le Vasega o le Faamasinoga

Le Paia o le Aufaigaluega Totofi a le Atua

Sui o Malo mai Fafo

Le faafofogaaga a Samoa mai ona ao seia oo i ona iu.

O paia lava ia aua Tama ma o latou Aiga, Aiga ma a latou Tama, Tumua ma Pule, Ituau ma Alataua, Aiga i le Tai ma le Vaa o Fonoti.

E faapea foi ona ou faapa’i atu i le faafofoga tapuai mai a le faigamalo a Tutuila ma Manu’a, i le afio o le Afioga i le Kovana ma le Tafatolu o le Faigamalo a Amerika Samoa. O paia aua Sua ma le Vaifanua, Fofo ma Aitulagi, Saole ma le Launiu Saelua, faapea le Laau na Amotasi. Afifio Faatui, Tootoo o le Faleula, ma Upu i le Manuatele.

“Ua tala mai e le lagi le mamalu o le Atua; ua faaalia foi e le vanimonimo le galuega a Ona aao. O loo ta’u atu le upu e le tasi aso i le tasi aso, o loo faailoa foi le poto e le tasi po i le tasi po. E leai se gagana, e leai foi ni upu, e le lagona o latou leo.” 

Ou te faafeiloai ma faatalofa atu i le suafa manumalo o lesu Keriso, o le Ao o le Ekalesia, o le Faaola o le lalolagi atoa, o le Tama lava na valoia, o le Alii o le Filemu, o le Tamā o le Faavavau. O Ia o Emanuelu, o le Atua ua ia te i tatou. Ua oo mai ai Lona malamalama, ma sulugia ai Samoa, mai le Matasaua seia paia Fili ma Puletuu, na tauilo ai manū o malo. Ia viia ai pea Lona Suafa e oo i le faavavau.

Ua faamalo le folau; ua faamalo le taupati; ua faamalo foi le tatalo ma tu’itu’i i le lagi, mo le manuia o Samoa ma ona tagata. Aua o le Atua o le foafoaga o le Atua poto e toatasi, o Ia na faufaua Samoa e fai ma o tatou tofi; o Ia lava na tofi, tofā Samoa, e fai ma o tatou aiga. O Lona malamalama, ua fai ai Samoa ma lamepa susulu, i tupulaga o ona po nei, ma a taeao, ma le lumanai, ua le gata i o tatou nei laufanua, a o le Pasefika ma le lalolagi atoa. Ina mua ia, mua o, aua ua malie o, ua malie malo.

 

Ua tatou i ai nei i le vaitau aupito sili ona taua i le Kalena a le Au Kerisiano, i le faamanatuina o le aso na soifua mai ai lo tatou Alii Faaola o Iesu Keriso. O le Tama na alagaina e agelu ma ‘au uma i le lagi ona paia ma ona mamalu, pei ona faamauina i le Evagelia a Luka i le pese na o latou lagiina,

 “O le viiga i le Atua i mea aupitoaluga; ma le manuia i le lalolagi i tagata ua alofagia e ia.” 

E le mafai ai ona galo le faamaoni o le alofa tunoa o lo tatou Atua, aua o Ia sa i le taulotoaiga o la tatou folauga Samoa i lenei tausaga. Ia tatou faafoi ai le viiga ia te Ia i mea aupitoaluga, e fai ma a tatou taulaga i lenei Kerisimasi; auā o pesepesega ma felagiaiga, ma lo tatou loto faafetai, e faapaleina ai le Atua Silisili Ese. 

 

E le toe tau faailo, o lea lava na satia la tatou folauga i le vasa, i peau vale o le olaga. A o tua atu o le sousou o peau o le vasa, ina ua to i tua Apolima, na iloa atu ai le malamalama o le pupula o le Atua; le tu matila o Lona alofa tunoa; le maualuga ma le silisili ese o lona faamaoni; ma lona finagalo alofa i o tatou tagata. 

Sa tatou lagona faatasi le tiga ma le alofa, ona o fita o le soifuaga sa tatou faafeagai mai lea taimi i lea taimi, aemaise o le soua o le lalolagi i le faamai o le Koviti, ua lofia ai tulimanu uma o lenei kelope. Ae ui i ia peau fafati o le vasa na o tatou asaasa mai ai, o loo lagomaluina pea la tatou folauga e le mana ma le alofa silisili ese o le Mataisau o le foafoaga. 

Ou te faafetai tele atu i Taitai o Ekalesia faapea le Aufaigaluega paia a le Atua; o la outou tatalo ma le faanonoga manu, o loo toafilemu ai Samoa o lo tatou tofi mai le Atua e tumau e oo i le faavavau. 

Ou te faafetai atu foi i lo tatou atunuu mo galuega lelei uma, faapea foi ma talosaga ma anapogi sa tatou tutu faatasi ai i lenei tausaga talu mai lona amataga, o le faailoga lea o lo tatou talitonuga, e le tuulafoaiina i tatou e lo tatou Atua. O loo ua manuia ai faiva o nuu ma afioaga, ae tainane le faafoeina o lo tatou Malo e le Afioga i le Alii Palemia ma le Kapeneta, le Faamasino Sili ma le Faamasinoga, faapea le Fofoga Fetalai ma le Palemene o Samoa, ma matagaluega ma faalapotopotoga uma a le Malo. 

Ou te momoli atu foi le faamalo i le tapuaiga le leoa a nai o tatou matua tausi, o ao sinasina ma tulatoa o le atunuu. 

E le faagaloina foi le sao taua o le au faipisinisi ma le au fai atinae, o le itupa o tina ma tamaitai, aemaise o a tatou paaga mai malo i fafo, faapea foi faalapotopotoga ma mafutaga eseese loo faia galuega laveai ma galuega fesoasoani mo le saogalemu ma le manuia o le mamalu o si o tatou atunuu. 

E fia faaleoina foi le agaga faafetai i le alofa ma le agalelei o nai o tatou tagata ma aiga o loo papa aao i atunuu mamao. Ou te faamalo atu foi i nai alo ma fanau, o le lumanai o Samoa, mo aoaoga ua faaiuina ma le manuia i lenei foi tausaga.

Samoa e, o lau tuualalo ma lau faufautua, o lou onosai ma lou faapalepale, lea ua taufai puea ai le matila ma le ofeloa, i faatamasoaliiga uma na alo i ai lo tatou atunuu, aemaise lo tatou malo. O le viiga lava lea o le Atua i mea aupito i luga, aua o Ia e manuia  ai e ua alofaina e ia. 

Ua sina nei le galu, ua iite foi fanua alalo, aua o lea ua faataumua ava lo tatou sa, e le gata ina tuta i nuu o Manaia, ae foufou foi e folau atu i le 2021. O o’u moomooga ma tatalo, ia faamanuia tele le Atua i lo tatou atunuu ma ona tagata nuu uma i Samoa nei faapea ma atunuu i fafo. Ia tatou maua se Kerisimasi fiafia ma se Tausaga Fou manuia ma le filemu i le pule faasoifua a le Atua. 

Ia tatou tumau pea i Lona alofa ma Lona filemu, pei ona afio mai ai le Perenise o le Filemu, e faailoa mai le filemu moni ma le agaga alofa o le Atua, o lē ou le malosi uma lava, le viiga ma le mamalu, o le faamanu ma le faaneetaga, o nei ma aso uma lava e oo i le faavavau. 

Soifua ma ia Manuia.