O se faifeau o loo tuuaia i lona faamalosi ma faiaiga atu i se teineitiiti 15 tausaga, ua malaga atu nei i Ausetalia, ao faagasolo pea suesuega a leoleo i le mataupu.
Ua silia ma le masina talu ona tulai mai lenei mataupu, ina ua tatala le feagaiga a lenei faifeau ma lona nuu, ae faasaga ane le afioaga e faasala le aiga o le teineitiiti sa aafia i lenei tuuaiga.
Peitai ane, e oo mai lava i le taimi nei, e lei faatino lava ni moliaga a leoleo i le mataupu.
E pei ona faamaonia mai e le Komesina a le Matagaluega o Leoleo, Auapaau Logoitino Filipo, ua malaga ese atu mai Samoa le faifeau.
Saunoa Auapaau, “E lei faia ni moliaga ona sa tau faamautu vaega uma ma faatino suesuega a leoleo ae o le taimi nei o loo maua e leoleo ua malaga ma lona aiga i Ausetalia.
O le gaigoiga a le faifeau na aafia ai lenei teinetiti 15 tausaga, ma mafua ai ona togisala i le afioaga le aiga na aafia. Sa aapa atu le aao fesoasoani a le Toomaga mo e Puapuagatia ma taofia mai le teineitiiti 15 tausaga i le House of Hope.
Peitai ane, ua le o toe iai o ia i le Toomaga, ona ua oo mai lo latou aiga ma toe aveese atu.
E le o mautinoa mai le Matagaluega o Leoleo, poo iai se faamatalaga a le sa aafia, ma faamauina ai lana tuuaiga sa faamalosi ia e le faifeau. O pine faamau sa tulai mai se faafitauli, o le tatalaina lea o le feagaiga a le faifeau ma lana Ekalesia.
Peitai, ua le mautinoa i le Matagaluega a Leoleo, pe iai se mafuaaga ua tuai ai ona faatino moliaga i lenei mataupu, ae le o se taimi muamua lea ua tulai mai ai tuuaiga a fanau teine o le atunuu, i le faamalosi o i latou.
I se suesuega a Samoa na faatino e le Komesina o Sulufaiga i le 2018, na faamauina ai, o le 10% tamaitai Samoa, sa fai iai amioga mataga a se tasi o le latou lava aiga, poo se tasi e fetalai le sootaga.
E le o mautinoa foi pe aisea sa le taofia ai i se Stop Order le malaga atu o le faifeau, ao faasolo suesuega a le Matagaluega.
