Ua faaalia e se tinā mai Vaimoso Tai, e lē o popole o ia i lana taavale ma meatotino na mu i se faalavelave na tula’i mai i Vailoa i le tusa o le itula e 6 i le taeao nei, ae ua ia faafetai i le Atua ua saogalemu o ia ma si ana tama.
“Ou te lē popole foi i le taavale ua mū, poo se isi a mea na faaleagaina.. Pau la’u faafetai i Le Alii mo lana puipuiga alofa, ua mafai ai ona sefe mai ma’ua ma si o’u son i lenei taeao.”
Na ia ta‘ua, sa mu ai ni telefoni se lua, o ato ma tupe a lana pisinisi sa i totonu o le pusa tupe (cash box) sa faaleaogaina uma lava i le mu.
Sa tupu le faalavelave ao i luga o le aualatele i laua. Sa la usu po atu ma si ana tama e tatala le latou fale oti ulu i Vaitele, ma sauni mo le pisi o le taeao ae maise o faatauga mo le Aso Sa o tamaito.
Sa amata ona ia faalogoina le pa’o mai o le la taavale le ituaiga o le Toyota Vitz.
“Ona faatafa loa lea o le ma taavale i tua, ae vaai atu ua asu mai, ma sasao mai ai loa le afi..
Ta’ua e le tinā sa vave tele ona faateteleina le sasao o le afi, ae faafetai sa vave ona la feosofi ese.
“Ma te feosofi i fafo ae ua pupusa mai lava le taavale ma sasao ane lava le afi..”
Ma e le’i iai se taimi e aveese mai ai ni mea mai le taavale.
Na taunuu atu le fesoasoani muamua poo le auaunaga a le fuimu. Tā’ua e le tina na te lē iloa po o ai na valaauina le FESA. Ae o le taimi lena ua amata pisi ane lava le auala i taavale.
Ua tusa ma le tolu tausaga o ia umia le taavale. Na ia faaalia foi lona masalosalo sa sese le suauu na utu i le Aso Faraile na teʻa nei, ma sa ia talanoa i se tagata faigaluega o le pamu e uiga i lea tulaga.
E leʻi faamaonia le mafuaaga o le mu, po o se sootaga ma le suauu sa ia masalomia na sese ona utu.
Peitai, sa sili lona faafetai ona ua faasaoina le ola o i laua ma si ana tama.
“Pau a le mea e silisili ona ou faafetai ai ma viia ai le Alii, ona o le sefe o ma’ua ma si o’u son lea sa ma omai.”
