Sa faai’uina ma le manuia le mafutaga a loia o le Pasefika sa talimalō ai Samoa mo aso e tolu i le vaiaso ua mavae atu nei.
I se faatalatalanoaga ma le Peresitene a le Asosi Loia i Samoa (SLS: Samoa Law Society) le susuga ia Su’a Alex Su’a, na ia saunoa ai, ua telē se aoga o le faatofalaiga o taiala sa latou faasoaina, auā le faatinoina o le tiute faaloia.
O se taimi muamua lea ua faatinoino ai lenei mafutaga ua faaigoaina o le Pacific Lawyers Collective (PLC) Continuing Professional Development Conference.
Sa faatauaina foi e lenei mafutaga tū ma aga ae maise o faiga faavae o atunuu o le Pasefika e pei o le faatuatua i Le Atua, o le Aganuu ma le faatauaina o va nonofo ma fesootaiga.
“The power of Faith, Culture, Community and Connection.”
Saunoa Su’a Alex, “E masani ona faataunuuina i isi atunuu o le Pasefika mafutaga faapenei, ae o le uluai taimi lea ua talimalō ai Samoa.”
“O se avanoa tāua tele o loo faasoa mai ai loia mai isi atunuu o le Pasefika i latou foi luitau ma auala o loo faatino ai a latou foi auaunaga.”
Saunoa le Peresitene o le SLS, o mafutaga faapenei e maua ai avanoa tāua e fetufaai ma fefaasoaai ai tomai ma faatalanoa faafitauli o loo feagai ma atunuu eseese o le Pasefika, ae maise o fofo eseese poo metotia o loo faaogaina e asosi eseese.
“Sa mafai ona faasoa atu le matou foi pito laau ma luitau o loo matou faafesaga’i, aemaise o le faasoa atu o tulaga o loo ausia i le faatinoina o le auaunaga e lē o mafai ona maua e loia o isi foi atunuu o le Pasefika.”
“Sa faapena foi ona faasoa mai vaega o loo latou ausia e lē o mafai ona matou ausia, aua o le mafutaga fetufaa’i.”
Saunoa le afioga ia Su’a Alex, “Ua telē se aoga o le faatofalaiga o taiala mo le faatinoga o le tiute faaloia.”
Ta’ua e Alex, sa maualuga le faamoemoe, ona sa auai mai le Faamasino Sili mai Kuiniselani (Queensland), o le Faamasino o le Faamasinoga Maualuga a New South Wales, faapea Faamasino ia Ida Malosi mai Niu Sila ma nisi o Faamasino o le Faamasinoga Faaitumalo, ae maise o le auai ai foi o le Faamasino Sili, Faamasino Sinia ma le vasega o Faamasino a Samoa.
Sa matauina foi ē sa valaaulia mo saunoaga autu, sa pito sili ai lava ona toatele Samoa e pei o le Faamasino Sili ia Simativa Perese, lana afioga le Peresitene o le LTC Lesatele Rapi Vaai, afioga i le Faamasino Niava Mata Tuatagaloa, ma le Faamasino o le Faamasinoga Faaitumalo ia Talasa Atoa.
Sa saunoa foi le Loia Sili, Su’a Helene Wallwork, faapea le Peresitene ia Su’a Alex Su’a, ma nisi sa malaga mai fafo e pei o Toli Sagaga ma Brenda Milo mai Niu Sila faapea Talamau John Milo mai Ausetalia ma Muliagasisila Dr Faafetai Faaleava mai USA.
O nisi o loia sa fai foi a latou pepa e aofia ai Mosotele Fotu Hoglund, Lana Carter, Vai Levaiseeta, Lemalu Moevao Faimalie, Sala Josephine Stowers Kolo, Pulemau Trina Faaiuaso, ma Anastacia Amoa-Stowers
