Ua tuuina mai nei e le Ofisa o le Loia Sili o Samoa se pepa o faamatalaga e uiga i matai sa’o e pei ona iai suiga o le Tulafono o Fanua ma Suafa 2020.
O lenei mataupu sa tulai mai ina ua tuuina mai i le Tulafono Taufaaofi, le faatapulaaina o le numera o matai sa’o e le sili atu i le 5.
Ua faamautinoa mai nei – o lena vaega o le tulafono ua aveesea nei ina ua maea faatalanoaga ma le atunuu lea sa faatinoina e le Komiti Faapitoa a le Palemene, na taitaia e le Afioga ia Gatoloaifaaana Amataga Gidlow.
Peitai ua tuuina mai nei se aiaiga e faapea, o matai sa’o o aiga, e tatau ona nofomau i Samoa.
“Mo tiute tauave o le Matai Sa’o, ia nofomau i Samoa ma ia ta’imua e ta’ita’i lou aiga ma le nu’u e ala i ou tiute fa’amata’i sa’o e tatau ona fa’atino”.
Ua lomiaina atu i lalo nei le faamatalaga atoa, mo le silafia e le atunuu:
PEPA O FA’AMATALAGA: OFISA O LE LOIA SILI
TULAFONO O FANUA MA SUAFA 2020 – “MATAI SA’O”
O lenei Pepa o Fa’amatalaga, o lo’o tu’uina atu ai fa’amatalaga sa’o o aiaiga ma faiga fa’ave o le teuteuga o Tulafono Fou o Fanua ma Suafa 2020 e fa’asino tonu lea i le Fuaiupu 13 – Matai Sa’o mo le silafia e le atunuu lautele.
Na fa’ata’oto i totonu o le Fuaiupu “13. Matai Sa’o” o le Tulafono Tau Fa’aofi o Fanua ma Suafa 2020 le aiaia ai o le fa’atulagaina i le na’o le toa 5 o Matai Sa’o e mafai ona resitala.
Peita’i, i le mae’a o fa’atalanoaga fa’alaua’itele ma Samoa aoao, o le to’atele o le atunuu na fa’aleoina lo latou finagalo, e toe teuteuina lea aiaiga mo le fa’atulagaina o le aofa’i o Matai Sa’o, ina ia ‘aua ne’i fa’atapula’aina, ae tu’u lava fa’ai’uga i le aofa’i o Matai Sa’o i Suli ma Aiga i le latou filifiliga sa’oloto.
Na talosaga nisi, e fa’ata’atia i le taimi nei lea Tulafono se’i toe silasila i le fa’atapula’aina o Matai Sa’o auā o le galuega lena a Samoa o le vaai lelei o aiga ma faia fa’ai’uga talafeagai i mataupu patino i aiga.
I le soālaupulega fa’alaua’itele na soso’o ai, na fa’alauiloa ai loa le Fuaiupu 13 mo le aofa’i o Matai Sa’o, ua aveesea atoa ai aiaiga sa i ai muamua, ae suia i le Vaega Fou “13. Matai Sa’o”.
O lea Vaega Fou ua fa’amatalaina e fa’apea;
- o le filifiliga o le aofa’i o Matai Sa’o, e lē aveesea pe tu’uitiitia ai le agaga moni ma le tāua o Matai Sa’o;
- ii. o sauniga aloaia po’o saofa’i mo suafa Matai Sa’o ia fa’amalieina aiaiga o lo’o i le Fuaiupu 15 – Tulaga aloaia o le fa’ae’e atu o se Suafa Matai;
- iii. mo tiute tauave o le Matai Sa’o, ia nofomau i Samoa ma ia ta’imua e ta’ita’i lou aiga ma le nu’u e ala i ou tiute fa’amata’i sa’o e tatau ona fa’atino.
I le Fuaiupu fou 13 o le Tulafono o le Fa’amasinoga o Fanua ma Suafa 2020, o lo’o fa’ata’oto mai ai ta’iala e fesoasoani ai i le puipuia o le mamalu o Matai Sa’o, a’o le fa’ai’uga mo le filifilia o le aofa’i o Matai Sa’o o lo’o ta’oto lava i le uta ma le tofā mamao i le fa’ai’uga autasi a Suli ma Aiga.
(238)
