Faa-Samoa

Fuafua le Malo e Vavae Ese le Vaega o le Matagaluega o loo Vaaia le Poloketi Atina’e o Itumalo

"E tatau ona fa’ataatia lelei faiga faavae, o a mea lelei na a’oa’oina, fai. O a ni mea na fa’aletonu, aua le faia.”

November 23, 2025

313

O se tasi o fuafuaga a le Malo mo le faaleleia atili o le poloketi mo le atiina’eina o itumalo, o le tuueseese lea o le Matagaluega o Tina ma Tama’ita’i, Atina’e o Afioaga ma Agafesoota’i (Ministry of Women, Community and Social Development) ina ia tuto’atasi le vaega o Atina’e mo Itumalo – Community Development.

Saunoa le afioga i le Alii Palemia ia Laaulialemalietoa Leuatea Polataivao Fosi Schmidt i se feiloiga ma le vasega o tusitala i le vaiaso nei, o loo iai se fuafuaga e vaeluaina ai (restructure) le Matagaluega o Tina ma Tamaitai ina ia tutoatasi le vaega o Atinae mo Itumalo.

E mafua lenei fetuunaiga, ona e tusa ma le afa piliona tala e faamatuu atu i tua mo le atina’eina o le atunuu, i totonu o le lima tausaga.

Saunoa le Palemia, “E lē o se tupe laititi lea ua faamatu’u atu mo le poloketi. Lua miliona tala i le tausaga, $10miliona i le lima tausaga, $510 miliona i le 5 tausaga, e le’o se tupe laititi..”

Na saunoa fo’i le Palemia i le tele o tulaga e ao ona mata’itū i ma faaleleia ai le faagasologa o le poloketi.

“E tatau ona fa’ataatia lelei faiga faavae, o a mea lelei na a’oa’oina, fai. O a ni mea na fa’aletonu, aua le faia.”

O le Aso Faraile 14 Novema sa tapinia ai tusi apalai mo tofiga o Taitaifono o Fono Faavae lea sa tatala ai le avanoa, ua na o ē sa tauvā i le palota e mafai ona apalai atu iai.

Saunoa le Palemia, “O lea ua amata i le taitaifono leaga e lē tatau ona toe saofai se taitaifono e le faamaoni i totonu o Ofisa.

Sa saunoa Laaulialemalietoa ua iai faamatalaga ua taunuu atu i le Matagaluega, ma o loo faia iai suesuega i le faaaogaina o siaki o Fono Faavae i Ie vaitau o le faigapalota.

**Samoa’s leading provider of ICT Solutions.**

Ae o le Aso Faraile sa tuuina mai ai se faaiuga a le Faamasinoga, ma lisi mai ai siaki ua latou faamautinoaina, sa faaaoga mo faatosina, e le Sui Faipule o Faasaleleaga 1 le afioga ia Magele Sekati Fiaui i le taimi o Faigapalota.

O le mataupu o le Taitaifono o Fono Faavae, ua saunoa fo’i iai le taitai a le itu agai ia Tuilaepa Sailele Malielegaoi, o lona taofi, e leai se mafuaaga o le a faia ai lea fuafuaga o le faasalalau o tofiga taitaifono, ae o lea e iai Sui Faipule e pei ona iai i le paeaiga talu ai.

Na faaleo foi le atugaluga o le taitai o le itu agai, e le auai sona finagalo i fesuiaiga o loo tau tapena mo faiga faavae a le Poloketi.

“Ana alu lava i faiga faavae masani e leai a se mea o le a tau fuafua ai, e lė o se Malo faatoa tū atu nei o le Malo tuai lava. Faatoa o ese nei a ia Aperila ao latou lava e tasi lea sa faafoea maia le poloketi i le paeaiga ua mavae.”