Foai e le Ekalesia o le Au Pa’ia o Aso e Gata Ai le 2,700 Nofoa Faataavale ma le 800 To’oto’o mo Samoa

"O le pine fa’amau o lea galuega alofa, le 8 container tetele ta’i 40 futu, e tumu lelei i nofoa fa’ata’avalevale ma to’oto’o ua mafai ona auina mai e fesoasoani ai i le auaunaga a le Matāgaluega.."

0
188

Tusia: Pesetā Tusiga Taofiga, Sooupu a le Malo. E le o itiiti le galuega alofa a le Ekalesia o le Au Pa’ia o Aso e Gata Ai o lo’o faia pea mo le auaunaga a le Matāgaluega o le Soifua Mālōlōina i tausaga ta’itasi.

O le pine fa’amau o lea galuega alofa, le 8 container tetele ta’i 40 futu, e tumu lelei i nofoa fa’ata’avalevale ma to’oto’o ua mafai ona auina mai e fesoasoani ai i le auaunaga a le Matāgaluega aemaise le fa’asafuaina atu mo nai o tatou tagatānu’u o lo’o mo’omia lea auaunaga, talu mai le 2014.

Now available at our stores in Togafuafua and Salelologa.

I lea fesoasoani, ua manuia ai le faitau 1,000 o nai o tatou tagatānu’u, o lo’o fa’alagolago lo latou soifua i le to’oto’o po’o le nofoa fa’ata’avalevale fo’i. O se galuega alofa fa’aSamaria agalelei lea, o lo’o ofoina atu e le Ekalesia mo Samoa i tausaga ta’itasi.

I le taunu’u mai ai o le isi container fou i lenei vaiaso, na fa’apa’iaina ai a’o le’i tatalaina mo lona fa’aāogaina.

O se fiafiaga sili lea i le Minisitā o le Matāgaluega o le Soifua Mālōlōina iā Valasi Luapitoifanua To’ogamaga Tafito Selesele, e pei ona ia fa’ailoa i lana Saunoaga Autū.

Ata Pueina: Peseta Tusiga Taofiga.

“Ua tatou ofaga potopoto ma fa’atasi i lenei taeao matagofie, ona o le foa’i alofa a le Ekalesia Iesu Keriso o le Au Pa’ia o Aso e Gata Ai, le container 40 futu, tumu lelei i nofoa fa’ata’avalevale ma to’oto’o i ona itu’āiga ‘ese’ese ma e fou lava…

“E fesoasoani ma lagolago ai i le galuega fa’aleleia a le Mālō o Samoa mo ona tagatānu’u e i ai a’afiaga tumau o le soifua..

Samoa is the Home of Taula. Enjoy responsibly.

“O se tasi nei o anavatau na ‘ave i ai le fa’amuamua a le tatou Mālō ma le fa’anaunauta’iga ia fa’ateleina ma fa’amalosia le fa’atāuaina o aiātatau ma mana’oga fa’apitoa a ona tagata e i ai a’afiaga tumau o le soifua o lo’o i Samoa nei. Ua mae’a fo’i ona sainia e le Mālō o Samoa le maliliega fa’avāomālō i le fa’atāuaina o aiātatau a tagata e i ai manu’aga tumau o le soifua i le tausaga e 2014..

“O aiaiga ma ta’iala o nei foa’i, e lē mafai ona fa’aāogaina i totonu o maota gasegase ae tau lava o le fa’asafua atu ma tu’uina atu i tagata Samoa ta’ito’atasi e i ai a’afiaga tumau o le soifua. O lea sa fa’atalosagaina ai e le Matāgaluega nei le Ekalesia mo ni nofoa fa’ata’avalevale auā le auaunaga tau soifua mālōlōina i totonu o ona maota gasegase uma..

“Ma o lenei ua agalelei mai ai le Ekalesia ma tu’uina mai ai nofoa fa’ata’avalevale fou lava e 40 mo le Matāgaluega o le Soifua Mālōlōina (M.O.H.), e fesoasoani ai i le fa’aleleia o ana auaunaga i totonu o Falema’i uma i le atunu’u..

Saunoa le Minisita, o le faigāpa’aga a le Ekalesia o le Au Pa’ia o Aso e Gata Ai ma le Mālō, tauala mai i le Matāgaluega o le Soifua Mālōlōina, sa amatalia mai i le tausaga 2014, ma o lea o lo’o fa’aauau pea se’ia o’o mai i lenei tausaga.

“O le fa’amoemoe ma le naunauta’iga a le Ekalesia e fesoasoani ai mo tatou tagata a lo tatou atunu’u e i ai a’afiaga tumau o le soifua. E tauala mai i ana auaunaga o foa’i ma fesoasoani alofa i le lalolagi atoa, ua mafai ai ona tu’uina mai container 40 futu e tumu i nofoa fa’ata’avalevale ma to’oto’o ‘ese’ese i tausaga ta’itasi.

“Ua fa’aopoopoina le foa’i a le Ekalesia e ala i le fa’atupeina o oloa mana’omia ma mea faigaluega ma nisi o masini fa’apitoa e fa’aāogaina i le gaosia ma le fausia o ‘ā’ao (vae ma lima) fa’apipi’i ma nisi o mea faigaluega fa’apitoa e mana’omia ma fesoasoani ai i tagata e i ai a’afiaga tumau o le soifua, ua mafai lava ona gaosia ma fausia i Samoa nei e i latou ua uma ona a’oa’oina i nei tomai ma poto fa’apitoa i le fa’amalu a le Matāgaluega o le Soifua Mālōlōina..

“O le 8 ai nei o container ua foa’iina mai e le Ekalesia o le Au Pa’ia o Aso e Gata Ai mo Samoa talu mai le tausaga e 2014. I fa’amaumauga a le tatou Matāgaluega o le Soifua Mālōlōina, ua silia ma le 2,700 nofo fa’ata’avalevale ae silia ma le 800 to’oto’o ‘ese’ese ua mafai ona foa’iina fua mai mo Samoa..

“I le avea ai ma Minisitā o le Matāgaluega o le Soifua Mālōlōina, e fai ai a’u ma Sui o le Mālō Tuto’atasi o Samoa, e talia aloā’ia lenei foa’i tāua tele i lenei tausaga 2024, ma fa’aleoina fa’apitoa ai le agaga fa’afetai o le Mālō i le Ekalesia a Iesu Keriso o le Au Pa’ia o Aso e Gata Ai, i ona Ta’ita’i ma Pulega i Samoa nei, fa’atasi ai ma le Pasefika, aemaise le lalolagi atoa. Ona o nei fesoasoani ma nei auaunaga taugatā e lē taugofie ua foa’i fua ina mai mo Samoa i tausaga ta’itasi..

Delicious Cakes is now on the Maua App!

“Fa’afetai fa’apitoa fo’i i le Matāgaluega nei i ‘ai latou o lo’o gafa ma le va’aia lelei o nei aseta tāua, ma fa’atinoina le auaunaga auā nai o tatou tagatānu’u, mālō le galulue lē fa’alogologotigā auā le tautuaina o nai o tatou tagata o lo’o sulufa’i mai mo le mana’omia o la tatou fesoasoani faifaipea. Manatua ‘aua ne’i muta le fai mea lelei, ‘aua ne’i motusia le ola tautua alofa auā nai o tatou tagata fai mai..

“Fa’amoemoe o le ā tatou fa’aāogaina ma le tatau nei meaalofa ma fa’asoasoa atu ma le lelei, talafeagai ma fa’amaoni nei nofoa fa’ata’avalevale ma to’oto’o mo le manuia lautele o tatou tagata e i ai a’afiaga tumau o le soifua. Fa’atasi ai fo’i ma le tausia lelei, puipui malu, leoleo lelei ma fa’apelepele i ai ina ia umi le āoga.

“I totonu o Falema’i i le atunu’u, fa’aāoga ma le fa’aeteete, ‘aua le fa’atautala, ia umi pea ona lelei nei nofoa fa’ata’avalevale auā le tautuaina o nai o tatou tagatānu’u e sulufa’i atu mo togafitiga i Maota Gasegase i aso ta’itasi.”

Na toe talosaga ai le Minisitā i le Ekalesia o le Au Pa’ia o Aso e Gata Ai, pe mafai ona toe silasila ane le Ekalesia i nisi itu’āiga nofoa fa’ata’avalevale ma to’oto’o malolosi atu, nai lo meaalofa ua auina mai, ona ua maitauina ua lē gafatia e le malosi o ia nofoa fa’ata’avalevale ma to’oto’o ua tu’uina mai, le tino puta ma le lapopo’a o tagatānu’u Samoa o lo’o latou fa’aāogaina ia auaunaga.

Na ia tu’uālalo fo’i i le aufaigaluega, o lo’o latou va’aia ia meatotino, ina ia fa’amaumau lelei, ma ‘aua ne’i tu’usaunoa le fa’aāogaina o ia aseta tāua a lo tatou Mālō.

Ata Pu’eina: Pesetā Tusiga Taofiga

 


Tusiga Taofiga