Fausia le falepuipui fou i Vai’a’ata mo le Motu tele i Salafai

0
40

(OFISA O LE SO’OUPU); E tatau ona umasaina le falepuipui fou i Vai’a’ata ae le’i mae’a le tausaga fa’aletupe a le Malo i le masina o Iuni o le tausaga nei.

O le folasaga lea a le ta’ita’i o le Malo, Afioga Tuilaepa Lupesoliai Dr. Sailele Malielegaoi i le sauniga o le suaina o le ‘ele’ele mo le galuega toe fausiaina o le falepuipui i Vai’a’ata i Savai’i i le Aso Tofi o le vaiaso nei.

Saunoa le ta’ita’i o le Malo e faapea; “O se tasi nei o aso e faitau i aso tãua o galuega ma alafua ua mae’a ona faata’atitia e lō tatou Malo mo le puipuiga ma le saogalemu o le atunu’u.”

“Ua ave le fa’amamafa a le Malo ia mautinoa ua mautu ma malupuipuia falepuipui e le gata i Upolu ae fa’apea ma Savaii nei. Ua le manatu fa’apito le Malo i lana fa’amuamua na’o Upolu e pei ona i ai le falepuipui fou i Tanumalala lea toe o se aga tatala; ae o lea ua manatu ia mautu foi ma Savaii nei.”

 

Na ia faailoa foi o le fausiaina o nei falepuipui e mulimuli ta’i i tapula’a mo’omia ma fa’atulagana faa-va-o-malo mo falepuipui; ina ia mautinoa lona malupuipuia lelei ma le saogalemu i se tulaga e amanaia le soifua maloloina faapea ma vaega e manaomia le lelei mo soo se tagata soifua.

Sa molimauina le faamoemoe I Salafai e sui ole Minisita ole Kapeneta e aofia ai; Minisita o Galuega Papalii Unasa Niko Lee Hang, Minisita o Tupe Sili Epa Tuioti, Minisita o Falepuipui Tialavea Fea Leniu Tionisio Hunt, Minisita ole Soifua Maloloina Tuitama Dr. Talalelei Tuitama, Minisita o Tagata Tafafao Maimoa mai Fafo Sala Fata Pinati and Minisita o Laipa Lautafi Fio Selafi Purcell faatasi ai ma sui sinia ole Malo.

O le Aso 1 Me 2018, na pasia ai e le Kapeneta se tino-i-tupe e $600,000 mo le toe fausiaina o le falepuipui i Vai’a’ata.

O le falepuipui o lo’o i ai nei o ulua’i fale ia na fausia, ina ua fa’atoã tatala le falepuipui i Salafai nei ma ua mautinoa lona lē toe gafatia ma lē toe saogalemu mo le nonofo ai o i latou o lo’o tuli faasalaga. E le gata ua le toe saogalemu ma malupuipuia; ae e pumo’omo’o ma le gafatia se numera to’atele o pagota e ova atu ma se limasefulu (50).

E 45 pagota o loo tuli fa’asalaga i Vai’a’ata nei ma o le fa’amoemoe e si’itia lea numera i le 100 pagota o le a fa’amatuu mai i Vai’a’ata auã le tuli’ina o latou fa’asalaga ma le galueaina o atina’e o taumafai i ai le Malo.