“Afai ae to mai le pule a lo’u itumalo e filifilia ai a’u ou te tau’avea le tofi o le itumalo, o le a ave la’u faamuamua i le faatuina o se kolisi aoga i totonu o Vaa-o-Fonoti, faaleleia auala, sailia maketi mo mea taulima ma nisi avanoa mo galuega faavaitaimi, faapea se falema’i mo lo’u itumalo.”
O le saunoaga lea o le tofi faaolioli o Vaa-o-Fonoti, Feutaga’imealelei Osovale Brown, o se sui tauva mai le vaega faaupufai fou ua faaigoaina o le Constitution Democracy Republican Party.
E le o se taimi muamua lea ua taumafai mai ai Feutugaimealelei i faigapalota a Samoa. Sa tauva o ia i faigapalota o le 2011, 2016 ma le 2021. O se tasi sa lagolagoina le Tautua Samoa, faapea foi la le Samoa First. Ae o le palota talu ai, sa ia tauaveina ai le fu’a a le Faatuatua le Atua Samoa ua Tasi (FAST).
Saunoa Feutagaimealelei i se faatalatalanoaga ma le SGN, “O Vaa Fonoti, pau lea o le itumalo e leai se kolisi o iai, ae o le matou itumalo o se itumalo tele, ae e le faigofie le ma’ea o aoga Tulaga Lua a le fanau, ona saili solo mai lea o ni kolisi e fa’aauau ai aoga…
“E vaai ma le alofa o le faigata o auala e savalia mai e fanau, ma ua tatau ona ave iai le faamuamua.”
Sa ia saunoa foi i le tulaga o auala o lona itumalo, ma faapea mai, e lei amanaia mai e le faigamalo ua mavae atu, faapea foi ma le taimi nei.
“O loo matauina lava nao le matou auala e tanutanu i le asuemu, pei o loo ela le silasila le Malo talu ai ma le Malo o iai le taimi nei auala o Fagaloa..”
Sa faasoa foi le sui tauva, o loo ave lana faamuamua i le sailia o se maketi i Amerika, Hawaii ma Tuituila e lauina atu ai mea taulima, faapea foi ni avanoa faigaluega faavaitaimi aua se seleni e atiinae ai aiga o su8 oh
Sa ia saunoa foi i le faatuina o se falemai o le itumalo, “Ua tatau ona iai se falema’i totonu lou itumalo, a tulai mai se gasegase, e tele lava na faaletonu ao taumafai mai i Motootua ona o le leaga o auala, o vaega ia o le a ave iai le faamuamua pe afai e manuia le palota.”
O Feutaga’imealelei Osovale Brown, e mai le afioaga o Lona ma Uafato i Fagaloa. Ua 56 tausaga o lona soifua ma sa aoaoina i le Kolisi o Pesega. Sa malaga atu ai I Niu Sila ma Ausetalia mo le faa’auauina o aoaoga ma aumau ai mo le 30 tausaga.
