E silia ma le 20 vaa na faapaia i le taeao nei ma le faamoemoe e fa’aaogaina mo le taamilosaga alo vaa faavaomalo o loo talimalo ai Samoa i le vaiaso o le a sau.
Na faatumulia le matafaga i Vaisigano i au taaalo mai atunuu i fafo faapea le au a Samoa, e molimauina le sauniga sa faapaia ai vaa o le a fa’aaogaina.
O le saunoaga aami na saunoa iai le Minisita o Tagata Tafafao Maimoa mai Fafo, le afioga Toeolesulusulu Cedric Schuster Pose.
Sa tuualalo le Minisita i le Asosi Alo Vaa a Samoa, ina ia fa’aaogaina vaa pe a maea le taamilosaga o loo faia nei, e faalautele atu ai le taaloga i afioaga i tua. “Ae aua nei na o inei i le taulaga.”
Na maua le avanoa e fesiligia ai lē sa ia amata faavaeina mai lenei taaloga i Samoa nei, le afioga ia Tuatagaloa Joe Annandale.
Saunoa Tuatagaloa, na faavae mai lenei taaloga i Samoa i le tausaga 1987, ao avea Tupuola Tamasese Efi ma Palemia.
“Sa fesoasoani tele i le tau faavaeina mai o lenei taaloga, ma e tele ni luitau sa iai…
“E le gata i tulaga tau tupe, aemaise o le tau faailoaina o le taaloga ina ia toatele nisi e tosina atu iai ma atiinaeina ai le taaloga..”
Saunoa Tuatagaloa, o lena taimi, o loo laiti lava i latou lea ua avea nei ma taiulu o le faagatama i Samoa nei e pei o le afioga ia Su’a Ulugia Jay Schuster, lea e taulamua i lenei faamoemoe.
“Ae o lea ua maualuga leaasaga ua oo iai le atiinaeina o le alo vaa i Samoa nei, ma avea ma se taaloga ua fiafia iai le toatele, ma faamanuiaina ai foi alo ma fanau, ae maise o le toatele o i latou o loo tausinio i lenei taaloga.”
O vaa e pei ona faapaiaina sa fausia i le uga (fiber glass) i totonu o Tahiti ma sa faatupeina i se fesoasoani a le tatou Malo.
O le Aso Toanai o le a faatino ai i Apia se solo mo au taaalo uma, ae o le Aso Gafua o le a amata ai le taamilosaga alo vaa faavaomalo.
E 28 atunuu o loo aumai a latou au vaa, lea e fua ai le faitau e oo atu i le 3000 le aofai o turisi o le a asiasi mai ai i Samoa nei. Ua toatele nisi o au vaa ua taunuu mai i Samoa ma ua vaaia foi le faatumulia o faletalimalo, o faleaiga, faapea ma le siitia o faatau i faleoloa ma maketi.
