Faamalosi e se Tamā 43 Tausaga se Teineitiiti 10 Tausaga

0
1722

16 September 2019 Mulinuu Apia Samoa. Sa moliaina se tamā e 43 ona tausaga i le falepuipui ina ua ia faamalosi ma faia ni uiga mataga i se teneitiiti e na o le 10 tausaga lona matua.

Sa faasaina e le Faamasinoga ona faasalalau suafa uma o lē ua aafia faapea foi ma lē ua molia ona o le vavalalata o le laua fesootaiga faa le aiga.

O ia soligatulafono na aliae mai i le masina o Mati o le tausaga ua mavae ina ua agai atu lē ua molia ma lona toalua i matua o lē ua aafia ma faanoi mai e sau e fai faatasi a latou meaaoga ma le la fanau.

Na faataga e matua o lē na aafia. Maea ai o meaaoga na fai ai lē ua molia i lē ua aafia ma lana fanau, latou te o e tae mai popo i tuapa o lo latou fale.

E taua i alumalumaga o le Faamasingoa, ao tūtū le teneitiiti ua aafia i lalo o le niu, sa faapea ona opoopo mai e le tamā lea ua molia, ma faatino loa iai uiga mataga ma faamalosi ia te ia. Na maea ona ave lea e lenei tama le $5 tala i le ua aafia ma fai iai, e aua nei pisa i se isi.

O le lona lua na toe fai ai foi e le tamā lenei uiga mataga i lē ua aafia, na piki ai e le ua molia ma o i se fanua tuufua ma ia faatino foi iai uiga mataga. Na maea toe ave foi iai le $5 tala.

O le faatolu o taimi na faamalosiina ai e lenei lava tamā le teneitiiti e na o le 10 tausaga lona matua, na ia ave ai foi iai le tupe e $3 tala.

I le faaiuga na tuuina mai e Justice Leiataualesa, na ia faailoa mai ai le mamafa o le tilotilo a le Faamasinoga i le tulaga o ituaiga soligatulafono faapenei, e ala lea i le maualuga o le faasalaga faafalepuipui e tuuina atu.

Na talosagaina e leoleo le 12 tausaga e amata ai le faasalaga faafalepuipui ma talia ai e le faamasinoga i tulaga e faatolu ona faatino e lē ua molia le solitulafono lenei i ona faatinoga eseese.

E fitu le aofai o moliaga o le sexual connection tusa ai ma le vaega 58 (1) o le Crimes Act 2013.

O le faasalaga maualuga lava o moliaga tau feusuaiga fesootai ma se tamaitiiti i lalo ifo o le 12 tausaga – e solo atoa i le falepuipui.

Na ioeina e lē ua molia moliaga nei e fitu peitai, na te lei ioeina i le taimi muamua na tuuina atu ai iā te ia ia moliaga.

I le faaiuga a le faamasino Leiataualesa Daryl Clark na ia taua ai o tulaga e ogaoga pe matuiā le solitulafono a le ua molia.

1. Tulaga maaleale o le ua aafia.
2. Vava mamao tausaga, e 43 ae na o le 10 tausaga o lenei afafine.
3. O le faia faatolu lea o le solitulafono.
4. O le talitonuga o matua atoa ma le ua aafia I le ua molia – trust.

Sa talosaga leoleo e amata le faasalaga i le 12 tausaga i le falepuipui ma sa talia e le faamasinoga i itu e faatolu na faatino e le ua molia le solitulafono atoa ai ma le manino o le fuafuaina lelei o le solitulafono.

Sa toese mai le 9 masina o le lelei o talaaga o lona olaga, 1 le tausaga toese o lona salamo moni, 1 le tausaga toese ona o faasalaga a le nuu pei ona faatea ai mo le 18 masina. Toese foi mo lona taliaina o moliaga e ui na tuai. Sa tuuina mai ai loa le 7 tausaga ma le 9 masina i le falepuipui.

O isi moliaga e ono e 3 tausaga ma le 10 masina I le falepuipui ma e tuli faatasi uma faasalaga o moliaga nei ma le faasalaga o le moliaga muamua. O lona uiga e 7 tausaga ma le 9 masina.


Maina Vai

Maina Vai of Fasitoouta is a mother of five. Maina has recently graduated with a Certificate of Customary Adjudication from the National University of Samoa.
Maina Vai