Faalauiloa e le Fofoga Fetalai se Faafitauli Ogaoga ua Tulai mai i le Tuufaatasia o Tulafono Pasia

I le amatalia o le fonotaga a le Palemene o Samoa i le Aso Lua 18 Ianuari sa faasilasila aloaia mai ai e le Fofoga Fetalai, Hon Papalii Lio Taeu Masipau, se mataupu ogaoga ua tulai mai i Samoa.

Sa saunoa manino le Fofoga Fetalai o le Maota e faapea:

“E ao ona ou faamanino mo le silafia o lenei Maota le faafitauli ogaoga ua tulai mai i le tuufaatasia o tulafono e pasia e le Fono Aoao Faitulafono mo le tuuina iai o le maliega a le Ao o le Malo..

“O lenei faafitauli na molimauina i le faagasologa o le faaofiina o o nisi o teuteuga o le tulafono – Teuteuga o le Faavae 2020 ma le Tulafono o Fanua ma Suafa 2020 e lo tatou Ofisa i le masina o Ianuari 2021..

“E tusa ma suesuega na faatinoina, faatoa māua lea faaletonu ina ua faailoa mai e le Loia Sili se eseesega o aiaiga..

Ua taoto aiaiga mo le faasologa o le galuega, peitai, o le faasologa sa faataunuuina ai, ua le tusa lea ma ala o le Tulafono..

“O le mea moni ua fesētai kopi na faatino ai lea gaioiga, ma kopi moni o ia Tulafono na tuuina iai le maliega a le Ao o le Malo..

“Ua faamaonia foi le eseese o kopi o Tulafono o loo faatau atu i le atunuu, ma le kopi o loo i luga o upega tafailagi a le Palemene, faapea le kopi o loo faaogaina e le Ofisa o le Loia Sili..

“O le popolega o le Nofoa, ona e ono afaina ai le faatautaiga, a le galuega a le Faamasinoga.. ae faapea foi le nofo silafia a le atunuu lautele o le taatiaga sao o a tatou Tulafono. Ua mautinoa foi se tulaga lē mautonu a le atunuu poo fea le lomiga sa’o o ia Tulafono..

“O le masina o Tesema 2021, na faatoa oo mai ai lenei mataupu i le Ofisa o le Fofoga Fetalai, ma taumafai ai loa e saili poo fea o loo taoto ai le sa’o ma le tonu o le faafitauli; ma faatonuina ai loa le Failautusi ina ia faatino se suesuega mo le faamaninoina o le afuaga o lenei faafitauli..

“Ua maea ona faatino le suesuega e le Ofisa o le Failautusi o le Fono Aoao Faitulafono, ma ua ou taulimaina foi le ripoti..

“E iai le talitonuga a le Nofoa, e lē tatau ona taatia umi, pe taoto ai faaleiloga lenei faafitauli – ona o mataupu e fesootai ma mataupu e iai le talitonuga, o loo tagofia e le Faamasinoga. E le gata i lea, ae o mataupu faale Faamasinoga a le atunuu lautele o loo feagai ma i latou i le taimi nei..

“O se mataupu ma se faafitauli e patino lava i le Palemene lona toe poupouina. Na o le Palemene foi na te mafai ona ia faamautu ma faatulaga mo le sagatonu ai o le faatautaiga o le pitolaau a le Faamasinoga, mo le amiotonu ma le faamaoni o faaiuga o mataupu a le atunuu o loo faatoai atu i le Faamasinoga.

E talu ai ona o aiaiga o le faagasologa o le tatou galuega, e le mafai ona tatou sopoloa i aiaiga o tatou Tulafono Tumau, ae ua ou vave faailoa, ona o se mataupu e ao ona faamanino i le faafofoga tapuai mai a le atunuu..

“O le taimi muamua lea ua tulai mai ai se faaletonu faapea, ma ua faia le faaiuga a le Nofoa e tusa ma faiga masani; ma ua tatau ona faataatia le lipoti o lea suesuega mo le silafia e le Maota..

“E tusa ai ma Tulafono Tumau 139, e ao ona faamuamua le Tulafono Taufaaofi o le fefaatauina o Tupe, i lo nisi lava galuega a le Maota se ia vagana ua maea. Tatou te usitaia lava a tatou Tulafono Tumau..

“Pe a maea ona tatou tagofia le Tala Faopopo o le Tupe o le a lauliliuina, ona faatulaga loa lea o lenei galuega mo galuega o le aso, mo le amataga o le isi aso fono e sosoo ai..

“E le talia foi e le Nofoa ona afea se saunoaga i lenei mataupu. O le a ou toe faapea atu, e le talia e le Nofoa se saunoaga i lenei mataupu. Ae o le a maua i luma ni avanoa mo se saunoaga pe a faagasolo le tatou galuega.”

E tusa ai ma lipoti a lau Samoa Global News ina ua faailoa mai e le tamaitai Palemia lenei faafitauli i le masina o Tesema ua mavae atu nei, o loo iai vaega o le Tulafono o loo tuuina mai I upega tafailagi, e eseese ma le Tulafono sa taufaaofi.

O le asõ Aso Lulu 19 o Ianuari e ono faataatia ai le lipoti o le suesuega o lenei mataupu sa faatautaia e le Ofisa o le Palemene, mo le silafia e le atunuu lautele.

O nisi o vaega e eseese ai kopi o Tulafono, e patino tonu lea i le filifilia o se Sui Peresitene (Deputy) mo le Faamasinoga o Fanua ma Suafa. O i tonu sa suesue atu ai e le Loia Sili nei Tulafono, ma maua ai loa ni eseesega o loo tulai mai.

(11)