Tusia: Pesetā Tusiga Taofiga, Sooupu a le Malo. E lē o nofonofo le Mālō i le galuega fesoasoani mo le tineia o nofoaga o lo’o tau tu’ufua ai namu, o lo’o afua mai ai le siama o le fiva ponāivi o lo’o mama’i ai le to’atele o fanauiti i le atunu’u.
O le pine fa’amau o lea galuega fītā, o le tapunia uma o ā’oga i le atunu’u i le savali ai i le lua vaiaso, se’ia taumafai e fa’amamā nofoaga o lo’o to’a ai le suāvai ma faga faleā’oga ina ia tineia ai le toe i ai o ni namu o lo’o fe’aveā’ia lea siama.
I le feiloā’iga a Tusitala ma le Komiti o Fa’alavelave Tutupu Fa’afuase’i ma le Matuiā o lo’o Ta’ita’ifono ai le afioga i le Palemia iā Fiame Naomi Mataafa, na talatala manino ai le atoaga o lenei galuega tele o fa’agasoloina nei.
Saunoa Fiame; “O le lipoti i le taeao nei mai le Matāgaluega o le Soifua Mālōlōina, Aso Gafua, 4 Aokuso 2025, ua o’o atu i le 5,670 i latou ua alia’e ai āuga o le fiva ponāivi talu mai Iānuari o le tausaga nei, ma e 2,619 ua fa’amaonia i su’esu’ega fa’apitoa a le falema’i (laboratory test) ua a’afia i le fa’ama’i.
“Ua fa’ailoa mai fo’i e le Soifua Mālōlōina, i le vaiaso ua tuana’i, e 1,446 gasegase fou ua pesia i Upolu ma Savai’i, e aofia ai le 342 ua fa’amaonia i su’esu’ega fa’afoma’i.
“Ua fa’ailoa fa’alaua’itele e le Soifua Mālōlōina itu’āiga (serotypes) o vairasi e lua o le fiva ponāivi o lo’o pepesi i le atunu’u..
“O le DENV-1 ua fa’amauina e 85% o i latou ua a’afia ua gasegase ai ma le DENV-2 e 15% o i latou ua a’afia ua gasegase ai. Ua fa’ailoa mai fo’i, o le 71% o i latou ua a’afia e i lalo ifo o le 15 tausaga le mātutua..
“E o’o mai i le asō, e to’afā [4] ua fa’amaonia, ma le to’atasi o lo’o masalomia ua māliliu i lenei fa’ama’i.
“I le taimi nei, e 115 gasegase sa taofia i le falema’i. E 64 gasegase ua toe manuia ma te’a i tua i o latou ‘āiga, ae 51 gasegase o lo’o taofia pea. E leai se tasi o taofia i le vaega mo gasegase tigāina le ICU..
“O lo’o fa’aauau pea galuega a le Ofisa Tutotonu o Fa’alavelave Fa’afuase’i a le Atunu’u [N.E.O.C.], e fa’agasolo polokalame e fa’atama’ia ai nofoaga o tautu’ufua ai namu, e aofia ai vaega nei;
• Fagaina [fumigation] o nu’u, ā’oga ma nofoaga faitele fa’apea Ofisa Faigaluega;
• Fagaina o faleā’oga e 225 i Upolu ma Manono, ma faleā’oga e 97 i Savai’i, fa’apea fo’i ma le Iunivesitē o Samoa, Iunivesitē o le Pasefika ma le Tesese;
• Fagaina o le falema’i fa’aitumālō uma i Upolu ma Manono;
• Fa’atino galuega mo vaega o le atunu’u ua maitauina o lo’o mauāluga ai i latou ua a’afia;
• Si’itia o le auauanaga a le Matāgaluega ma le Koluse Mūmū mo paina toto fa’aleoleo mo ni gasegase tigāina;
• Fa’amamāina o ālavai;
• Aoina o lapisi tetele i le atunu’u atoa, ua fa’atulaga mo le Aso 13, Aso 20 ma le Aso 27 Aokuso;
• Asiasia o ‘āiga e 2,045 i nu’u o lo’o mauāluga ai le tulaga lamatia, e ala i le polokalame a le ‘Āiga Manuia, Nu’u Manuia a le Matāgaluega o Tinā ma Tama’ita’i, Atinae o Afio’aga ma Agafeso’ota’i.
“Le atunu’u e, tatou te momoe ma manū ae sau mala e atia’e. O lenei ua lofia i tatou i lenei lu’itau mo le soifua mālōlōina i lenei vaitau.
“Ou te momoli atu fa’amaisega i ‘āiga ma mātua o fanau ua māliliu i lenei fa’ama’i. Tatou te tau fai ioe fa’atasi, e lē faigofie mafutaga mamaē ma pēlē a mātua ma fanau ae tete’a ona o le oti..
“Peita’i, e maua lo tatou mapusaga i ‘ā’ao o Iesu, ua na’o Ia lo tatou fa’amafanafanaga. Ia fa’amaise le Agaga o le Atua i ‘āiga ma mātua fa’avauvau..
“E tu’uālalo atu pea lo tatou Mālō e pei ona taumafai atu le Soifua Mālōlōina i le fa’atāuaina o le tumamā lautele, aemaise lava i le si’osi’omaga o ‘āiga ma nu’u..
“Tatou galulue fa’atasi e fa’amamā maota ma tuā maota ina ia fa’atamaina nofoaga o lo’o tu’ufua ai namu. O lo’o taumafai atu pea le galuega a Matāgaluega a le Mālō mo le fagaina o nisi o nofoaga, aemaise faleā’oga ma falema’i ina ia tineia ai le namu..
“Mo mātua, o le fautuaga, va’ai vave se foma’i pe afai ua alia’e ni āuga o le fa’ama’i i le fanau. ‘Aua le fa’atali, ‘aua fo’i le avea i ni fofō Samoa, ae vave va’ai se foma’i, o le mau tau’ave fa’alesifua mālōlōina, e sili lava le puipuia nai lo le tau togafitia..
“Samoa e, tatou galulue fa’atasi e tali atu i lenei fa’ama’i ua a’afia ai si o tatou atunu’u. Tatou fa’atuatua pea ma tatou tatalo ma galulue, auā o le Atua e i ai le fa’amalologa sili i ona ‘ā’ao alofa.”
Tuesday at Taumeasina Island Resort!
- 194,267 Tagatanuu o Samoa sa maua le ta’i $150 tala - June 28, 2026
- A Fealofani tatou o Ta’ita’i – e Toafilemu foi le Atunu’u - June 27, 2026
- Pāsia Aloaia le Tala Faatatau Autu o le Tupe 2026/2027 - June 27, 2026
