Fa’afotutupu o le Suafa Tuala i Maota-Sā i Leauva’a

December 24, 2025

237

E silia ma le 100 le aofa’i o i latou na fa’afotutupu ai le suafa Tuala i Maota-Sā i Leauvaa i le Aso Toanai na mavae atu nei. Saunoa se tasi o sui o le aiga, o i latou e tupuga mai i foaifale e ono o Tauva, Taetafe, Lausului, Paola, Poko ma Faivai; o matagi tetele ia o Maota-Sā.

“A tu’ufaatasi tino ia e ono e silia ma le toa 100 suafa na faatino ai le faamoemoe.”

Saunoa se tasi o tino matua o loo faauluulu iai le taitaiga o le aiga ia Tuala Olivetti Ah Him, ua lata i le 30 tausaga faatoa toe faatino lea o ni nofo a le aiga.

Ua lata i le 30 tausaga faatoa toe a’e lea o le tofa e fai ni nofo e tausia ma tautuaina le aiga, ekalesia ma le nuu.”

“O le silasila a i matou o loo tausia le aiga, masalo o le isi 30-40 tausaga i le lumana’i fa’atoa toe faatino ai nisi nofo fou…”

Saunoa Tuala, e fuafua lava le tofā ina ia lava nisi e tausia itu tino eseese o le aiga, ma mata’itu le tōesea o nisi, poo le malaga atu i atunuu i fafo, poo le valaau paia ai le Atua.

“Ae o le matou talitonuga, ua lava ma totoe ia suafa e tausia le aiga mo le isi 30 tausaga..”

Sa fesiligia Tuala Oli pe aisea ua umi ai ona faatali le toe faatinoga o nisi o suafa, ma na ia faamanino,

“O le foaifale o le Maota-Sā, e ese lava lona fa’atautaiga. O le Maota-Sā na talia le Ekalesia Katoliko i Savaii i Lelatele, i le tausaga e 1845 ma e matou te le soona faia foi ni fa’aiuga ona o le Maota-Sā e faamemelo iai Leauvaa.. ma e fai fuafua foi ana faaiuga..”

“Ua silasila fo’i la i latou o loo tausia le aiga, ma ua matou talitonu, ua manaomia nisi e tausaia le aiga e pei ona ia le asō..”

E silia ma le afa miliona talã le seleni na faaalu i le faatinoga o le faamoemoe, ma e tusa ma le $600 afe talā le aofai o saoga e aofia ai ma va-i-matai poo matai tautua sa faatino.

O le suafa Tuala e ova ma le to’a 100 e ta’i $5,000 tala a le nofo ma le ie tele, ae o saoga mo vaimatai e ta’i $1000 tala, ta’i $500 isi ma suafa fa’afaleupolu e ta’i $300 tala.

I le faamanuiaina o nofo fou na tu’ualalo ai le sa’o fetalai o Tevaga Vailua iā i latou ua seei ane i le suafa Tuala ina ia tautuana le tautuaina o le nuu.

“O faiga matai uma lava faapenei e na’o le omai lava o i latou o loo aumau i atunuu mamao e avatu suafa Tuala ma le Salã ona ona toe malaga lea i fafo, ae leai lava ma ni tou tautua e toe omai e toe fai i le nuu ae o lo’o pologa lava tagata o loo nonofo i totonu o le nuu e fai meafai i totonu o le nuu.”

“O le maitau a Tevaga e toalaiti lava i latou e mae’a nofo ona aumau ai lava lea i totonu o le nuu e tautua.”

Saunoa Tevaga o le taua o le faaaliga na fai ona e tai pei o se faiga o se ata faaemo e nao le emo mai a e fai matai ma mou ao le faiga o le nuu e leai se sao o loo faia i totonu o le afioaga.