Saunoaga a le Palemia: Feiloaiga ma Komiti Fa’atonu Fa’alapotopotoga a le Malo

December 24, 2025

126

Saunoaga a le Palemia o Samoa Hon Laaulialemalietoa Leuatea Polataivao Fosi SSchmid i se mua’i feiloā’iga a le Palemia ma le Kapeneta, ma Taitaifono ma Sui o Komiti Fa’atonu o Faalapotopotoga Tumaoti a le Malo, Aso Faraile 19 Tesema 2025.

Lau Susuga i le Ta’ita’i o le Sauniga, Lau afioga i le Sui Palemia ma Minisita o le Kapeneta,

Taitaifono ma Faatonu o Komiti Faatonu o Faalapotopotoga a le Malo,

Talofa, Talofa lava.

Manatu o le a ou le toe agai i Utumaau o lea ua maea ona paelago e le Fofoga o le aso Paia, Sa ma Faiga o le tatou aso ma le taeao na liugalua. Ua maea foi ona paniniu lo tatou Va Tapuia ma le Atua e ala I le faafetai ua molia e le susuga i le faafeagaiga– fai lena mo I tatou.

O le asō, o lea ua tulafoga le manu na saili mafua Ua totō I le upega lupe o le seuga aua lenei aso ma le tatou fesilafaiga Ia saga maualuga ai pea le viiga o le Atua ona o mea silisili ua ia saunia mo I tatou.

Ae o le a agai sao loa se faamatalaga e tusa ma le auga o aute o lenei aso

E muamua ona ou faatalofa ma ofo alofa atu i Taitaifono ma Faatonu o Komiti Faatonu, o le tatou Independent Selection Committee, aemaise Sili o Matagaluega ma Faalapotopotoga ua potopoto nei.

O le ulua’i taimi lenei ua faatinoina ai lenei mafutaga talu ona seei mai lo tatou Malo. Ma ou te manatu, o le asō, ua na o se amataga o mafutaga faifaipea tatou te faasoa ai e le gata e faailoa atu anavatau a le tatou Malo, e fuafua iai galuega a Faalapotopotoga, ae e iai foi lo’u naunautaiga ia tatou faasoa i taunuuga o galuega.

**The best ICT Solutions firm in Samoa and the Pacific.**

Ao nisi o mataupu poo fuataga e tatau ona toe timata ai galuega faatino e ala i Faiga Faavae, aemaise ni iloiloga e moomia i Tulafono ma Tulafono Faatonutonu, e faaleleia atili ai taunuuga o galuega a Faalapotopotoga a le Malo.

E le tau faailoaina le sao taua o Faalapotopotoga a le Malo i le atina’e ina o le tamaoaiga o le atunuu, a o le sili o na mea uma, o le tele o auaunaga moomia e pei o le suavai, eletise, eleeele, femalaga’iga ma tupe fa’aavanoaina mo nonogatupe e mama tului, o anavatau ia a tatou Faalapotopotoga.

O Faalapotopotoga latou te faatupulaia le tamaoaiga i auaunaga tuuina atu aemaise le faafaigaluega o tagata i o latou tomai ma agavaa moomia. Ae le gata i lea, e faama’ite foi e Komiti Faatonu ma Pulega faatinoga o galuega i Pulega lelei ina ia le gata e ausia anavatau o lo o i Tulafono ma Faiga Faavae, a ia mautinoa le soifua lelei o le atunuu i auaunaga tuuina atu.

E pei ona silafia e le mamalu ua aofia nei, o loo faagasolo galuega toe fetu’unai a le tatou Matagaluega (poo le MPE) mo le iloiloina o nisi o Faiga Faavae tetele o le Umiaina o Faalapotopotoga, o le lesitalaina o Faalapotopotoga Tau Fefaatauaiga i lalo o le Tulafono o Kamupani 2001, faatasi ai ma teuteuga o lana Tulafono Autu – Tulafono o Faalapotopotoga 2001 e atagia ai Faiga Faavae o Noatiaga o Galuega (poo CSOs).

O le filifilia o Ofisa Sili o Pulega a Faalapotopotoga a le Malo, o le faamautuina o le Auivi o Faiga Faapaaga (poo Public Private Partnerships Framework) aemaise isi Faiga Faavae e faamalosia ai pulega lelei o tupe ina ia ausia e Faalapotopotoga uma a latou matafaioi faavae i lalo o le Tulafono o Faalapotopotoga a le Malo 2001, ae faapea foi Tulafono na faavaeina ai Faalapotopotoga taitasi.

E le o māmā foi le vaai a le Kapeneta ma le tatou Malo i luitau o loo feagai pea ma tatou Faalapotopotoga, o nisi o faafitauli e mafai ona fofo alamea lava e Komiti Faatonu, a o nisi foi o faafitauli e mafua mai fafo atu o le tatou siosiomaga, ma e faigata lava ona faatino i ai se fofo i se taimi vave.

O la matou fautuaga, ia tatou galulue faatasi, ia lalaga faatasi fuafuaga a tatou Faalapotopotoga ma le alafua ua agai i ai la tatou Malo.

Ia taulamua ia i tatou Komiti Faatonu ona faatinoina Pulega Lelei, ma atagia i a tatou faaiuga fai le fesoasoani ina ia siitia ai le soifua fiafia o tatou tagata nuu.

Ia solomua foi i a tatou Faalapotopotoga ona usitaia moomiaga o Tulafono mo le tuuina mai o Lipoti i le maea ai o tausaga faa le tupe taitasi.

O lea ou te maitauina, mai le Fono Aoao a le Palemene i le vaiaso nei, na o le fa (4) Faalapotopotoga ua tuuina atu a latou Annual Report 2025 i le Palemene. O le FESA, Samoa Ports Authority, SROS, ma le Samoa Post, faatasi ai ma le tatou MPE.

O le fesili, afai o lo o mafaia e Faalapotopotoga nei e fa ona tuuina atu Lipoti i le Palemene e tusa ai ma aiaiga o le Tulafono, ae aisea e le mafai ai e isi Faalapotopotoga? E ono fesiligia ai foi galuega a le Taitaifono ma Komiti Faatonu, ma o lea e manino foi aulape i le Tulafono i Komiti Faatonu pe a le tuuina atu Lipoti Faa le Tausaga i totonu o le fa masina, I le maea ai o le tausaga faa le tupe.

UTOS - Important Reminder — UTOS – Important Reminder

O le lu’i lena mo isi tatou Faalapotopotoga e 23, ina ia oo atu i le isi fonotaga a le Palemene i le tausaga fou, ua tuuina uma i le Fono Aoao a Palemene a outou Lipoti faa le tausaga.

Accountability is a responsibility – O le tali atu e ala i Lipoti o taunuuga o galuega, o le matafaioi lena a Komiti Faatonu. E le mafai ona fesiligia sa tatou auaunaga poo lelei pe tatau ona toe siitia, pe a le tuuina atu nei lipoti.

Matou te faamalosiau atu pea i a outou afioga i Taitaifono, ma Komiti Faatonu o a tatou Faalapotopotoga, ia tatou aga’i faatasi ma le manulauti a le tatou Malo lenei, ia siitia le soifua manuia o si o tatou atunuu e ala i auaunaga o lo o tuuina atu e tatou Faalapotopotoga.

Agalelei mai le Alii i lo outou valaauina. Ia tulituliloaina pea e manuia o lo tatou Atua outou faiva ma tiute aemaise le valaauina. Avea foi lenei avanoa matou te faamanuia atu ai le Kerisimasi ma se Tausaga Fou manuia.

Soifua ma ia manuia.