E 44 tausaga o se tamā mai le afioaga o Faleatiu ua faasala nei mo le fā tausaga i le falepuipui ina ua faamaonia lona faia o sootaga taufeusuaiga i se tinā ao iai lana tama lua tausaga.
O Malili Siafolau na molia i moliaga e tolu. O le faia o sootaga faafeusuaiga faasolitulafono (unlawful sexual connection), o le faaoo lima (common assult) ma le uumia o se aupega matautia (armed with a dangerous weapon).
E lei iai ni moliaga e faatatau i le aafia ai o le pepe 2 tausaga le matua, lea sa iai i le taimi na sauaina ai ma taumafai ai lea alii e fai amioga mataga i le tinā.
I tolaulauga o lenei mataupu na folasia ai e le itu a leoleo, o le Aso 22 Iulai 2022, na afea ai e Malili le fale o le tina na aafia, ina ua tau lata i le afiafi ua pogipogi. Sa ia fesili mo se ipu ti. Na tali ane le tina ma ave ifo iai le ipu ti. Na faapea ifo Malili e uma loa ona inu le ipu ti ona alu lea.
Ae o lea taimi ua na o se tina 26 tausaga ma lana tama tama, e lua tausaga o i le la fale.
I faamatalaga a leoleo, ina ua ma’ea ona taumafa le ipu ti a Malili ona nofonofo lea i le fale o le tina ma lana tama. Na faapea ifo le tina, e sili le alu loa.
Na savali i fafo Malili mai le fale o le tina, ae na toe agai ane o ia ma le maa o loo ia umia, ma togi ai le tina. Na lavea le pito i tua o le ulu o le tina ma pa’u ai lalo, lea e mafua ai le moliaga o le common assault.
O le molimau a le tina na faailoa i leoleo, na le atoatoa lona malosi i lea taimi ae na taumafai ifo lava ona ua tagi si ana tama.
Ae o le taimi lea na faia ai loa e lē ua molia ni sootaga tau feusuaiga agai le tinā 26 tausaga, ao iai si ana tama.
E lē o iai le tama o le aiga i lea taimi. O se maliu sa fai i Fasitoo-Tai na auai atu iai le tamā o le aiga.
E toatolu molimau a le itu a leoleo na valaau mo lenei mataupu e aofia ai le Alii leoleo ia Eli Junior Wilson, le tamaitai fomai ia Henrietta Fifita ma le tamaitai o Litala Sapati, o le aiga tuaoi.
Na finau mai le itu a leoleo mo le 14 tausaga e amata mai ai se faasalaga e tuuina mai e le Faamasinoga, peitai, na finau mai foi le tamaitai loia ia Lucy Sio Ofoia, “E tatau e le Faamasinoga ona silasila i itu lelei i le siosiomaga a lē o loo molia, aemaise o le aafiaga i le taimi na taofia ai, ao ia o loo faamoemoe iai le tausiga o lona aiga.
Na faamamafa e le Alii Faamasino Fepuleai Ameperosa Roma, o le ogaoga ma le matautia o le soligatulafono, o le faiaiga faifaamalosi, o le sauaina le tina ao iai lana tama (son).
E ono tausaga sa amata ai le faasalaga. Na toesea mai le 16 masina ona o itu lelei o ripoti mai Sui o le nuu. Sa iai ma isi toesega mo le salamo e ala i lana faatoesega, faapea le taimi muamua lea na faatoa molia mai ai (first offender).
O le taunuuga o le faaiuga a le Faamasinoga, e fa tausaga e nofo sala ai i le falepuipui.
Public Notices
