E to’a 10 alii, ae tasi le tamaitai sa taofia mai e leoleo i le osofaiga i Puipaa

0
1811
$50,000 worth of goods seized by Samoa Police from Puipaa raid Photo - Samoa Police Prisons and Corrections Services

O le osofaiga a leoleo (raid) i le afioaga o Puipaa i le afiafi ananafi na taofia mai ai i latou e toasefulu ma le tasi.

I le tali mai i fesili a le Samoa Global News, na faamaonia mai ai e le Sui Komesina o le Matagaluega a Leoleo, Papalii Monalisa Tiai-Keti, e toasefulu alii ma se tamaitai e toatasi o loo taofia nei e le Matagaluega.

“O loo tālia le taunuu atu o le Resitara e faamautu ai le aso e tula’i ai i latou i luma o le Faamasinoga, e tali atu i o latou moliaga..”

O loo molia uma latou nei i le moliaga o umiaina fualaau faasaina (possession).

O lenei osofaiga, na faatautaia ina ua lipotia atu e nisi o le mamalu o le atunuu ni faamaumauga ma faamatalaga sa mafai ona faamaoniaina, maua ai le faatagana mai le Faamasinoga e faatino ai (warrant of arrest).

Na faamaonia mai foi e Papalii, o nisi o le toasefulu lea, e aofia ai ma i latou na molia muamua ma faasalaina i le falepuipui i moliaga lava nei e aafia ai le fualaau faasaina o le aisa.

“O loo iai foi ma nisi o loo i luma nei o le Faamasinoga a latou mataupu i le moliaga lava lea e tasi o le aisa..”

“Ae o loo tatala i tua i aiaiga e talia ai le aso e suesueina ai a latou mataupu i le fualaau faasaina o le aisa.”

E $23,000 le seleni sa lipotia mai e leoleo na maua atu i le nofoaga.

E tele ni pepa aisa ua maea ona saunia mo le faatauina atu, faapea foi pulufana e lē faatagaina i Samoa. E tele foi telefoni ma isi oloa na aoina mai leoleo mo a latou suesuega.”

E silia i le 40 le aofai o leoleo na agai ati atu i lea osofaiga.

Saunoa Papalii, “Sa tuufaatasi le vaega suesue faapitoa, ma le vaega e gafa ma le tomai I laau malosi mo le saogalemu a le Matagaluega, faapea le vaega a auaunaga lautele.”

E lei mamao atu nei sa taofia mai ai foi e leoleo nisi mai le afioaga o Toamua i le Itumalo lava lea e tasi, i le uumia o le fualaau faasaina lenei o le aisa.