E Leai se Fuafuaga a le Kapeneta Poo le Malo, e Faasala i Latou Na Malaga mo Galuega Faavaitaimi ia Ianuari

E leai se fuafuaga a le Kapeneta e faasala i latou na malaga atu i galuega faavaitaimi i le malaga lea sa faataunuuina ia Ianuari, ao tuuuina mai se tapu a le Malo.

I se faatalatalanoaga ma le Minisita o Faamasinoga, le afioga ia Matamua Vasati Pulufana, na ia faamaonia mai ai lea tulaga.

Saunoa Matamua, e leai se fuafuaaga poo se finagalo o i le kapeneta e palasi i luga o alo ma fanau na malaga, ae ua uma ona faia le faaiuga a le kapeneta i nisi o sui o le Matagaluega lea o loo faamalolo lē tumau, ae sei faatino suesuega a le Komisi o Tagata Faigaluega a le Malo (PSC).

O le vaiaso nei na lipotia ai e nisi o ofisa faasalalau, ua fautuaina e le Sui Minisita o Pisinisi Alamanuia ma Leipa, le tatau lea ona faasala o i latou na malaga i le masina o Ianuari, ae o le taimi tonu lea ua iai se poloaina a le Malo e taofia le tumau ai malaga mo galuega faavaitaimi.

Ae ua saunoa manino Matamua, o le silasila a le Kapeneta, e lē o se faafitauli e tuuaia ai fua le fanau na malaga, peitai, o le aufaigaluega sa faatinoina ma le iloa le faaiuga a le Kapeneta, lea e mamafa iai.

Saunoa Matamua, “O se tasi o tagata faigaluega sinia a le Matagaluega o loo i Niu Sila nei, o ia lea sa gafa ma le faagaioina o auala ma pepa malaga”.

E pei ona faalauiloa faalauitele i se saunoaga a le Sui Palemia Tuala Tevaga Ponifasio, o lea ua toe tatala e le Malo faigamalaga mo galuega faavaitimi, ae o le masina o Aperila o le a amata ai loa ona faatino aiaiga ma alafua fou lea ua faataoto atu i itumalo mo le faatinoina o ē tofia i faigamalaga.

(7)