E lē Malōlō le Auaunaga a Leoleo e Tapē le Fefaatauaiga ma le Faaogaina o Fualaau Faasaina

0
44

“E le toe tuu avanoa le Matagaluega ia i latou e uumia fualaau faasaina ma faia fefaatauaiga, auā e telē lona aafiaga e lē gata o le soifua maloloina, ae o le afaina ai o le tupulaga talavou o si o tatou atunuu.”

E 46 tausaga se alii mai Fagalii, na taofia e leoleo i le Aso Toanai ina ua maua atu i lona fale o loo ia uumia fualaau faasaina faapea ma paipa e ulaina ai.

 

I se faatalanoaga ma le afioga i le Sui Komesina o le Matagaluega Leoleo ma Falepuipui, Papalii Monalisa Tiai-Keti, Sa ia saunoa ai, o se valaau a se tasi o le mamalu o le atunuu na agai atu i totonu o le Matagaluega.

“Sa latou faailoa mai, ona tapena faanatinati ai loa lea o itu tau tulafono e mafai ai ona faatino se osofaiga (search warrant).

O lea osofaiga na taitaia e le vaega faapitoa a le matagaluega.

“Na maua atu e leoleo i lea Alii, o pauta o loo masalomia o le aisa poo le methamphetamine, o paipa e ula ai le aisa poo le utensils ma se tino tupe, ae lei faamautu mai pe fia le aofaiga o le seleni.”

Saunoa Papalii, o le mau a lenei alii, o se faamomoli na faaoga ai lona igoa e aumai ai mea nei, ae lē o ia e onaina le faamomoli, ae na te leiloa foi poo le ā lea faamomoli.

Ua taofia nei e leoleo lea alii e talia ai le Aso 12 Iuni e tulai ai i luma o le faamasinoga, e tali atu i ona moliaga o le uumia lea o fualaau faasaina.

Sa tā’ua foi e Papalii, o lē ua molia ma taofia nei, sa aumau o ia i se faletalimalo umia toatasi i tua ane o le falemai i Motootua. E lei faailoa mai e le Sui Komesina le igoa o lea faletalimalo.

Sa momoli mai se feau lapatai a le Matagaluega o Leoleo, mo i latou uma o loo faia nei uiga faasolitulafono.

“E le toe tuu avanoa le Matagaluega ia i latou e uumia fualaau faasaina ma faia fefaatauaiga, auā e telē lona aafiaga e lē gata o le soifua maloloina, ae o le afaina ai o le tupulaga talavou i si o tatou atunuu.”

Sa momoli fo’i le faafetai tele a le Sui Komesina i le mamalu o le atunuu o loo logoina atu nei faiga faasolitulafono.

“E faafetaia le lagolago ae maise o le faamoemoega ua tuuina mai e le mamalu o le atunuu lea e faia le galuega o le taulogologo o le Matagaluega..”

E valaau atu foi le Matagaluega i soo se tasi o ia silafia nisi o loo latou faia pea lea soligatulafono e fesootai atu se Ofisa o Leoleo o loo lata ane pe valaau mai foi i le 22222.