“E lē Faatonuina mai e Seisi le Fofoga Fetalai o le Maota”

0
11511

Ua saunoa le Fofoga Fetalai o le Maota Fono o Samoa e faailoa sona lagona lē fiafia i se tusi talosaga atu a le Sui Taitai o le Itu Agai le afioga Fonotoe Pierre Lauofo Meredith, ua tatau ona fai loa se faatatau i Sui o le Maota e toalua lea ua faamavae mai le HRPP.

“Ou te lē taliaina le tusi, o lea e iai lo’u mafaufau ou te iloa lelei ai le mea e fai, ae lē faatonuina mai e seisi le fofoga fetalai”.

O le saunoaga lea a le Fofoga Fetalai ina ua tusi atu le Sui Taitai o le Vaega e Puipuia Aia Tatau a Tagata le HRPP, ina ia faia loa ni moliaga e faasaga i Alii Faipule ua faamavae mai le HRPP.

O Ale Vena Ale o le faipule Faleata 4, faapea le tofa Tu’uu Leota Anasii, o le faipule o Siumu,. Sa faamavae nei Sui Usufono o le Maota, e tusa ma le vaega 42 (1) o le Tulafono Faigapalota 2019.

Saunoa Papalii i se faatalatalanoaga ma le Samoa Global News, “O a’u o le matai tausi aiga, tautua lotu, ua lava foi lou iloa..

“O lea ou te faamoemoe i le musumusuga a le Agaga Paia e faatonu mai ma faailoa mai le mea e ao ona fai..

“Ae lē faatonua mai e seisi le fofoga fetalai, ma ou te lē talia le tusi.”

Sa faaali le lē fiafia o le Fofoga Fetalai ma toe faapea mai foi, na te lē taliaina le tusi.”

“E lē o se mea na oe, o lou tusi mai i le mea lea ma le mea lea, leai, e leai se isi na te faatonuina le fofoga fetalai.”

I le tusi a Fonotoe o loo faailoa ai aiaiga o le tulafono. O le mau a Fonotoe, o loo tā’ua i le tulafono, e tatau e le Fofoga Fetalai ona fai sana faasilasilaga e faalauiloa ai ua  avanoa le nofoa o se Sui Faipule pe afai ua faamavae mai se vaega faaupufai ae agai atu e lagolago se isi pati,

Taua foi e Fonotoe i lana tusi, o le vaega 46 o le Faavae o le Malo o Samoa, o loo tuuina mai ai, afai e fesiligia se nofoa o se Sui Faipule o le Maota Fono, o le Faamasinoga Maualuga e saili iai le tali ma se faaiuga, ae le soalaupuleina e le Fono Aoao Faitulafono.

O le Aso 1 o Novema na faailoa ai e Ale Vena Ale ma Tu’uu Leota Anasii, o laua ua faasee ese ma faamavae aloaia mai le vaega faaupufai o le HRPP. E lē o kolosi e Ale ma Tu’uu le foloa o le Palemene (cross the floor) auā o le lā mau, e lē o suia le vaega faaupufai la te lagolagoina, ae ua avea i laua ma Stui Tutoatasi (Independent).

I le mau a nei sui usufono, e iai lo la aia tatau e avea ai ma Sui Tutoatasi o le Palemene, pe afai ua le fiafia i le pati sa la ofi mai ai i le faigapalota.

SOS Togafuafua ma Salelologa.

O le Aso 20 o le masina fou o le a toe tauaofia ai le fonotaga a le Palemene mo lona tauaofiaga mulimuli o lenei tausaga 2022.

O le mau a le Fofoga Fetalai e pei ona ia faalauiloaina, e ave le mataupu o sui ua faamavae, e soalaupule ma talanoaina i le Palemene.

Sa taumafai atu mo se avanoa ma le afioga ia Fonotoe Pierre Lauofo, peitai, e lei mafai ona mauaina atu.