E Silia ma le Lua Afe le Aofai o i latou e Le’i Palota i le Sueina o se Sui Faipule a Vaimauga 3
Ua faamaoniaina mai e le Komesina o Faigapalota, e 2,044 le aofai o i latou sa resitaraina i le lola palota a Vaimauga 3, e lei faatinoina a latou palota i le faigapalota laititi sa maea atu nei i le Aso 24 o Fepuari.
E 4,781 le aofai o le lola palota a Vaimauga 3.
O lona uiga, e 43% (42.7 rounded up) le aofai o ē e le’i palota i le filifiliga o le Sui Faipule a lenei itumalo.
I se faatalanoaga ma le afioga i le Komesina o Faigapalota, Tuiafelolo Alexander John Stanley, sa ia ta’ua ai, o le laasaga lea o le a faatinoina e le Ofisa o Faigapalota, o le faasolo loa e faasala (penalty) ma momoli atu tusi e faailoa atu ai le $100 tala lea ua tatau loa ona agai mai e totogi.
A ma’ea le lua vaiaso poo le 14 aso e le’i totogiina, ona toe ave loa lea o le isi tusi, e faailoa atu ai, afai e le totogia le sala, o le a agai atu loa le Ofisa e molia i le Faamasinoga.
O le faaiuga aloaia o le faigapalota laititi a Vaimauga 3, sa tulai mai ai le afioga ia Lautimua Uelese Vaai, ina ua manumalo i se faasiliga e 449 palota.
Lautimuia Uelese Vaai – 1,531
Samau Leatigagaeono Solitamalii Timani – 1,082
Feagaimaalii Bruce Toomalatai Utaileuo – 106
Aofai o Palota Taulia – 2,719
Palota sa le sa’o ona fai – 18
E toa 2,737 ē sa faatino a latou palota. O lona uiga, e 57% i latou sa palota, ae o le toatele, e lei mafai ona oo mai e palota.
Atonu o nisi o le mamalu o le atunuu o loo malaga atu i fafo, ma nisi o loo toesea i galuega faavaitaimi. Ae moni lava, e le oo atu i se fainumera faitau afe nisi o loo iai ia tulaga le maalofia. O loo fesiligia foi poo iai lava nisi ua maliliu i totonu o lola palota.
O le toatele lava o le mamalu o le atunuu, e lei faatinoina a latou palota, ma o le a laa atu loa le Ofisa e faatino le suesueina o le lisi mo mafuaaga.
Ona faalauiloa mai ai loa poo ai e ono sala tupe i le tai $100 tala.
(3)
