Falepuipui i le faao’omanu’a i se ave taxi ao alu le taavale

O le gaioiga sa e faatinoina Francis e ogaoga tele. E le gata ina ogaoga manuaga o Atonio o se tane 45 tausaga mai Maagiagi, ae na tifa i tua le taavale ma aafia ai se isi taavale la'u pasese ma faaleagaina ai.."

0
1103

3 Iulai 2024 Faamasinoga Maualuga, Mulinuu. O le Aso Gafua 1 Iulai sa tuuina mai ai e le Faamasinoga Maualuga se faasalaga falepuipui a se alii na ia tatuia (se’i tulou) se ave taxi ao ia taumafai e faafoe le taavale, ma iu ai lava ina fetoai ma le isi taavale la’u pasese i luga o le aualatele.

O Francis Mamoe mai Vaiusu, ua faasala e le faamasinoga mo le 22 masina i le falepuipui ina ua faamaonia moliaga o le faaoomanu’a tuga (gbh) lamatia taavale feoai (endangering transport) faapea le uumia o se aupega matautia (armed with a dangerous weapon).

I faamaumauga a le itu a leoleo sa tolaulauina e le Faamasinoga, o le masina o Aokuso 2023 na taofi ai e Francis le taavale la’u pasese (taxi) i talane o le maketi o i’a i Savalalo, ma agai ai i Vaitele Fou.

Ao alu le taavale ua pasia ese atu ma le taulaga i Apia, na fesili ai loa Francis i le ave taxi, pe aisea na vili atu ai i lona toalua.

O le mau a lē ua falepuipui, sa vili atu le ave taxi ma fai atu tala leaga i lona toalua a’o faalogo lana fanau. Sa masalosalo fo’i lē ua molia, na fai le affair a le ave taxi ma lona toalua.

I faamaumauga a leoleo, e lei tali le ave taavale, peitai, na faaaoga loa e Francis Mamoe se uamea malo e faaooman’ua ai i le ave taavale.

Na tifa i tua le taavale ma lavea ai fo’i ma se isi taavale lau pasese.

I le fofogaina o le faaiuga a le Alii Faamasino ia Leiataualesa Daryl Clark, na ia saunoa ai, “O le gaioiga sa e faatinoina Francis e ogaoga tele. E le gata ina ogaoga manuaga o Atonio o se tane 45 tausaga mai Maagiagi, ae na tifa i tua le taavale ma aafia ai se isi taavale la’u pasese ma faaleagaina ai, ae na aafia ai foi ma Hugo sa ia faafoeina lea taavale.”

O le vaai a le faamasinoga e amata mai lana fua i le 4 tausaga ma le 6 masina.

Peitai, na toesea isi masina, ona o le vave ioeina e Francis o moliaga (early guilty plea). O se taimi muamua fo’i lea ua tulai ai o ia i luma o le faamasinoga.

Sa faamauina fo’i e le Faamasinoga se lipoti lelei mai le polokalame a le Salvation Army sa auai atu ai lea alii, ma faamauina fo’i le tele o aso na nofo taofia ai ao faasolo taualumaga o le mataupu.

Sa totoe mai ai loa le 28 masina poo le 2 tausaga ma le 4 masina.

O Francis Mamoe, e toafa lana fanau ae o ia fo’i o se tasi sa malaga atu i fafo mo galuega faavaitaimi i Ausetalia. O le tamaitai loia Vaisala Afoa sa tulai mo ia.

Faasalalauga Taua 


Brisin Manu Retzlaff-Lima